Yohane 2 - BAIBLO ALOO NGMAMI KLƆUKLƆU Ɔ

A kpee yo ngɛ Kana

¹ E nɔ ligbi etɛ ɔ, a kpee yo ngɛ Galilea ma nɛ a tsɛɛ Kana a. Yesu nyɛ ya lejɛ ɔ;

² nɛ a fɔ Yesu kɛ e kaseli ɔmɛ hu nine kɛ ya yo kpeemi ɔ.

³ Be saii mi ɔ, wai nɛ a ngɛ nue ɔ ta; nɛ Yesu nyɛ ba e ngɔ ba de lɛ ke, “Ni ɔmɛ a wai ɔ ta.”

⁴ Se Yesu he nɔ ke, “Maa, mɛni he je o ngɛ ye nya dooe? Be nɛ ma tsu ní ɔ sui lolo.”

⁵ Jehanɛ ɔ Yesu nyɛ de tsɔli ɔmɛ ke, “Nɔ́ tsuaa nɔ́ nɛ e ma de nyɛ ɔ, nyɛɛ pee.”

⁶ Yuda bi a kusumi ji a fɔ a he nɛ a kɛ tsú a he. Enɛ ɔ he ɔ, didɔ ekpa maa si ngɛ lejɛ ɔ. Didɔ nɛ ɔmɛ ɔ, eko tsuaa eko yeɔ nyu lita lafa.

⁷ Yesu de tsɔli ɔmɛ ke, “Nyɛɛ wo didɔ ɔmɛ a mi nyu nɛ a hyi.” A pee jã.

⁸ Jehanɛ ɔ, e de tsɔli ɔmɛ ke, “Nyɛɛ yɛ eko ya ha nɔ nɛ ngɛ ní tsumi ɔ nɔ hyɛe ɔ.” A yɛ nyu

⁹ nɛ plɛ pee wai ɔ ya ha nɔ nɛ ngɛ ní tsumi ɔ nɔ hyɛe ɔ, nɛ e sa e nya. Tsɔli ɔmɛ nɛ wo didɔ ɔmɛ a mi nyu ɔ le he nɛ wai nɛ ɔ je; se ní tsumi ɔ nɔ hyɛlɔ ɔ lɛɛ e li. Lɔ ɔ he ɔ, e tsɛ ayɛflo huno ɔ,

¹⁰ nɛ e de lɛ ke, “Ke a tsɛ ní yemi ɔ, wai kpakpa a kɛ ba maa si kekle; nɛ ke ni ɔmɛ nu bɔ nɛ a ma nyɛ ɔ loko a kɛ nɔ́ nɛ ngɔɛ ɔ baa. Se moo lɛɛ o ngɔ wai kpakpa a ngɔ to kɛ ba su be nɛ ɔ.”

¹¹ Enɛ ɔ ji kekleekle nyakpɛ nɔ́ nɛ Yesu pee ngɛ Kana ngɛ Galilea kɛ to okadi kaa Mawu ha lɛ he wami; nɛ e kaseli ɔmɛ he lɛ ye.

¹² Lɔ ɔ se ɔ, Yesu kɛ e nyɛ, kɛ e nyɛmimɛ ɔmɛ, kɛ e kaseli ɔmɛ pue nɔ kɛ ho Kapernaum ya, nɛ a ya hi lejɛ ɔ be bɔɔ.

Yesu ya sɔlemi we ɔ

¹³ Benɛ Yuda bi ɔmɛ a Hetsɔmi nyami be ɔ su ɔ, Yesu ya Yerusalem.

¹⁴ E ya sɔlemi we ɔ, nɛ e ya na nihi babauu ngɛ lejɛ ɔ nɛ a ngɛ nahi, tohi, kɛ lahuɛhi juae. Ni komɛ hu hii si ngɛ a we okplɔɔhi a se ngɛ sika tsakee.

¹⁵ Kɛkɛ nɛ Yesu ngɔ tangme tsɔwi kɛ pee kpa, nɛ e fie jua yeli ɔmɛ, kɛ a to ɔmɛ, kɛ na amɛ tsuo kɛ je sɔlemi we ɔ. E tsitsɛɛ sika tsakeli ɔmɛ a we okplɔɔ ɔmɛ ngɔ fia si, nɛ e plɛ a sika amɛ ngɔ pue si.

¹⁶ Nihi nɛ ngɛ lahuɛhi juae ɔ, e de mɛ ke, “Nyɛ je ní nɛ ɔmɛ kɛ je hiɛ ɔ esɔ! Tsaatsɛ we ɔ, nyɛ ko ngɔ kɛ pee jua nɔ.”

¹⁷ E kaseli ɔmɛ kai kaa a ngma ke, “Ye hɛ dɔ wawɛɛ ngɛ o we ɔ he.”

¹⁸ Jehanɛ ɔ, Yuda bi ɔmɛ bi Yesu ke, “Mɛni okadi o maa to wɔ kɛ ma nɔ́ nɛ o pee nɛ ɔ nɔ mi?”

¹⁹ Yesu he nɔ ke, “Nyɛɛ ku sɔlemi we nɛ ɔ, nɛ ligbi etɛ se ɔ, ma ma lɛ ekohu.”

²⁰ A kpale de Yesu ke, “Sɔlemi we nɛ ɔ, jeha nyingmi eywiɛ kɛ ekpa loko a nyɛ ma; se moo lɛɛ o de ke ligbi etɛ o kɛ maa ma lɛ; o ma nyɛ?”

²¹ Se sɔlemi we nɛ Yesu ngɛ he munyu tue ɔ ji lɛ nitsɛ e nɔmlɔ tso. Lɔ ɔ he ɔ, benɛ a tle Yesu si kɛ je gbeje ɔ, e kaseli ɔmɛ kai kaa e wo nɔ́ nɛ ɔ nɔ ta de mɛ hyɛ,

²² nɛ a he ngmami ɔ, kɛ munyu nɛ Yesu kɛ mɛ tu ɔ tsuo ye.

Yesu le adesa su

²³ Yesu hi Yerusalem Hetsɔmi nyami be ɔ tsuo. E pee okadihi babauu, nɛ nihi tsuo nɛ na a, a he lɛ ye.

²⁴ Se Yesu lɛɛ e le mɛ tsuo pɛpɛɛpɛ, lɔ ɔ he ɔ, e kɛ e hɛ fɔɛ a nɔ.

²⁵ E hia we pohu nɛ nɔ ko nɛ ye nɔmlɔ adesa he odase kɛ tsɔɔ lɛ, ejakaa lɛ nitsɛ e le nɔmlɔ yi mi.