Yohane 5 - BAIBLO ALOO NGMAMI KLƆUKLƆU Ɔ

Yesu tsa hiɔtsɛ ko ngɛ taku ko he Hejɔɔmi ligbi ɔ

¹ Enɛ ɔ se ɔ, Yuda bi ɔmɛ ngɛ nyami ligbi yee ngɛ Yerusalem, nɛ Yesu ya lejɛ ɔ.

² Taku ko kɛ e he kue enuɔ ngɛ To Agbo ɔ nɛ ngɛ Yerusalem ɔ kasa nya. Hebri gbi mi ɔ, a tsɛɛ taku nɛ ɔ Betesda.

³ Hiɔtsɛmɛ babauu, hɛ yuyuili, glɔtsɛmɛ, kɛ ni nɛmɛ nɛ hule pueɔ si tsuo ngɛ kue ɔmɛ a mi. [A ngɛ blɔ hyɛe nɛ a ba klɛ nyu ɔ mi.

⁴ Be komɛ ɔ, Nyɔmtsɛ ɔ bɔfo ma kple si ba klɛ nyu ɔ mi; kɛkɛ ɔ, nɔ tsuaa nɔ nɛ lɛ kekle e ma ya nɔ nyu ɔ mi ɔ, hiɔ tsuaa hiɔ nɛ ngɛ e he ɔ taa amlɔ.]

⁵ Nyumu ko ngɛ lejɛ ɔ nɛ ngɛ hiɔ nue jeha nyingmi etɛ kɛ kpaanyɔ sɔuu.

⁶ Yesu na lɛ nɛ hwɔɔ si, nɛ e le kaa nyumu ɔ na we he wami be babauu. Lɔ ɔ he ɔ, e bi lɛ ke, “O suɔ nɛ a tsa mo lo?”

⁷ Hiɔtsɛ ɔ he nɔ ke, “Nyɔmtsɛ, ke a ba klɛ nyu ɔ mi kikɛ nɛ ɔ, i be nɔ ko nɛ ma wo mi ya fɔ taku ɔ mi. Be tsuaa be ɔ, ke ma su lejɛ ɔ, nɔ kpa sɛ ye hlami ya nɔ mi momo.”

⁸ Yesu de lɛ ke, “Tee si, wo o sa a nɛ o nyɛɛ.”

⁹ Amlɔ nɔuu ɔ, nyumu ɔ he mi wa lɛ; e wo e sa a, nɛ e bɔni nyɛɛmi. Se Hejɔɔmi ligbi nɛ a tsa hiɔtsɛ ɔ.

¹⁰ Lɔ ɔ he ɔ, Yuda ma nimeli ɔmɛ de nɔ nɛ a tsa lɛ ɔ ke, “Mwɔnɛ ɔ, Hejɔɔmi ligbi; wa mlaa a ngmɛ́ blɔ kaa o hɛɛɔ o sa.”

¹¹ E he nɔ ke, “Nɔmlɔ nɛ tsa mi ɔ lɛ de mi ke ma wo ye sa a nɛ ma nyɛɛ.”

¹² Jehanɛ ɔ, a bi lɛ ke, “Mɛnɔ lɛ de mo ke o pee jã a?”

¹³ Se nɔ nɛ a tsa lɛ ɔ li Yesu; nɛ pohu nihi babauu ngɛ lejɛ ɔ, lɔ ɔ he ɔ, Yesu sã e he nɛ e je.

¹⁴ Pee se ɔ, Yesu ya na nyumu ɔ ngɛ sɔlemi we ɔ, nɛ e de lɛ ke, “Bu tue, amlɔ nɛ ɔ nɛ o na he wami nɛ ɔ, koo pee yayami hu. Ke pi jã a, nɔ́ nɛ maa ba o nɔ ɔ maa pe kekle nɔ́ ɔ.”

¹⁵ Jehanɛ ɔ, nyumu ɔ pue nɔ kɛ ho nɛ e ya de Yuda ma nimeli ɔmɛ ke Yesu ji nɔ nɛ tsa lɛ ɔ nɛ.

¹⁶ Lɔ ɔ he ɔ, Yuda ma nimeli ɔmɛ je hɛ pi Yesu nɛ a bɔni e nya doomi, ejakaa e tsa hiɔtsɛ Hejɔɔmi ligbi ɔ.

¹⁷ Yesu de mɛ ke, “Tsaatsɛ ngɛ ní tsue be tsuaa be, nɛ imi hu i ngɛ ní tsue.”

¹⁸ Nɔ nɛ e de nɛ ɔ mohu ha Yuda ma nimeli ɔmɛ a hɛ dɔ pe kekle ɔ po, nɛ a to kaa ja a gbe lɛ. Ejakaa pi mlaa a nɛ kɔɔ Hejɔɔmi ligbi ɔ he ɔ kɛkɛ nɛ e tɔ̃; se e de hu ke e tsɛ ji Mawu, nɛ́ tsɔɔ kaa e kɛ Mawu sɔ.

Bi ɔ ngɛ he blɔ

¹⁹ Jehanɛ ɔ, Yesu ya nɔ nɛ e de mɛ ke, “I ngɛ nyɛ dee anɔkuale mi ke Bi ɔ pee we nɔ́ ko ngɛ lɛ nitsɛ e yi mi tomi nya. Nɔ́ nɛ e na nɛ Tsɛ ɔ ngɛ pee ɔ, lɔ ɔ nɛ e peeɔ. Nɔ́ nɛ Tsɛ ɔ peeɔ ɔ, Bi ɔ hu peeɔ.

²⁰ Ejakaa Tsɛ ɔ suɔ Bi ɔ saminya, nɛ e tsɔɔ lɛ nɔ́ tsuaa nɔ́ nɛ lɛ nitsɛ e peeɔ. Jehanɛ ɔ, e maa tsɔɔ Bi ɔ ní nguahi nɛ pe enɛ ɔmɛ tete, nɛ e maa pee nyɛ nyakpɛ.

²¹ Kaa bɔ nɛ Tsɛ ɔ tleɔ gbogboe si, nɛ e ngɔɔ wami woɔ mi ɔ, jã nɔuu Bi ɔ hu haa níhi nɛ e suɔ mɛ ɔ wami.

²² Tsɛ ɔ nitsɛ kojo we nɔ ko. E ngɔ jamɛ a he blɔ ɔ tsuo kɛ ha Bi ɔ, konɛ Bi ɔ nɛ kojo nihi.

²³ Kɛkɛ ɔ, nihi tsuo maa wo Bi ɔ hɛ mi nyami kaa bɔ nɛ a woɔ Tsɛ ɔ hɛ mi nyami ɔ. Lɔ ɔ he ɔ, nɔ tsuaa nɔ nɛ wui imi Bi ɔ, ye hɛ mi nyami ɔ, Tsɛ ɔ nɛ tsɔ mi ɔ hɛ mi nyami e wui ɔ nɛ.

²⁴ “I ngɛ nyɛ dee anɔkuale mi ke, nɔ tsuaa nɔ nɛ buɔ ye munyu tue, nɛ e heɔ nɔ nɛ tsɔ mi ɔ yeɔ ɔ, e nine su neneene wami nɔ. A be lɛ fɔ bue, ejakaa e po mi ngɛ gbenɔ mi kɛ ho wami mi ya.

²⁵ I ngɛ nyɛ dee anɔkuale mi ke be ma, pohu e su ta, nɛ gbogboehi maa nu Mawu Bi ɔ gbi, nɛ a maa ba wami mi ekohu.

²⁶ Lɔ ɔ he ɔ, kaa bɔ nɛ Tsɛ ɔ ngɛ wami ngɛ e mi ɔ, ja nɔuu e ha e Bi ɔ hu wami.

²⁷ Tsɛ ɔ ha Bi ɔ he blɔ kaa e kojo nihi, ejakaa lɛ ji Nɔmlɔ Bi ɔ nɛ.

²⁸ Nyɛ hɛ mi kó pee nyɛ yaa kaa be maa su nɛ gbogboehi tsuo maa nu Mawu Bi ɔ gbi,

²⁹ nɛ a maa je kpo kɛ je a yɔkɔ ɔmɛ a mi. A ti ni nɛmɛ nɛ pee kpakpa a, a maa te si, nɛ a maa hi si kɛ maa ya neneene; se ni nɛmɛ nɛ pee yayami ɔ lɛɛ a maa te si, konɛ a kojo mɛ.

Yesu he odase yemi

³⁰ “I be he blɔ nɛ i peeɔ imi nitsɛ ye yi mi nɔ́ ko. Bɔ nɛ Mawu tsɔɔ mi ke ma kojo ɔ, jã pɛ i peeɔ; lɔ ɔ he ɔ, i yeɔ dami sane. Ejakaa i hla we kaa ma pee nɔ́ nɛ imi nitsɛ i suɔ, se mohu Tsaatsɛ nɛ tsɔ mi ɔ suɔmi nya ní i peeɔ.

³¹ “Ke i ye imi nitsɛ ye he odase ɔ, e sɛ kaa a ngɔ nɔ́ nɛ i de ɔ kaa anɔkuale.

³² Se mohu nɔ kpa nɛ ngɛ ye he odase yee; lɔ ɔ he ɔ, i le kaa anɔkuale e ngɛ tue.

³³ Nyɛɛ lɛɛ nyɛ tsɔ kɛ ya Yohane ngɔ, nɛ e ye anɔkuale ɔ he odase.

³⁴ Imi lɛɛ i ngɔɛ nɔmlɔ adesa ko odase, se bɔ nɛ pee nɛ a he nyɛ yi wami he je nɛ i ngɛ enɛ ɔ dee.

³⁵ Yohane ba kaa la nɛ ngɛ tsoe, nɛ ngɛ kpɛe ha nyɛ. Se be bɔɔ pɛ nɛ nyɛ ná e he bua jɔmi.

³⁶ Imi lɛɛ i ngɛ odase nɛ pe Yohane nɔ́ ɔ, ejakaa ní tsumihi nɛ Tsaatsɛ ngɔ ha mi kaa ma tsu ɔ, jamɛ a ní tsumi ɔmɛ nɛ́ i tsuɔ ɔ nɔuu yeɔ ye he odase kaa Tsɛ ɔ lɛ tsɔ mi.

³⁷ Tsɛ ɔ nɛ tsɔ mi ɔ, lɛ nitsɛ e yeɔ ye he odase, se nyɛɛ lɛɛ nyɛ nui e gbi, nɛ nyɛ nɛ lɛ hyɛ hulɔ.

³⁸ Nyɛ bui e munyu ɔ, ejakaa imi nɔmlɔ nɛ e tsɔ ɔ, nyɛ he we mi yi.

³⁹ Nyɛ hlaa ngmami ɔmɛ a mi, ejakaa nyɛ susuɔ kaa a mi nyɛ ma na neneene wami ngɛ; nɛ lɔ ɔmɛ nɔuu yeɔ ye he odase.

⁴⁰ Se nyɛ sume kaa nyɛ maa ba ye ngɔ, konɛ nyɛ na wami.

⁴¹ “I hla we nimli a hɛ mi nyami.

⁴² I le nyɛ su, nɛ i le hu kaa Mawu suɔmi be nyɛ mi.

⁴³ I ba ngɛ Tsaatsɛ biɛ mi po nyɛ he we mi; se nɔ ko nɛ maa ba ngɛ lɛ nitsɛ e suɔmi nya a lɛɛ nyɛ ma he lɛ.

⁴⁴ Nyɛ nɛ nyɛ hlaa nɛ nihi nɛ je nyɛ yi, se nyɛ bɔɛ mɔde, konɛ nɔ nɛ lɛ nɔ kake pɛ ji Mawu ɔ nɛ wo nyɛ hɛ mi nyami ɔ, kɛ maa pee kɛɛ nɛ nyɛ ma he mi maa ye mɔ?

⁴⁵ Nyɛ ko susu kaa imi lɛ ma po nyɛ nya ngɔ ha Tsaatsɛ. Mose nɛ nyɛ ngɔ nyɛ hɛ kɛ fɔ e nɔ ɔ, lɛ tutuutu ji nɔ nɛ maa po nyɛ nya.

⁴⁶ Kaa nyɛ he Mose ye jinɛ imi hu nyɛ ma he mi maa ye, ejakaa munyuhi nɛ e ngma a, ye he e ngma ngɛ.

⁴⁷ Se nɛ nyɛ bui níhi nɛ e ngma a, kɛ maa pee kɛɛ nɛ nyɛ ma he ye munyu ɔmɛ maa ye mɔ?”