Yohane 4 - BAIBLO ALOO NGMAMI KLƆUKLƆU Ɔ

Yesu kɛ Samaria yo ɔ

¹ Farisi bi ɔmɛ nu kaa Yesu ngɛ kaseli babauu nae, nɛ e ngɛ nihi babauu sɔlee hu pe Yohane.

² (Anɔkuale mi ɔ, Yesu nitsɛ sɔle we nɔ ko, se e kaseli ɔmɛ mohu lɛ a sɔle nihi.)

³ Lɔ ɔ he ɔ, benɛ Yesu nu nɔ́ nɛ a ngɛ dee ngɛ e he ɔ, e je Yudea, nɛ e kpale e se kɛ ho Galilea ya.

⁴ Benɛ e yaa a, e hia kaa e gu Samaria.

⁵ E ba su Samaria ma ko nɛ a tsɛɛ Sikar a. Lejɛ ɔ kɛ zugba kpɔ nɛ Yakob ngɔ ha e bi Yosef ɔ he kɛ we kulaa.

⁶ Yakob vu ɔ ngɛ lejɛ ɔ. Piani ngmlɛ nyɔngma kɛ enyɔ ɔ, Yesu ba su vu ɔ he, nɛ e ya hi si, ejakaa pɔ tɔ lɛ kɛ blɔ nyɛɛmi.

⁷ Kɛkɛ nɛ Samaria yo ko ba nyu yɛmi. Yesu de lɛ ke, “Ha mi nyu ɔ eko nɛ ma nu.”

⁸ (Jamɛ a be ɔ, Yesu kaseli ɔmɛ sɛ ma a mi ya nɛ a yaa he niye ní.)

⁹ Yo ɔ bi Yesu ke, “Pi Yuda no ji mo lo? Nɛ kɛ pee kɛɛ nɛ o ngɛ imi Samaria no nyu bae nɛ o nu ɔ?” (Yuda bi kɛ Samaria bi yi.)

¹⁰ Yesu de yo ɔ ke, “Ke o le nɔ́ kpakpa nɛ Mawu haa nɔ, kɛ nɔ nɛ ngɛ mo nyu bae nɛ ɔ, jinɛ mo mohu o maa ba lɛ eko, nɛ lɛɛ e ma ha mo nyu nɛ haa nɔ wami.”

¹¹ Yo ɔ de lɛ ke, “Nyɔmtsɛ, vu ɔ mi kuɔ, nɛ o be nɔ́ ko hulɔ nɛ o kɛ maa yɛ nyu ɔ. Nyu nɛ haa nɔ wami ɔ, jije o ma ná kɛ je?

¹² Wa nɛ̃ Yakob nɛ ha wɔ kikɛmɛ a vu nɛ ɔ; nɛ lɛ nitsɛ, kɛ e bimɛ, kɛ e lohwehi tsuo nu e mi nyu. Anɛ o ngɛ hlae nɛ o tsɔɔ kaa moo o pe Yakob ɔ lo?”

¹³ Yesu he nɔ ke, “Nɔ tsuaa nɔ nɛ nuu vu nɛ ɔ mi nyu ɔ eko ɔ, kuma maa ye lɛ ekohu,

¹⁴ se nɔ nɛ maa nu nyu nɛ imi ma ha lɛ ɔ, kuma be lɛ yee hu gblegbleegble. Ejakaa nyu nɛ ma ha lɛ ɔ ma plɛ nyu hɛngmɛ nɛ baa nyu nɛ haa nɔ wami kɛ yaa neneene ngɛ e mi.”

¹⁵ Jehanɛ ɔ, yo ɔ de Yesu ke, “Nyɔmtsɛ, ha mi kikɛmɛ a nyu nɛ ɔ mɔ, kɛkɛ ɔ, kuma be mi yee hu, nɛ e be hiae po kaa ma ba hiɛ ɔ ba yɛ nyu.”

¹⁶ Yesu de yo ɔ ke, “Yaa nɛ o ya tsɛ o huno, nɛ o kɛ lɛ nɛ ba hiɛ ɔ.”

¹⁷ Yo ɔ he nɔ ke, “I be huno.” Yesu de lɛ ekohu ke, “Ke o de ke o be huno ɔ, o tu anɔkuale.

¹⁸ O gba nyumuhi enuɔ momo, nɛ nyumu nɛ o kɛ lɛ ngɛ piɔ hu, pi o huno nitsɛnitsɛ ji lɛ. O tu anɔkuale sisiisi.”

¹⁹ Yo ɔ de Yesu ke, “Nyɔmtsɛ, i na kaa gbalɔ ji mo.

²⁰ Wa nɛmɛ ja Mawu ngɛ yo nɛ ɔ nɔ, se nyɛ Yuda bi lɛɛ nyɛ ke Yerusalem ji he nɛ sa kaa wa ja Mawu ngɛ.”

²¹ Yesu de lɛ ke, “Maa, he mi nɛ o ye kaa be ma nɛ nyɛ ma ja Tsɛ ɔ, pi yo nɛ ɔ nɔ, nɛ pi Yerusalem hulɔ.

²² Nyɛ Samaria bi, nyɛ li nɔ tutuutu nɛ nyɛ jaa a; se wɔ Yuda bi lɛɛ nɔ nɛ wa jaa a, wa le lɛ; ejakaa wɔ nɛ wa ngɔ yi wami hemi kɛ ba.

²³ Jehanɛ ɔ, be ɔ ma, nɛ Mawu ma ha nihi he wami, konɛ a ja Tsɛ ɔ ngɛ mumi mi kɛ anɔkuale mi kaa bɔ nɛ Tsɛ ɔ nitsɛ suɔ. Pohu be ɔ su momo.

²⁴ Mawu ɔ, Mumi ji lɛ, nɛ nihi nɛ jaa lɛ ɔ, ja a ja lɛ ngɛ mumi kɛ anɔkuale mi.”

²⁵ Yo ɔ de lɛ ke, “I le kaa Mesia a nɛ a tsɛɛ lɛ Kristo ɔ ma, nɛ ke e ba a, e maa tsɔɔ wɔ nɔ́ tsuaa nɔ́.”

²⁶ Yesu he nɔ ke, “Imi nɛ i kɛ mo ngɛ munyu ɔ tue ɔ, imi ji Mesia a nɛ.”

²⁷ Jamɛ a be ɔ nɔuu ɔ, Yesu kaseli ɔmɛ ba je kpo, nɛ a hɛ mi pee mɛ yaa kaa e kɛ yo ngɛ ní sɛɛe. Se a ti nɔ ko bi we yo ɔ nɔ́ nɛ e ngɛ hlae; nɛ a bi we Yesu hu nɔ́ nɛ e kɛ yo ɔ ngɛ sɛɛe.

²⁸ Kɛkɛ nɛ yo ɔ si e paya buɛ ɔ, nɛ e pue nɔ kɛ ho ma a mi ya; nɛ e ya de ma mi bi ɔmɛ ke,

²⁹ “Nyɛɛ ba! Nyɛ ba hyɛ nyumu ko nɛ de mi níhi tsuo nɛ i pee hyɛ. Anɛ pi lɛ ji Kristo ɔ lo?”

³⁰ Kɛkɛ nɛ ma a tsuo bu kɛ ba Yesu ngɔ.

³¹ Jamɛ a be ɔ, kaseli ɔmɛ bɔni Yesu pɛɛ kpami ke e ba wo e nya mi nɔ́ ko.

³² Se e he nɔ ke, “I ngɛ ngma nɛ i yeɔ, se nyɛ li.”

³³ Lɔ ɔ he ɔ, kaseli ɔmɛ bi a he ke, “Anɛ nɔ ko ba ha lɛ nɔ́ ko nɛ e ye lo?”

³⁴ Yesu de mɛ ke, “Ye niye ní ji kaa ma pee nɔ nɛ tsɔ mi ɔ suɔmi nya ní; nɛ́ nɔ́ nɛ e tsɔ mi tsumi ɔ, ma gbe nya.

³⁵ Tse nyɛ deɔ ke, ‘E piɛ hlami eywiɛ nɛ a ma kpa ní.’ Se i ngɛ nyɛ dee ke, nyɛɛ hyɛ ngmɔ ɔmɛ a nɔ kɛ kpe, nɛ nyɛ maa na kaa ní ba, nɛ e kpami be su nɛ a ma bua nya.

³⁶ Amlɔ nɛ ɔ po ní kpalɔ ɔ ngɛ e hiɔwo nae; e ngɛ ngmɔ ní nya buae kɛ ngɛ wami nɛ ngɛ kɛ yaa neneene ɔ toe, konɛ ní dulɔ ɔ, kɛ ní kpalɔ ɔ tsuo nɛ a bla kɛ nya.

³⁷ Enɛ ɔ tsɔɔ kaa nɔ́ ko nɛ a deɔ ke, ‘Nɔ ko duɔ ní, nɛ nɔ ko hu kpaa’ a ngɛ mi niinɛ.

³⁸ I tsɔ nyɛ ní kpami ngɛ ngmɔ nɔ he nɛ nyɛ du we nɔ́ ko ngɛ. Ni kpahi tsu ní ɔ, se nyɛ mohu lɛ nyɛ ba na he se.”

³⁹ Samaria bi babauu nɛ ngɛ jamɛ a ma a mi ɔ he Yesu ye, ejakaa yo ɔ de mɛ ke, “E de mi níhi tsuo nɛ i pee.”

⁴⁰ Lɔ ɔ he ɔ, benɛ Samaria bi ɔmɛ ba Yesu ngɔ ɔ, a kpa lɛ pɛɛ ke e hi a ngɔ. Nɛ Yesu kɛ mɛ hi lejɛ ɔ ligbi enyɔ.

⁴¹ Benɛ Yesu fiɛ munyu ɔ, nihi babauu pe kekle ɔ he ye.

⁴² Kɛkɛ nɛ a de yo ɔ ke, “Jehanɛ lɛɛ pi o munyu ɔ nya hu nɛ wa heɔ yeɔ kaa nɔmlɔ nɛ ɔ ji je ɔ yi wami helɔ ɔ, se mohu nɔ́ nɛ wɔ nitsɛmɛ wa nu kɛ wa tue kɛ je lɛ nitsɛ e nya a he.”

Yesu tsa amlaalo nɔkɔtɔma ko binyumu

⁴³ Yesu ye ligbi enyɔ ngɛ lejɛ ɔ, nɛ e pue nɔ kɛ ho Galilea ya,

⁴⁴ ejakaa lɛ nitsɛ e ye odase ke, “A bui gbalɔ ngɛ lɛ nitsɛ e ma mi.”

⁴⁵ Benɛ e ba su Galilea a, ma a tsuo he lɛ atuu, ejakaa níhi tsuo nɛ e pee ngɛ Yerusalem Hetsɔmi nyami be ɔ, mɛ nitsɛmɛ a ya lejɛ ɔ nɛ a na paa.

⁴⁶ Jehanɛ ɔ, Yesu kpale kɛ ba Kana ngɛ Galilea, he nɛ e ha nyu plɛ pee wai ngɛ be ko ɔ ekohu. Tsɔlɔ nɔkɔtɔma ko ngɛ Kapernaum nɛ e bi be he wami.

⁴⁷ Benɛ e ná le kaa Yesu je Yudea kɛ ba Galilea a, e ba e ngɔ, nɛ e ba kpa lɛ pɛɛ ke e binyumu miɔ nɛ e ma gbo, lɔ ɔ he ɔ, a ho Kapernaum ya nɛ e ya tsa lɛ.

⁴⁸ Se Yesu de lɛ ke, “Blɔɔ ke nyɛ nɛ okadihi, kɛ nyakpɛ níhi ɔ, lɛɛ nyɛ be hee maa ye!”

⁴⁹ Tsɔlɔ ɔ de lɛ ke, “Nyɔmtsɛ, ha waa ho esɔ, ke pi ja a, ye bi ɔ ma gbo.”

⁵⁰ Yesu de lɛ ke, “Yaa, o bi ɔ yi na wami.” Munyu ɔ nɛ Yesu tu nyumu ɔ, e he ye, nɛ e pue nɔ kɛ ho.

⁵¹ Benɛ e ngɛ blɔ ɔ nɔ kɛ yaa we mi ɔ, e sɔmɔli kɛ lɛ ba kpe; nɛ a de lɛ ke, “O bi ɔ yi na wami.”

⁵² Tsɔlɔ ɔ bi sɔmɔli ɔmɛ ke, “Mɛni be hiɔ ɔ fani ha lɛ ɔ?” A he nɔ ke, “Hiɛ̃ piani ngmlɛ kake be mi nɛ aslã a po ngɛ e nɔ.”

⁵³ Kɛkɛ nɛ bitsɛ ɔ kai kaa jamɛ a be ɔ tutuutu nɛ Yesu de lɛ ke e ya, se e bi ɔ yi na wami ɔ nɛ. Lɔ ɔ he ɔ, e kɛ e we ɔ tsuo he Yesu ye.

⁵⁴ Enɛ ɔ ji okadi enyɔne nɛ Yesu pee benɛ e je Yudea kɛ ba Galilea a.