Yohane 16 - BAIBLO ALOO NGMAMI KLƆUKLƆU Ɔ

¹ “I ngɛ nyɛ ní nɛ ɔmɛ dee, bɔ nɛ pee nɛ nyɛ ko ngmɛɛ nyɛ hemi kɛ yemi ɔ he.

² A maa fie nyɛ kɛ je kpe he ɔmɛ, nɛ be maa ba nɛ ke nihi ngɛ nyɛ gbee ɔ, a ma susu kaa Mawu lɛ a ngɛ jae.

³ Nihi maa pee nyɛ ní nɛ ɔmɛ, ejakaa a li Tsɛ ɔ; nɛ a li imi hulɔ.

⁴ Se i ngɛ nyɛ ní nɛ ɔmɛ dee, konɛ ke be ɔ su ɔ, nyɛ kai kaa i wo nɔ ta de nyɛ. “Sisije ɔ, i de we nyɛ ní nɛ ɔmɛ, ejakaa i kɛ nyɛ ngɛ.

Bɔ nɛ Mumi Klɔuklɔu ɔ tsuɔ ní

⁵ Amlɔ nɛ ɔ lɛɛ i yaa nɔ nɛ tsɔ mi ɔ ngɔ, se nyɛ ti nɔ ko bi we mi he nɛ i yaa.

⁶ Se nɛ i de nyɛ ní nɛ ɔmɛ ɔ, nyɛ ngɛ tsui yee.

⁷ I ngɛ nyɛ dee anɔkuale mi ke e hi kɛ ha nyɛ mohu kaa ma je, ejakaa ke i ji ɔ, Hepiɛlɔ ɔ be nyɛ ngɔ bae. Ke i je ɔ lɛɛ ma wo lɛ blɔ kɛ ba nyɛ ngɔ.

⁸ Ke e ba a, e maa tsɔɔ je ɔ kaa bɔ nɛ a susuɔ ngɛ yayami, kɛ nɔ́ nɛ da, kɛ Mawu kojomi he ɔ dɛ.

⁹ A juɛmi ngɛ yayami he ɔ dɛ, ejakaa a he we mi yi;

¹⁰ nɛ a juɛmi ngɛ nɔ́ nɛ da he ɔ dɛ, ejakaa i yaa Tsaatsɛ ngɔ nɛ nyɛ be mi nae hu.

¹¹ Nɛ a juɛmi ngɛ Mawu kojomi he ɔ hu dɛ, ejakaa nɔ nɛ yeɔ je ɔ nɔ matsɛ ɔ, a bu lɛ fɔ momo.

¹² “I ngɛ níhi fuu nɛ piɛ nɛ ma de nyɛ, se nyɛ be nyɛe he maa pɛtɛ amlɔ nɛ ɔ.

¹³ Se ke Mumi ɔ nɛ haa a leɔ anɔkuale ɔ nɛ kɔɔ Mawu he ɔ ba a, e maa tsɔɔ nyɛ anɔkuale ɔ tsuo. Ejakaa Mumi ɔ be lɛ nitsɛ e yi mi toe kɛ de nɔ́ ko; mohu níhi nɛ e nu ɔ, a he munyu e maa tu; nɛ e ma de nyɛ níhi nɛ maa ba.

¹⁴ E maa wo ye hɛ mi nyami, ejakaa níhi nɛ i wo nɔ ta a, e maa tsɔɔ nyɛ.

¹⁵ Nɔ́ tsuaa nɔ́ nɛ Tsaatsɛ ngɛ ɔ, ye nɔ. Enɛ ɔ he nɛ i de nyɛ ke, nɔ́ tsuaa nɔ́ nɛ ma de Mumi ɔ, e maa tsɔɔ nyɛ ɔ nɛ.

Bua jɔmi maa ba ngɛ kɔmɔ yemi se

¹⁶ “E piɛ bɔɔ nɛ nyɛ be mi nae hu; kɛkɛ ɔ, bɔɔ se ɔ, nyɛ maa na mi ekohu.”

¹⁷ E kaseli ɔmɛ a ti ni komɛ bi a sibi ke, “Nɔ nɛ e de wɔ nɛ ɔ sisi nɛɛ? E ke e piɛ bɔɔ nɛ wa be lɛ nae hu; kɛkɛ ɔ, bɔɔ se ɔ, wa maa na lɛ ekohu. Jehanɛ hu e de ke wa be lɛ nae hu, ejakaa e yaa Tsɛ ɔ ngɔ.

¹⁸ ‘Be bɔɔ’ nɛ ɔ, kɛ ji e sisi kɛɛ? Nɔ́ nɛ e ngɛ dee ɔ, wa nui sisi!”

¹⁹ Yesu na kaa a ngɛ hlae nɛ a bi lɛ nɔ́ nɛ e de ɔ sisi, lɔ ɔ he ɔ, e de mɛ ke, “I ke, ‘E piɛ bɔɔ nɛ nyɛ be mi nae hu; kɛkɛ bɔɔ se ɔ, nyɛ maa na mi ekohu.’ Anɛ enɛ ɔ he munyu nyɛ ngɛ nyɛ he bie ɔ?

²⁰ I ngɛ nyɛ dee anɔkuale mi ke, nyɛɛ lɛɛ nyɛ ma kpa ngmlaa; nyɛ maa wo yana, se je ɔ ma nya. Nyɛ maa ye kɔmɔ, se nyɛ kɔmɔ yemi ɔ ma plɛ bua jɔmi.

²¹ Ke yo ngɛ kɔe nɛ e ma fɔ ɔ, e haoɔ, ejakaa e dengme gbomi be ɔ su; se ke e fɔ pɛ, dengme tsuo nɛ e gbo ɔ, e hɛ jeɔ nɔ; ejakaa e naa bua jɔmi kaa e fɔ bi kɛ wo je ɔ mi.

²² Jã nɔuu, nyɛ hu amlɔ nɛ ɔ, nyɛ ngɛ kɔmɔ yee, se ma na nyɛ ekohu. Nyɛ tsui maa nɔ nyɛ mi, nɛ nyɛ bua jɔmi ɔ, nɔ ko be hee ngɛ nyɛ dɛ.

²³ “Jamɛ a ligbi ɔ, e be hiae kaa nyɛ bi mi nɔ́ ko hu. I ngɛ nyɛ dee anɔkuale mi ke, nɔ́ tsuaa nɔ́ he pɛɛ nɛ nyɛ ma kpa Tsɛ ɔ ngɛ ye biɛ mi ɔ, e maa pee ha nyɛ.

²⁴ Kɛ ba si piɔ ɔ, nyɛ bi we nɔ́ ko hyɛ ngɛ ye biɛ mi. Nyɛ bi, nɛ a maa pee ha nyɛ; kɛkɛ ɔ, nyɛ ma na bua jɔmi babauu.

I ye je ɔ nɔ kunimi

²⁵ “Ní nɛ ɔmɛ tsuo ɔ, abɛ gbi mi i de nyɛ ngɛ. Se jehanɛ ɔ, be maa ba nɛ i be munyu tue ngɛ abɛ gbi mi hu. Mohu ma jaje Tsɛ ɔ he sanehi kpookpoo ha nyɛ.

²⁶ Jamɛ a ligbi ɔ, nyɛ nitsɛmɛ nyɛ ma kpa Tsɛ ɔ pɛɛ ngɛ ye biɛ mi. I de we ke ma kpa pɛɛ ha nyɛ,

²⁷ ejakaa Tsɛ ɔ nitsɛ ngɛ nyɛ he suɔmi. Tsɛ ɔ suɔ nyɛ, ejakaa nyɛ suɔ mi, nɛ nyɛ he ye kaa Mawu ngɔ nɛ i je kɛ ba.

²⁸ Niinɛ, i je Tsɛ ɔ ngɔ kɛ ba je ɔ mi, nɛ amlɔ nɛ ɔ, i ngɛ je ɔ mi jee kɛ yaa Tsɛ ɔ ngɔ.”

²⁹ Kɛkɛ nɛ e kaseli ɔmɛ de lɛ ke, “Jehanɛ ɔ lɛɛ o ngɛ munyu tue paa nɛ pi abɛ gbi mi hu.

³⁰ Amlɔ nɛ ɔ lɛɛ wa na kaa o le nɔ́ tsuaa nɔ́, nɛ e hia we nɛ nɔ ko nɛ bi mo sane ko. Jehanɛ lɛɛ wa he ye kaa Mawu ngɔ nɛ o je kɛ ba.”

³¹ Yesu bi mɛ ke, “Jehanɛ lɛɛ nyɛ he ye lo?

³² Be ma, nɛ e su ta; nyɛ tsuo nyɛ maa gbɛ fĩa. Nɔ tsuaa nɔ maa ya lɛ nitsɛ e we mi, nɛ e maa piɛ imi nɔ kake too. Se pohu pi imi nɔ kake nɛ maa piɛ, ejakaa i kɛ Tsɛ ɔ ngɛ.

³³ I de nyɛ ní nɛ ɔmɛ, konɛ nyɛɛ kɛ mi nɛ hi si, konɛ nyɛ na he jɔmi. Benɛ nyɛ ngɛ je ɔ mi ɔ, haomi maa ba nyɛ nɔ; se nyɛ tsui nɛ nɔ nyɛ mi, ejakaa i ye je ɔ nɔ kunimi.”