Yohane 17 - BAIBLO ALOO NGMAMI KLƆUKLƆU Ɔ

Yesu kpa pɛɛ ha e kaseli ɔmɛ

¹ Benɛ Yesu de ní nɛ ɔmɛ se ɔ, e wo hɛ nɔ kɛ hyɛ hiɔwe, nɛ e ke, “Tsaatsɛ, be ɔ su. Ha nɛ a wo o Bi ɔ hɛ mi nyami, konɛ Bi ɔ hu nɛ wo o hɛ mi nyami.

² Ejakaa o ha mi he wami nɛ ma ye adesahi tsuo a nɔ, konɛ nihi tsuo nɛ o tu ngɔ wo ye dɛ mi ɔ, ma ha nɛ a na neneene wami.

³ Ke a na le kaa mo ji anɔkuale Mawu ɔ, nɛ a le Yesu Kristo, nɔ nɛ o tsɔ ɔ, a ma na neneene wami.

⁴ I wo o hɛ mi nyami ngɛ je ɔ mi; ní tsumi nɛ o tu kɛ wo ye dɛ mi ɔ, i gbe nya.

⁵ Tsaatsɛ, ha nɛ ye hɛ mi nɛ ba nyami amlɔ nɛ ɔ kaa bɔ nɛ i ngɛ momo ngɛ o hɛ mi benɛ a na we nɛ a bɔ je ɔ.

⁶ “Nihi tsuo nɛ o hla kɛ je je ɔ mi nɛ o tu ngɔ wo ye dɛ mi ɔ, i ha nɛ a na o hɛ mi nyami ɔ. O nihi ji mɛ, nɛ o tu mɛ ngɔ wo ye dɛ mi. O munyu ɔ nɛ i kɛ ba ha mɛ ɔ, a ye nɔ.

⁷ Nɛ jehanɛ lɛɛ a le kaa níhi tsuo nɛ o ha mi ɔ je o ngɔ.

⁸ Sɛ gbi nɛ o ha mi ɔ, i kɛ ha mɛ nɛ a ngɔ, nɛ a le kaa niinɛ i je o ngɔ, nɛ mo nɛ o tsɔ mi.

⁹ “I kpa we pɛɛ ha je ɔ; mohu ni nɛmɛ nɛ o ha mi ɔ, mɛ i ngɛ pɛɛ kpae ha; ejakaa o nihi ji mɛ.

¹⁰ Nɔ́ tsuaa nɔ́ nɛ i ngɛ ɔ, o nɔ, nɛ nɔ́ tsuaa nɔ́ nɛ o ngɛ ɔ, imi hu ye nɔ; nɛ ní nɛ ɔmɛ tsuo woɔ o hɛ mi nyami.

¹¹ Amlɔ nɛ ɔ, i be je ɔ mi hu. Mɛɛ a ngɛ je ɔ mi, se imi lɛɛ i ma o ngɔ. Tsaatsɛ klɔuklɔu! Bu a he kɛ mo nitsɛ o he wami nɛ o ngɔ ha mi ɔ, konɛ a pee kake kaa bɔ nɛ i kɛ mo wa ngɛ ɔ.

¹² Benɛ i kɛ mɛ ngɛ ɔ, i bu a he kɛ he wami nɛ o ngɔ ha mi ɔ. A ti nɔ kake ngmelu hɛ mi kpataa we, lɛɛ ja nɔ nɛ a to kaa e hɛ mi nɛ kpata a, bɔ nɛ pee nɛ ngmami ɔ nɛ ba mi.

¹³ Jehanɛ ɔ, i ma o ngɔ, nɛ i ngɛ enɛ ɔ dee be mi nɛ i ngɛ je ɔ mi kɛ mwɔɔ, konɛ bua jɔmi nɛ i na a, mɛ hu a na.

¹⁴ I ngɔ o munyu ɔ ha mɛ; nɛ lɔ ɔ he ɔ, je ɔ ngɛ mɛ nyɛe. Ejakaa a kɛ je ɔ bɔɛ, kaa bɔ nɛ imi hu i kɛ mɛ bɔɛ ɔ.

¹⁵ I kpa we pɛɛ ke o je mɛ kɛ je je ɔ mi; se mohu i ngɛ pɛɛ kpae nɛ o bu a he kɛ je nɔ yayami ɔ dɛ mi.

¹⁶ Pi je ɔ mi bi ji mɛ kaa bɔ nɛ imi hu pi je ɔ mi nɛ i je ɔ.

¹⁷ Ngɔɔ o we anɔkuale munyu ɔ kɛ tsu a he.

¹⁸ Bɔ nɛ o tsɔ mi je ɔ mi ɔ, ja nɔuu imi hu i ngɛ mɛ tsɔe.

¹⁹ A he ɔ, i peeɔ ye he klɔuklɔu, bɔ nɛ pee nɛ mɛ hu a pee mɛ klɔuklɔu ngɛ anɔkuale mi.

²⁰ “Pi ni nɛ ɔmɛ kɛkɛ nɛ i ngɛ pɛɛ kpae ha, se mohu kɛ ha nihi tsuo nɛ maa nu sɛ gbi ɔ nɛ a maa fiɛ ɔ nɛ a ma he mi maa ye ɔ.

²¹ I ngɛ pɛɛ kpae nɛ mɛ tsuo a pee kake. Tsaatsɛ! Bɔ nɛ o ngɛ ye mi, nɛ i ngɛ o mi ɔ, mɛ hu a hi wa mi jã nɔuu. Pee mɛ kake, konɛ je ɔ nɛ he ye kaa mo nɛ o tsɔ mi.

²² O wo ye hɛ mi nyami, nɛ i ha mɛ hu a hɛ mi ba nyami ja nɔuu, konɛ a pee kake kaa bɔ nɛ i kɛ mo ngɛ ɔ.

²³ I ngɛ a mi, nɛ mo hu o ngɛ ye mi, konɛ a pee kake kɛ pi si; kɛkɛ ɔ, je ɔ maa na kaa mo nɛ o tsɔ mi; nɛ bɔ nɛ o suɔ mi ɔ, o suɔ mɛ hu ja nɔuu.

²⁴ “Tsaatsɛ! Nihi nɛ o tu ngɔ wo ye dɛ mi ɔ, he nɛ i ngɛ ɔ, i suɔ kaa mɛ hu a hi lejɛ ɔ, bɔ nɛ pee nɛ a na ye hɛ mi nyami ɔ. O ha ye hɛ mi ba nyami, ejakaa benɛ o na we nɛ o bɔ je ɔ tete po o suɔ mi.

²⁵ Tsaatsɛ nɛ peeɔ nɔ́ nɛ da! Je ɔ li mo, se imi lɛɛ i le mo; nɛ ye nyɛmimɛ nɛ ɔmɛ le kaa mo nɛ o tsɔ mi.

²⁶ I ha nɛ a le mo, nɛ ma ya nɔ ma pee jã, konɛ á suɔ mi kaa bɔ nɛ o suɔ mi ɔ, nɛ imi hu ma hi a mi.”