Yohane 15 - BAIBLO ALOO NGMAMI KLƆUKLƆU Ɔ

Yesu ji wai tso nitsɛ ɔ nɛ

¹ “Imi ji wai tso nitsɛ ɔ, nɛ Tsaatsɛ ji ngmɔtsɛ.

² Ye kɔni tsuaa kɔni nɛ wui yiblii ɔ, e poɔ; se nɔ́ nɛ woɔ yiblii ɔ, e sãã he, konɛ e he nɛ tsɔ, nɛ e wo yiblii pe kekle ɔ.

³ Nyɛɛ lɛɛ munyuhi nɛ i tu nyɛ ɔ tsu nyɛ he momo.

⁴ Nyɛɛ hi ye mi nɛ imi hu ma hi nyɛ mi. Kaa bɔ nɛ tso kɔni be nyɛe maa wo yiblii ngɛ lɛ nitsɛ e dɛ he, se ja e mɛtɛ wai tso ɔ he ɔ, jã kɛ̃ nyɛ hu ke nyɛ hi ye mi ɔ, nyɛ be yiblii woe.

⁵ “Imi ji wai tso ɔ, nɛ nyɛ ji kɔni ɔmɛ. Nɔ tsuaa nɔ nɛ hii ye mi, nɛ imi hu i hii e mi ɔ, e maa wo yiblii babauu, ejakaa ke ye he be mi ɔ, nyɛ be nɔ́ ko nɔ́ ko nyɛe ma tsu.

⁶ Nɔ tsuaa nɔ nɛ mɛtɛ we ye he ɔ, a sakee lɛ fɔɔ he kaa tso kɔni, nɛ e gbliɔ. Jamɛ a kɔni ɔmɛ ɔ, a buaa nya kɛ woɔ la mi nɛ a sãã.

⁷ Ke nyɛ mɛtɛ ye he, nɛ nyɛ he ye munyu ɔmɛ ye ɔ, nɔ́ tsuaa nɔ́ nɛ nyɛ suɔ ɔ, ke nyɛ bi ɔ, a ma ha nyɛ.

⁸ Yiblii babauu nɛ nyɛ woɔ ɔ, nyɛɛ kɛ woɔ Tsaatsɛ hɛ mi nyami, nɛ nyɛ peeɔ ye kaseli.

⁹ I suɔ nyɛ kaa bɔ nɛ Tsɛ ɔ suɔ mi ɔ, lɔ ɔ he ɔ, nyɛ ha suɔmi nɛ i ngɛ kɛ ha nyɛ ɔ nɛ hi si daa.

¹⁰ Ke nyɛ ye ye mlaa amɛ a nɔ ɔ, lɛɛ suɔmi nɛ i ngɛ kɛ ha nyɛ ɔ maa hi si daa. Imi hu i ye Tsaatsɛ mlaa amɛ a nɔ, lɔ ɔ ha nɛ suɔmi nɛ e ngɛ kɛ ha mi ɔ se pui gblegbleegble.

¹¹ “I de nyɛ ní nɛ ɔmɛ tsuo, konɛ kaa bɔ nɛ bua jɔmi ngɛ ye mi ɔ, nyɛ hu nyɛ na bua jɔmi babauu.

¹² Mlaa nɛ i ngɛ nyɛ woe ji nɛ ɔ nɛ: nyɛɛ suɔ nyɛ sibi kaa bɔ nɛ i suɔ nyɛ ɔ.

¹³ Suɔmi nɛ se be ji kaa nɔ ko maa ngɔ e wami ngɔ fɔ si ngɛ e huɛmɛ a he.

¹⁴ Ke nyɛ pee nɔ́ nɛ i de nyɛ ke nyɛɛ pee ɔ, lɔ ɔ lɛɛ ye huɛmɛ ji nyɛ.

¹⁵ Jehanɛ i tsɛ we nyɛ tsɔli hu, ejakaa tsɔlɔ li nɔ́ nɛ e nyɔmtsɛ tsuɔ. I tsɛɔ nyɛ ye huɛmɛ mohu, ejakaa níhi tsuo nɛ i nu kɛ je Tsaatsɛ nya a, i de nyɛ.

¹⁶ Pi nyɛ nɛ nyɛ hla mi. Imi mohu nɛ i hla nyɛ nɛ i tsɔ nyɛ, konɛ nyɛ ya wo yiblii nɛ maa hi si daa. Kɛkɛ ɔ, nɔ́ tsuaa nɔ́ nɛ nyɛ ma kpa he pɛɛ ngɛ ye biɛ mi ɔ, Tsɛ ɔ ma ha nyɛ.

¹⁷ Mlaa nɛ i ngɛ nyɛ woe ji nyɛɛ suɔ nyɛ sibi.

Je ɔ nyɛɔ Kristo se nyɛɛli

¹⁸ “Ke je ɔ ngɛ nyɛ nyɛe ɔ, nyɛ na nɛ nyɛɛ le kaa imi a nyɛ kekle.

¹⁹ Kaa je ɔ mi bi ji nyɛ ɔ, jinɛ a ko suɔ nyɛ sane saminya, ejakaa nyɛ piɛ a he. Se nyɛɛ lɛɛ i hla nyɛ kɛ je je ɔ mi, nɛ nyɛ pi je ɔ mi bi hu; lɔ ɔ he nɛ je ɔ ngɛ nyɛ nyɛe ɔ nɛ.

²⁰ Nyɛ kai kaa i de nyɛ momo ke, ‘Nyɔguɛ pã we e nyɔmtsɛ.’ Nɛ́ a wa mi yi mi ɔ, nyɛɛ lɛɛ kɛ a maa pee nyɛ kɛɛ? Ke a bu mi tue ɔ, nyɛ hu a maa bu nyɛ tue.

²¹ Ye he ɔ, a maa pee nyɛ ní nɛ ɔmɛ tsuo, ejakaa nɔ nɛ tsɔ mi ɔ, a li lɛ.

²² Kaa i bɛ nɛ i kɛ mɛ ba tu munyu ɔ, jinɛ a ko yi fɔ kaa a pee yayami. Se jehanɛ lɛɛ a be nya jemi ko kulaa ngɛ yayami nɛ a pee ɔ he.

²³ Nɔ tsuaa nɔ nɛ nyɛɔ mi ɔ, e nyɛɔ Tsaatsɛ hulɔ.

²⁴ Kaa i ba tsu we ní nguanguahi nɛ nɔ ko tsu we hyɛ ɔ ngɛ a kpɛti ɔ, jinɛ a ko yi fɔ kaa a pee yayami. Jehanɛ ɔ, i tsu ní nɛ ɔmɛ nɛ a na paa; se kɛ̃ ɔ, a ngɛ i kɛ Tsaatsɛ tsuo nyɛe.

²⁵ Lɔ ɔ he ɔ, e sa nɛ e ba jã, konɛ nɔ́ nɛ a ngma ngɛ a mlaa a mi ke, ‘A nyɛ mi yaka gu’ ɔ nɛ ba mi.

²⁶ “Se Hepiɛlɔ ɔ maa ba. Lɛ ji Mumi ɔ nɛ haa a leɔ anɔkuale nɛ kɔɔ Mawu he ɔ nɛ. Ma tsɔ lɛ kɛ je Tsɛ ɔ ngɔ kɛ ba nyɛ ngɔ, nɛ e ma ba ye ye he odase.

²⁷ Nyɛ hu nyɛ maa ye ye he odase, ejakaa i kɛ nyɛ hi si kɛ je sisije.