Yohane 6 - BAIBLO ALOO NGMAMI KLƆUKLƆU Ɔ

Yesu ha nihi akpe enuɔ niye ní

¹ Enɛ ɔmɛ a se ɔ, Yesu po Galilea taku ɔ nɛ a tsɛɛ Tiberia taku hulɔ ɔ.

² Nimli babauu nyɛɛ e se, ejakaa a na nɛ e tsa hiɔtsɛmɛ kɛ to okadi kaa Mawu Bi ji lɛ.

³ Yesu kɛ e kaseli ɔmɛ kuɔ yo ɔ, nɛ a ya hi si.

⁴ Be nɛ Yuda bi ɔmɛ maa ye Hetsɔmi nyami ɔ su ta.

⁵ Yesu wo e yi nɔ, nɛ e na nimli babauu nɛ bu kɛ ma e ngɔ. Lɔ ɔ he ɔ, e bi Filipo ke, “Jije wa ma he niye ní ngɛ nɛ maa su nimli nɛ ɔmɛ a nya?”

⁶ (Enɛ ɔ po e de gu kɛ hla Filipo juɛmi, ejakaa lɛ nitsɛ e le nɔ́ nɛ e maa pee.)

⁷ Filipo he nɔ ke, “Sika hiɔ lafa enyɔ nya abolo po be mɛ sue nya mi bɔ kakaaka.”

⁸ Kɛkɛ nɛ e kaseli ɔmɛ a ti nɔ kpa hu nɛ a tsɛɛ lɛ Andrea, Simon Petro nyɛmi ɔ de ke,

⁹ “Jokuɛ nyumuyo ko ngɛ hiɛ ɔ nɛ hɛɛ abolo bɔbɔɛ enuɔ nɛ a kɛ ngma pee, kɛ lo tsɔwi enyɔ, se lɔ ɔmɛ po tsa sui nɔ́ ko kɛ ha ma kpekpemi nɛ ɔ.”

¹⁰ Jehanɛ ɔ, Yesu de mɛ ke, “Nyɛ ha nɛ ni ɔmɛ nɛ a hi si.” Nga babauu ngɛ lejɛ ɔ tsuo. Lɔ ɔ he ɔ, ni ɔmɛ tsuo hi si. Nyumu ɔmɛ kɛkɛ a yibɔ maa su akpe enuɔ.

¹¹ Yesu kukuɔ abolo ɔ, nɛ e na Mawu si; kɛkɛ nɛ e dla ha ni ɔmɛ tsuo nɛ hii si ngɛ lejɛ ɔ. E dla lo ɔ hu ja nɔuu, nɛ nɔ tsuaa nɔ ná bɔ nɛ maa su e nya.

¹² Benɛ mɛ tsuo a ye nɛ a tɔ ɔ, Yesu de kaseli ɔmɛ ke, “Nyɛ bua bibliwi nɛ piɛ ɔ nya nɛ eko kó dã.”

¹³ A pee jã, nɛ abolo bɔbɔɛ enuɔ nɛ a kɛ ngma pee, nɛ a ye piɛ ɔ, bibliwi nɛ a bua nya a hyi kusii nyɔngma kɛ enyɔ.

¹⁴ Nihi nɛ na okadi nɛ ɔ nɛ Yesu pee ɔ de ke, “Niinɛ, gbalɔ ɔ nɛ ma je ɔ mi ɔ ji nɛ ɔ nɛ.”

¹⁵ Benɛ Yesu na kaa a ngɛ hlae nɛ a nu lɛ pani nya, nɛ a wo lɛ matsɛ ɔ, e sã e he si, nɛ lɛ nɔ kake e je kpoo kɛ kuɔ yo ɔ ekohu.

Yesu nyɛɛ nyu hɛ mi

¹⁶ Benɛ pu maa ho si nɔmi ya a, Yesu kaseli ɔmɛ pue nɔ kɛ ho taku ɔ nya ya.

¹⁷ A ya sɛ lɛ mi, nɛ a ngɔ a hɛ mi kɛ pi Kapernaum, nɛ a ngɛ taku ɔ poe kɛ yaa. Jehanɛ ɔ du bu, se loloolo ɔ, a nɛ Yesu hɛ mi.

¹⁸ Jamɛ a be ɔ, kɔɔhiɔ nɛ nya wa ko hia ngɛ pa a nɔ, nɛ oslɔke ngɛ kue hamahama.

¹⁹ Kaseli ɔmɛ hlui lɛ ɔ kɛ ya saii, maa pee kaa si tomi etɛ, loo eywiɛ; kɛkɛ nɛ a na Yesu nɛ nyɛɛ nyu ɔ hɛ mi kɛ ma, nɛ e miɔ nɛ e su lɛ ɔ he. Sawale nu mɛ,

²⁰ se Yesu de mɛ ke, “Nyɛ ko ye gbeye! Imi!”

²¹ A he lɛ kɛ wo lɛ ɔ mi kɛ bua jɔmi; amlɔ ɔ nɔuu ɔ, lɛ ɔ ya sa kpo he he nɛ a yaa a.

Ni ɔmɛ hla Yesu

²² E nɔ jena a, ma kpekpemi ɔ nɛ tlɔ taku ɔ se ɔ na kaa lɛ kpa ko be lejɛ ɔ. A le hu kaa Yesu sɛ́ lɛ ɔ mi kɛ kaseli ɔmɛ, se kaseli ɔmɛ pɛ nɛ a pue nɔ kɛ ho.

²³ Lɛ kpa komɛ je Tiberia ba sa kpo he he nɛ Nyɔmtsɛ ɔ na Mawu si, nɛ ma kpekpemi ɔ ye abolo ɔ ngɛ ɔ.

²⁴ Benɛ ma kpekpemi ɔ na kaa Yesu be lejɛ ɔ, nɛ a nɛ́ e kaseli ɔmɛ hulɔ ɔ, a wo lɛ ɔmɛ, nɛ a pue nɔ kɛ ho Kapernaum ya ya hla Yesu.

Yesu ji abolo nɛ haa nɔ wami

²⁵ Benɛ ni ɔmɛ ba na Yesu ngɛ taku ɔ se ɔ, a bi lɛ ke, “Tsɔɔlɔ, mɛni be o ba hiɛmɛ nɛ ɔ?”

²⁶ Yesu he nɔ ke, “I ngɛ nyɛ dee anɔkuale mi ke, pi okadihi nɛ nyɛ na a a he nɛ nyɛ ngɛ mi hlae; se mohu abolo ɔ nɛ nyɛ ye nɛ nyɛ tɔ ɔ he nɛ nyɛ ngɛ mi hlae ɔ nɛ.

²⁷ Nyɛ ko gbo ngma nɛ puɛɔ ɔ he dengme. Mohu ɔ, nyɛ hla ngma nɛ hii si kɛ yaa neneene. Enɛ ɔ ji nɔ́ nɛ Nɔmlɔ Bi ɔ ma ha nyɛ ɔ nɛ, ejakaa Tsɛ Mawu ɔ nɛ hla lɛ.”

²⁸ Lɔ ɔ he ɔ, a bi Yesu ke, “Kɛ wa maa pee kɛ pee Mawu suɔmi nya ní kɛɛ?”

²⁹ Yesu he nɔ́ ke, “Mawu suɔ kaa nyɛ he nɔ nɛ e tsɔ ɔ nyɛɛ ye.”

³⁰ A he nɔ nɛ a bi lɛ ke, “Mɛni okadi o maa to wɔ, konɛ wa he mo waa ye? Mɛni o maa pee?

³¹ Wa nɛmɛ ɔmɛ ye mana ngɛ nga a nɔ. E ngɛ ngmami ɔmɛ a mi ke, ‘E ha abolo je hiɔwe kɛ ba ha mɛ nɛ a ye.’ ”

³² Yesu de mɛ ke, “I ngɛ nyɛ dee anɔkuale mi ke nɔ́ nɛ Mose ha nyɛ ɔ, pi lɔ ɔ ji abolo nɛ je hiɔwe ɔ. Tsaatsɛ ji nɔ nɛ haa nyɛ abolo nitsɛnitsɛ nɛ je hiɔwe.

³³ Mawu we abolo ɔ ji nɔ nɛ je hiɔwe kɛ ba a, nɛ lɛɛ e ma ha je ɔ wami.”

³⁴ Jehanɛ ɔ, a de Yesu ke, “Nyɔmtsɛ, ha wɔ abolo nɛ ɔ eko daa.”

³⁵ Yesu de mɛ ke, “Imi ji abolo nɛ haa nɔ wami ɔ nɛ. Ke nɔ ko ba ye ngɔ ɔ, hwɔ be lɛ yee gblegbleegble; nɛ nɔ nɛ he mi ye ɔ, kuma be lɛ yee gblegbleegble.

³⁶ Kaa bɔ nɛ i de nyɛ momo ɔ, nyɛ na mi lɛɛ, se nyɛ he we yi.

³⁷ Nɔ tsuaa nɔ nɛ Tsaatsɛ ngɔ ha mi ɔ maa ba ye ngɔ. Nɔ tsuaa nɔ nɛ baa ye ngɔ ɔ, i be lɛ fiee kɔkɔɔkɔ.

³⁸ Ejakaa i je hiɔwe kɛ ba nɛ ma ba pee nɔ nɛ tsɔ mi ɔ suɔmi nya ní, se pi imi nitsɛ ye suɔmi nya ní.

³⁹ Nɔ nɛ tsɔ mi ɔ, nɔ́ nɛ e suɔ ji kaa nihi tsuo nɛ e tu ngɔ wo ye dɛ mi ɔ, ngmelu kake kó je mi; se mohu nyagbe ligbi ɔ, ma tle mɛ tsuo si.

⁴⁰ Ejakaa Tsaatsɛ suɔ kaa nɔ tsuaa nɔ nɛ na Bi ɔ, nɛ e heɔ lɛ yeɔ ɔ, e na neneene wami. Nɛ nyagbe ligbi ɔ, ma tle mɛ si kɛ ba wami mi.”

⁴¹ Benɛ Yesu de ke, “Imi ji abolo nɛ je hiɔwe ɔ”, ni ɔmɛ tu munyu huitihuiti kɛ si lɛ;

⁴² nɛ a bi ke, “Anɛ pi Yosef bi Yesu ɔ ji nɛ ɔ? Tse wa le e tsɛ kɛ e nyɛ! Nɛ lɛɛ e ke e je hiɔwe ɔ? Kɛ pee kɛɛ nɛ e deɔ jã mɔ?”

⁴³ Yesu de mɛ ke, “Nyɛ kpa munyu huitihuiti tumi.

⁴⁴ Nɔ ko nɔ ko be nyɛe maa ba ye ngɔ kaa ja Tsɛ ɔ nɛ tsɔ mi ɔ gbla lɛ kɛ ba ye ngɔ; nɛ nyagbe ligbi ɔ, ma tle lɛ si.

⁴⁵ Nɔ́ nɛ gbali ɔmɛ ngma ji nɛ ɔ nɛ: ‘Mawu maa tsɔɔ nɔ tsuaa nɔ ní.’ Munyu nɛ Tsɛ ɔ tu ɔ, nɔ tsuaa nɔ nɛ maa nu, nɛ e maa kase ní kɛ je mi ɔ maa ba ye ngɔ.

⁴⁶ Se enɛ ɔ tsɔɔ we kaa nɔ ko na Tsɛ ɔ hyɛ; ja imi nɛ i je Mawu ngɔ ɔ, imi pɛ nɛ i na lɛ.

⁴⁷ I ngɛ nyɛ dee anɔkuale mi ke nɔ tsuaa nɔ nɛ heɔ yeɔ ɔ, e nine su neneene wami nɔ.

⁴⁸ Imi ji abolo nɛ haa nɔ wami ɔ nɛ.

⁴⁹ Nyɛ nɛmɛ ɔmɛ ye mana ngɛ nga a nɔ, nɛ a gbo.

⁵⁰ Se abolo nɛ je hiɔwe ɔ lɛɛ ke nɔ ko ye ɔ, e be gboe.

⁵¹ Imi ji abolo nɛ je hiɔwe nɛ haa nɔ wami. Nɔ nɛ maa ye kikɛmɛ a abolo nɛ ɔ eko ɔ maa hi si kɛ maa ya neneene. Abolo nɛ ma ha lɛ ɔ ji imi nitsɛ ye he lo nɛ i ngɔ kɛ ha, bɔ nɛ pee nɛ je ɔ tsuo yi nɛ na wami.”

⁵² Jehanɛ Yuda bi ɔmɛ sɔuu bɔni nya sami, nɛ a bi ke, “Kɛ nɔmlɔ nɛ ɔ maa ngɔ e he lo ha wɔ nɛ waa ye kɛɛ?”

⁵³ Yesu de mɛ ke, “I ngɛ nyɛ dee anɔkuale mi ke, ke nyɛ yi Nɔmlɔ Bi ɔ he lo, nɛ́ nyɛɛ nu e muɔ ɔ, nyɛ be wami nae.

⁵⁴ Nɔ tsuaa nɔ nɛ maa ye ye he lo, nɛ e maa nu ye muɔ ɔ ma na neneene wami; nɛ nyagbe ligbi ɔ, ma tle lɛ si.

⁵⁵ Ejakaa ye he lo ɔ ji niye ní nɛ sa nɛ a ye, nɛ ye muɔ ɔ, nɔ́ nɛ sa nɛ a nu.

⁵⁶ Nɔ tsuaa nɔ nɛ yeɔ ye he lo, nɛ e nuu ye muɔ ɔ hii ye mi, nɛ imi hu i hii e mi.

⁵⁷ Tsɛ ɔ nɛ tsɔ mi ɔ hɛ ngɛ; nɛ e ha nɛ imi hu ye hɛ ngɛ. Jã kɛ̃, nɔ tsuaa nɔ nɛ yeɔ ye he lo ɔ, ma ha lɛ wami.

⁵⁸ Abolo nɛ je hiɔwe ɔ ji nɛ ɔ nɛ. Abolo nɛ ɔ be kaa nɔ́ nɛ nyɛ nɛmɛ ɔmɛ ye nɛ pee se a gbo ɔ. Mohu ɔ, nɔmlɔ nɛ maa ye abolo nɛ ɔ maa hi si kɛ maa ya neneene.”

⁵⁹ Yesu de ní nɛ ɔmɛ benɛ e ngɛ ní tsɔɔe ngɛ kpe he ɔ ngɛ Kapernaum.

Neneene wami munyuhi

⁶⁰ Yesu se nyɛɛli ɔmɛ a ti nihi babauu nɛ nu nɔ́ nɛ ɔ, de ke, “Ei! Tsɔɔmi nɛ ɔ he wa lo! Mɛnɔ maa nu sisi.”

⁶¹ Benɛ Yesu kɔ se kaa e kaseli ɔmɛ ngɛ munyu huitihuiti tue ngɛ níhi nɛ e de mɛ ɔ a he ɔ, e bi mɛ ke, “Anɛ enɛ ɔ maa wo nyɛ nine mi nyu lo?

⁶² Ke nyɛ na Nɔmlɔ Bi ɔ nɛ kpale kɛ yaa hiɔwe he nɛ e je kɛ ba a, kɛ nyɛ maa pee kɛɛ?

⁶³ Mawu mumi ɔ nɛ haa nɔ wami ɔ nɛ. Adesa he wami pi nɔ́ ko kulaa. Munyuhi nɛ i kɛ nyɛ tu nɛ ɔ ma ha nyɛ Mawu mumi nɛ haa nɔ wami ɔ.

⁶⁴ Se kɛ̃, nyɛ ti ni komɛ he we yi.” (Kɛ je sisije ɔ, Yesu lɛɛ e le ni nɛmɛ nɛ be lɛ hee maa ye; nɛ nɔmlɔ nɛ maa tsɔɔ e se blɔ ɔ hu e le lɛ.)

⁶⁵ Yesu ya nɔ de ke, “Enɛ ɔ nɔuu he je nɛ i de nyɛ ke nɔ ko nɔ ko be nyɛe maa ba ye ngɔ kaa ja Tsɛ ɔ nitsɛ ha lɛ he blɔ ɔ nɛ.”

⁶⁶ Jehanɛ ɔ, munyu nɛ ɔmɛ a he je ɔ, Yesu se nyɛɛli ɔmɛ a ti nihi babauu kpale a se, nɛ a kɛ lɛ nyɛɛ we hu.

⁶⁷ Lɔ ɔ he ɔ, e bi ni nyɔngma kɛ enyɔ ɔmɛ ke, “Nyɛ hu nyɛ suɔ kaa nyɛɛ maa je lo?”

⁶⁸ Simon Petro he nɔ ke, “Nyɔmtsɛ, mɛnɔ ngɔ wa maa ya? Mo lɛ o ngɛ neneene wami munyu ɔmɛ.

⁶⁹ Amlɔ nɛ ɔ, wɔɔ lɛɛ wa he ye, nɛ wa na le hulɔ kaa mo ji Mawu Nɔ Klɔuklɔu ɔ nɛ.”

⁷⁰ Yesu bi mɛ ke, “Anɛ pi imi nɛ i hla nyɛ ni nyɔngma kɛ enyɔ ɔmɛ lo? Lɛ kɛ pee kɛɛ nɛ nyɛ ti nɔ kake peeɔ Abosiami ɔ?”

⁷¹ Blɔɔ, Simon Iskariot bi Yuda e ngɛ dee ɔ nɛ. Ejakaa Yuda a, ni nyɔngma kɛ enyɔ ɔmɛ a ti nɔ kake ji lɛ. Se pee se ɔ, lɛ ji nɔ nɛ ba tsɔɔ Yesu se blɔ.