Yohane 14 - BAIBLO ALOO NGMAMI KLƆUKLƆU Ɔ

Yesu ji blɔ nɛ a kɛ yaa Tsɛ ɔ ngɔ

¹ Yesu de e kaseli ɔmɛ ke, “Nyɛ ko ye nyɛ tsui. Nyɛɛ lɛɛ nyɛ he Mawu nyɛɛ ye; nɛ imi hu nyɛ he mi nyɛɛ ye.

² Sihi hehi babauu ngɛ Tsaatsɛ we ɔ; ke pi ja a, jinɛ i de nyɛ momo, ejakaa i yaa nɛ ma ya dla he ko ngɔ to nyɛ.

³ Ke i ya nɛ i ya dla he ko kɛ to nyɛ se ɔ, ma kpale kɛ ba, nɛ ma ba ngɔ nyɛ kɛ ya hi imi nitsɛ ye ngɔ. Kɛkɛ ɔ, he nɛ i ngɛ ɔ, nyɛ hu nyɛɛ maa hi lejɛ ɔ.

⁴ Nyɛ le he nɛ i yaa, nɛ blɔ ɔ hu nyɛ le.”

⁵ Toma bi lɛ ke, “Nyɔmtsɛ, he nɛ o yaa a po wa li, nɛ kɛ wa maa pee kɛ le blɔ ɔ nɛ a kɛ yaa lejɛ ɔ kɛɛ?”

⁶ Yesu he nɔ ke, “Imi ji blɔ ɔ, imi ji anɔkuale ɔ, nɛ imi ji wami ɔ hulɔ. Nɔ ko nɔ ko yɛ Tsɛ ɔ ngɔ kaa ja e gu ye nɔ.

⁷ Kaa nyɛ le mi jinɛ nyɛ ko le Tsaatsɛ hulɔ. Kɛ je be nɛ ɔ mi kɛ yaa nɛ ɔ, nyɛ le lɛ, ejakaa nyɛ na lɛ.”

⁸ Filipo de lɛ ke, “Nyɔmtsɛ, tsɔɔ wɔ Tsɛ ɔ, kɛkɛ nɔ ko be wɔ hiae hu.”

⁹ Yesu he nɔ ke, “Filipo, be babauu nɛ i kɛ nyɛ hi si nɛ ɔ, kɛ pee kɛɛ nɛ o li mi ɔ? Nɔ tsuaa nɔ nɛ na mi ɔ, e na Tsɛ ɔ. Mɛni he je mɔ nɛ o deɔ ke ma tsɔɔ nyɛ Tsɛ ɔ?

¹⁰ Filipo, anɛ o he we yi kaa i ngɛ Tsɛ ɔ mi, nɛ Tsɛ ɔ ngɛ ye mi lo? Munyuhi nɛ i kɛ nyɛ tu ɔ, pi imi nitsɛ ye yi mi nɛ i to kɛ de. Mohu Tsɛ ɔ nɛ guu ye nɔ kɛ peeɔ ní nɛ ɔmɛ.

¹¹ Ke i de ke i ngɛ Tsɛ ɔ mi, nɛ Tsɛ ɔ ngɛ ye mi ɔ, nyɛ he ye munyu ɔ nyɛɛ ye. Ke nɔ́ nɛ i de ɔ nɛ nyɛ he we yi pohu ɔ, lɛɛ ní nɛ ɔmɛ nɛ i tsu ɔ a he ɔ, nyɛ he ye mɔ.

¹² I ngɛ nyɛ dee anɔkuale mi ke, nɔ tsuaa nɔ nɛ heɔ mi yeɔ ɔ, níhi nɛ i tsuɔ kɛ toɔ okadi ɔ, lɛ hu e ma tsu. Ee, e maa pee níhi nɛ pe enɛ ɔmɛ tete po, ejakaa i je kɛ yaa Tsaatsɛ ngɔ.

¹³ Ke nyɛ kpa nɔ́ ko he pɛɛ ngɛ ye biɛ mi ɔ, ma pee; kɛkɛ ɔ, kɛ gu Bi ɔ nɔ ɔ, a maa wo Tsɛ ɔ hɛ mi nyami.

¹⁴ Nɔ́ tsuaa nɔ́ nɛ nyɛ ma kpa he pɛɛ ngɛ ye biɛ mi ɔ, ma pee.

Yesu wo Mumi Klɔuklɔu ɔ he si

¹⁵ “Ke nyɛ suɔ mi ɔ, nyɛ maa ye ye mlaa amɛ a nɔ.

¹⁶ Kɛkɛ ɔ, ma kpa Tsɛ ɔ pɛɛ, nɛ e ma ha nyɛ Hepiɛlɔ kpa nɛ kɛ nyɛ maa hi si daa.

¹⁷ Lɛ ji anɔkuale mumi nɛ tsɔɔ nihi bɔ nɛ tutuutu nɛ Mawu ngɛ ɔ. Je mi bi ɔmɛ ngɔɛ lɛ, ejakaa a nɛ́ lɛ, nɛ a li lɛ hulɔ. Se nyɛɛ lɛ nyɛ le lɛ, ejakaa e kɛ nyɛ ngɛ, nɛ e ngɛ nyɛ mi.

¹⁸ “I be nyɛ sie awusa; ma kpale kɛ ba nyɛ ngɔ.

¹⁹ E piɛ bɔɔ pɛ nɛ je ɔ be mi nae hu; se nyɛɛ lɛɛ nyɛ maa na mi. Nɛ akɛnɛ i ngɛ wami mi ɔ, nyɛ hu nyɛ maa hi wami mi.

²⁰ Ke jamɛ a be ɔ su ɔ, nyɛ maa le kaa i ngɛ Tsaatsɛ mi, nɛ nyɛ hu nyɛ ngɛ ye mi kaa bɔ nɛ imi hu i ngɛ nyɛ mi ɔ.

²¹ “Nɔ tsuaa nɔ nɛ ngɔɔ ye mlaa amɛ nɛ e yeɔ a nɔ ɔ, e suɔ mi; nɛ nɔ tsuaa nɔ nɛ suɔ mi ɔ, Tsaatsɛ maa suɔ lɛ. Jehanɛ imi hu ma suɔ lɛ, nɛ ma ha nɛ e le mi saminya.”

²² Yuda (pi Yuda Iskariot) bi lɛ ke, “Nyɔmtsɛ, kɛ pee kɛɛ nɛ wɔ pɛ nɛ o ma ha nɛ waa le mo, se pi je ɔ tsuo ɔ?”

²³ Yesu he nɔ ke, “Ke nɔ ko suɔ mi ɔ, e maa ye ye munyu ɔmɛ a nɔ. Kɛkɛ ɔ, Tsaatsɛ maa suɔ lɛ, nɛ wa maa ba e ngɔ, nɛ waa kɛ lɛ ma ba hi si.

²⁴ Nɔ nɛ sume mi ɔ, e yi ye munyu ɔmɛ a nɔ. Munyuhi nɛ nyɛ nu ngɛ ye nya a, pi imi nitsɛ ye yi mi tomi, se mohu Tsɛ ɔ nɛ tsɔ mi ɔ lɛ ha mi sɛ gbi ɔ.

²⁵ “I de nyɛ ní nɛ ɔmɛ be mi nɛ i kɛ nyɛ ngɛ kɛ mwɔɔ ɔ.

²⁶ Tsɛ ɔ maa wo Mumi Klɔuklɔu ɔ blɔ kɛ ba nyɛ ngɔ. Hepiɛlɔ nɛ ɔ maa ba ngɛ ye biɛ mi, nɛ nɔ́ tsuaa nɔ́ nɛ hia kaa nyɛɛ le ɔ, e maa tsɔɔ nyɛ; nɛ nihi tsuo nɛ i de nyɛ ɔ, e ma kai nyɛ.

²⁷ “I ngɛ nyɛ sie kɛ he jɔmi. Imi nitsɛ ye he jɔmi i ngɛ sie ha nyɛ. Pi bɔ nɛ je ɔ haa a nɛ i kɛ ngɛ nyɛ hae ɔ. Nyɛ ko ye nyɛ tsui; nɛ nyɛ ko je fɔ̃ hulɔ.

²⁸ I de nyɛ momo ke, ‘I yaa, se ma kpale kɛ ba nyɛ ngɔ.’ Nyɛ nu! Kaa nyɛ suɔ mi ɔ, jinɛ nyɛ ko na bua jɔmi kaa i yaa Tsɛ ɔ ngɔ, ejakaa e pe mi.

²⁹ I ngɛ nyɛ ní nɛ ɔmɛ dee ngɔ to loko a ba mi, bɔ nɛ pee nɛ ke a ba mi ɔ, nyɛ he ye.

³⁰ I kɛ nyɛ be munyu tue be kɛkɛ hu, ejakaa nɔ nɛ yeɔ je nɛ ɔ nɔ matsɛ ɔ ma. E be he wami ko ngɛ imi ye nɔ;

³¹ se e sa kaa je ɔ tsuo nɛ le kaa i suɔ Tsɛ ɔ, lɔ ɔ he ɔ, nɔ́ tsuaa nɔ́ nɛ e fa a, i peeɔ. “Nyɛɛ te nɛ waa je hiɛmɛ nɛ ɔ!