Yohane 21 - BAIBLO ALOO NGMAMI KLƆUKLƆU Ɔ

Yesu je e he kpo tsɔɔ e kaseli kpaago ngɛ Galilea

¹ Pee se ɔ, Yesu kpale je e he kpo tsɔɔ kaseli ɔmɛ ekohu ngɛ Tiberia wo ɔ nya. Bɔ nɛ e ba mi ha ji nɛ ɔ nɛ.

² Simon Petro, kɛ Toma nɛ a tsɛɛ lɛ Hayo hulɔ ɔ, Natanael nɛ je Kana ngɛ Galilea a, Zebedeo bimɛ ɔmɛ, kɛ kaseli ɔmɛ a ti ni kpahi enyɔ hu ya bua ngɛ he ko.

³ Kɛkɛ nɛ Simon Petro de mɛ ke, “I yaa wo.” A he nɔ ke, “Wɔ tsuo waa kɛ mo maa ya.” Kɛkɛ nɛ a ya sɛ lɛ mi, nɛ a pue nɔ kɛ ho. Se jamɛ a nyɔ ɔ mi tsuo ɔ, a gbi lo kake ngmelu po.

⁴ Makɛ benɛ je mi ngɛ tsɔe ɔ, Yesu ba da si ngɛ wo ɔ nya, se kaseli ɔmɛ yo we lɛ.

⁵ E bi mɛ ke, “Ye bimɛ, nyɛ ná nɔ́ ko lo?” A he nɔ ke, “Dɛbi, wa nɛ́ nɔ́ ko nɔ́ ko.”

⁶ Jehanɛ e de mɛ ke, “Nyɛɛ fɔ ya a ngɛ lɛ ɔ hiɔ nɔ, nɛ nyɛ maa gbe lo.” A fɔ ya a, nɛ lo nɛ a gbe ɔ hiɛ babauu, nɛ a nyɛ we nɛ a gbla ya a.

⁷ Kaselɔ nɛ Yesu suɔ lɛ ɔ de Petro ke, “Nyɔmtsɛ ɔ nɛ daa si ɔ nɛ.” Benɛ Simon Petro nu nɛ a de ke Nyɔmtsɛ ɔ lɛ daa si ɔ, e wo e tade ɔ ngɔ muɔ e mlɛ mi, nɛ e tu ma pa a mi, ejakaa e hɛɛ e he gu.

⁸ Kaseli kpa amɛ hlui lɛ ɔ, nɛ a kɛ gbla ya a nɛ lo hyi lɛ tɔ ɔ kɛ ba kpo, ejakaa a kɛ kpo he kɛmi maa pee gugue nyingmi enuɔ pɛ.

⁹ Benɛ a ba kple ɔ, a na kaa a ngɔ hã kɛ slɛ la ngɛ lejɛ ɔ, nɛ lo pueɔ si ngɛ nɔ, kɛ abolo hulɔ.

¹⁰ Yesu de mɛ ke, “Nyɛɛ ngɔ lo nɛ nyɛ gbe ɔ eko kɛ ba.”

¹¹ Lɔ ɔ he ɔ, Simon Petro kpale ya sɛ lɛ ɔ mi, nɛ e gbla ya a, kɛ e mi lo nguanguahi tɔ ɔ kɛ ba kpo. Lo ɔ tsuo yibɔ ji lafa kɛ nyingmi enuɔ kɛ etɛ.

¹² Jehanɛ ɔ, Yesu de mɛ ke, “Nyɛ ba wo nyɛ nya mi nɔ́ ko.” Kaseli ɔmɛ a ti nɔ ko nɔ ko nyɛ we nɛ e pee kã nɛ e bi lɛ ke, “Mɛnɔ ji mo?” Ejakaa a yo kaa Nyɔmtsɛ ɔ nɛ daa si ɔ nɛ.

¹³ Kɛkɛ nɛ Yesu ba kɛ̃ abolo ɔ, nɛ e ngɔ ha mɛ. Nɛ e ha mɛ lo ɔ hulɔ.

¹⁴ Enɛ ɔ ji si etɛ nɛ Yesu je e he kpo tsɔɔ kaseli ɔmɛ benɛ Mawu tle lɛ si kɛ je gbeje ɔ se.

Yesu kɛ Petro gba sane

¹⁵ Benɛ a ye ní ɔ gbe nya a, Yesu bi Simon Petro ke, “Simon, Yohane bi, anɛ o suɔ mi pe bɔ nɛ ni nɛ ɔmɛ suɔ mi lo?” Simon he nɔ ke, “Nyɔmtsɛ, o le kaa i suɔ mo!” Yesu de lɛ ke, “Lɛɛ ye to bi ɔmɛ.”

¹⁶ Yesu kpale bi lɛ si enyɔne ke, “Simon, Yohane bi, o suɔ mi lo?” Petro he nɔ ke, “Nyɔmtsɛ, o le kaa i suɔ mo!” Yesu de lɛ ke, “Hyɛ ye to ɔmɛ.”

¹⁷ Jehanɛ Yesu kpale bi lɛ nɔ́ nɛ ji si etɛ ke, “Simon, Yohane bi, o suɔ mi lo?” E dɔ Petro kaa Yesu bi lɛ si etɛ sɔuu ke e suɔ lɛ lo. Lɔ ɔ he ɔ, e he nɔ ke, “Nyɔmtsɛ, mo nitsɛ o le nɔ́ tsuaa nɔ́; mo nitsɛ o le kaa i suɔ mo!” Yesu de lɛ ke, “Lɛɛ ye to ɔmɛ.

¹⁸ I ngɛ mo dee anɔkuale mi ke o nihe mi ɔ, mo nitsɛ o miaa, nɛ o yaa he tsuaa he nɛ o suɔ. Se ke o ba bwɔ ɔ, o ma wo o nine nɔ, nɛ nɔ kpa maa mia mo; nɛ e kɛ mo maa ya he nɛ o sume kaa o maa ya.”

¹⁹ Yesu de enɛ ɔ kɛ tsɔɔ bɔ nɛ Petro ma gbo kɛ wo Mawu hɛ mi nyami. Jehanɛ e de Petro ke, “Nyɛɛ ye se.”

Yesu tu kaselɔ ɔ nɛ e suɔ ɔ he munyu

²⁰ Petro po e he, nɛ e na kaa kaselɔ kaketsɛ ɔ nɛ Nyɔmtsɛ ɔ suɔ ɔ ma ngɛ e se. Jamɛ a nɔ ɔ lɛ hi si ngɛ Yesu kasa nya be nɛ a ngɛ nyagbe ní ɔ yee ɔ nɛ. Lɛ nɛ bi Nyɔmtsɛ ɔ ke mɛnɔ maa tsɔɔ e se blɔ ɔ nɛ.

²¹ Benɛ Petro na lɛ ɔ, e bi Yesu ke, “Nyɔmtsɛ, nɔ nɛ ɔ lɛɛ nɛɛ?”

²² Yesu de lɛ ke, “Ke i suɔ kaa e hi si kɛ yaa su be nɛ ma kpale kɛ ba a, mɛni lɔ ɔ kɔɔ ngɛ o he? Moo lɛɛ nyɛɛ ye se!”

²³ Munyu nɛ ɔ ba pɛ ngɛ Yesu se nyɛɛli ɔmɛ a tue mi kaa kaselɔ nɛ ɔ be gboe gblegbleegble. Kpahu Yesu de we ke e be gboe; se mohu e ke, “Ke i suɔ kaa e hi si kɛ yaa si ma kpale kɛ ba a, mɛni lɔ ɔ kɔɔ ngɛ o he?”

²⁴ Jamɛ a kaselɔ ɔ nya mi munyu ji enɛ ɔmɛ tsuo. Lɛ nɔuu lɛ ngma ní nɛ ɔmɛ; nɛ wa le kaa nɔ nɛ e de ɔ ngɛ mi.

Nyagbe

²⁵ Yesu pee ní kpahi babauu, nɛ ke a ngma lɛ tsuo kakaaka a, womihi nɛ a ko ná a, e peeɔ mi kaa, a ko na we a to he ngɛ je ɔ mi.