Yohane 13 - BAIBLO ALOO NGMAMI KLƆUKLƆU Ɔ

Yesu fɔ e kaseli ɔmɛ a nane he

¹ Benɛ e piɛ ligbi kake loko a maa ye Hetsɔmi nyami ɔ, Yesu na kaa jehanɛ lɛɛ be ɔ su nɛ e ma si je ɔ mi kɛ ho Tsɛ ɔ ngɔ ya. Yesu suɔ nihi tsuo nɛ he lɛ ye ngɛ je ɔ mi ɔ saminya kɛ ya si e gbenɔ mi po.

² Gbɔkuɛ, benɛ Yesu kɛ e kaseli ɔmɛ ba bua kɛ ngɛ ní yee ɔ, jamɛ a be ɔ, Abosiami wo Simon Iskariot bi Yuda yi mi momo kaa e tsɔɔ Yesu se blɔ.

³ Yesu nitsɛ le kaa Tsɛ ɔ ha lɛ he wami tsuo nɛ e kɛ pee nɔ́ tsuaa nɔ́. E le hu kaa Mawu ngɔ nɛ e je kɛ ba, nɛ Mawu ngɔ nɔuu e kpale kɛ yaa.

⁴ Kɛkɛ nɛ Yesu te si ngɛ niye ní ɔ he; nɛ e je e tade klɔii ɔ ngɔ fɔ si, nɛ e ngɔ papahu kɛ muɔ e mlɛ mi.

⁵ Jehanɛ e plɛ nyu ngɔ wo tsɛ̃si mi, nɛ e bɔni kaseli ɔmɛ a nane he fɔmi; nɛ e kɛ papahu nɛ e kɛ muɔ e mlɛ mi ɔ tsu a nane ɔ he.

⁶ Benɛ e ba su Simon Petro ngɔ ɔ, Simon bi lɛ ke, “Nyɔmtsɛ, mo lɛ o ma fɔ ye nane he ɔ?”

⁷ Yesu he nɔ ke, “Nɔ nɛ i ngɛ pee nɛ ɔ, amlɔ nɛ ɔ, o nui sisi; se pee se ɔ, o ma ba le.”

⁸ Petro de lɛ ke, “Dɛbi, ko fɔ ye nane he kɔkɔɔkɔ.” Yesu he nɔ ke, “Ke i fɔ we o nane he ɔ lɛɛ o pi ye kaselɔ hu.”

⁹ Simon Petro he nɔ ke, “Nyɔmtsɛ, lɛɛ tsa pi ye nane he kɛkɛ nɛ sa kaa o fɔ mɔ; fɔ ye nine he, kɛ ye yi mi tsuo.”

¹⁰ Yesu he nɔ ke, “Nɔ tsuaa nɔ nɛ du e he ɔ, e he tsɔ kɛ pi si momo; nɛ e hia we kaa e fɔ lɛ nɔmlɔ tso ɔ he pe e nane he pɛ. Nyɛ he tsɔ, se pi nyɛ tsuo.”

¹¹ Yesu le nɔmlɔ nɛ maa tsɔɔ e se blɔ ɔ momo, lɔ ɔ he nɛ e de ke a he tsɔ se pi mɛ tsuo ɔ nɛ.

¹² Benɛ Yesu fɔ a nane he ta a, e kpale wo e tade klɔii ɔ, nɛ e ya hi si ngɛ niye ní ɔ he. Jehanɛ e bi kaseli ɔmɛ ke, “Nɔ́ nɛ i pee ha nyɛ piɔ ɔ, nyɛ nu sisi lɛɛ?

¹³ Tse nyɛ tsɛɔ mi Tsɔɔlɔ, nɛ nyɛ tsɛɔ mi Nyɔmtsɛ hulɔ! Saminya, e ngɛ mi jã.

¹⁴ Jehanɛ ɔ, imi nyɛ Nyɔmtsɛ, kɛ nyɛ Tsɔɔlɔ ɔ, ke i fɔ nyɛ nane he ɔ, e sa kaa nyɛ hu nyɛ fɔ nyɛ sibi a nane he.

¹⁵ Imi lɛɛ i pee enɛ ɔ nɛ nyɛɛ hyɛ, nɛ nyɛ hu nyɛ pee ha nyɛ sibi.

¹⁶ I ngɛ nyɛ dee anɔkuale mi ke nyɔguɛ pã we e nyɔmtsɛ, nɛ tsɔlɔ hu pã we nɔ nɛ tsɔ lɛ ɔ.

¹⁷ Amlɔ nɛ ɔ nɛ nyɛ na le anɔkuale ɔ, ke nyɛ tsu e nya ní ɔ, a gbaa nyɛ!

¹⁸ “Pi nyɛ tsuo nyɛ he nɛ i ngɛ enɛ ɔ dee; ejakaa nihi nɛ i hla a, i le bɔ nɛ a ngɛ. Se e sa kaa ngmami ɔ nɛ deɔ ke, ‘Nɔmlɔ nɛ kɛ mi dla ye abolo ɔ te si ngɔ si mi,’ ɔ nɛ ba mi.

¹⁹ Nɔ́ nɛ maa ba a, i ngɛ nyɛ dee loko e ba mi, konɛ ke e ba mi ɔ, nyɛ he ye kaa ‘Imi ji nɔ nɛ i ji ɔ nɛ.’

²⁰ I ngɛ nyɛ dee anɔkuale mi ke, nɔ tsuaa nɔ nɛ heɔ nɔ nɛ i tsɔ lɛ atuu ɔ, imi nɔuu e he ɔ nɛ; nɛ nɔ tsuaa nɔ nɛ heɔ mi ɔ, nɔ nɛ tsɔ mi ɔ e he ɔ nɛ.”

Yesu de to ke a maa tsɔɔ e se blɔ

²¹ Benɛ Yesu de ní nɛ ɔmɛ ɔ, e hao wawɛɛ ngɛ mumi mi; nɛ e gba mi kpoo nɛ e de ke, “I ngɛ nyɛ dee anɔkuale mi ke, nyɛ ti nɔ kake maa tsɔɔ ye se blɔ.”

²² E kaseli ɔmɛ pee yaa, nɛ a hyɛ a sibi a hɛ mi dii; ejakaa nɔ nɛ tutuutu he munyu nɛ e ngɛ tue ɔ, a li.

²³ E kaseli ɔmɛ a ti nɔ kake, nɔ nɛ Yesu suɔ lɛ ɔ, hii si ngɛ e kasa nya.

²⁴ Simon Petro ma lɛ hɛngmɛ ke e bi Yesu nɔ nɛ he munyu nɛ e ngɛ tue ɔ.

²⁵ Lɔ ɔ he ɔ, jamɛ a kaselɔ ɔ hɛ lɛ kɛ su Yesu he haa, nɛ e bi lɛ ke, “Nyɔmtsɛ, mɛnɔ?”

²⁶ Yesu he nɔ ke, “Ma ngɔ abolo kɛ sɔ flɔɔ ɔ mi; nɛ nɔ nɛ dɛ mi nɛ ma ngɔ wo ɔ, lɛ ji jamɛatsɛ ɔ nɛ.” Kɛkɛ nɛ e kɛ̃ abolo popoe, nɛ e ngɔ sɔ flɔɔ ɔ mi; nɛ e kɛ ha Yuda, Simon Iskariot bi ɔ.

²⁷ Amlɔ nɔuu nɛ Yuda sɔle abolo ɔ, Abosiami sɛ e mi. Yesu de lɛ ke, “Nɔ nɛ o ngɛ pee ɔ, pee esɔ.”

²⁸ Se ni nɛmɛ nɛ hii si ngɛ okplɔɔ ɔ he ɔ, a ti nɔ ko nɔ ko li nɔ́ nɛ he nɛ Yesu de lɛ enɛ ɔ.

²⁹ Akɛnɛ Yuda nɛ hɛɛɔ sika kpɛɛ ɔ, kaseli ɔmɛ ekomɛ susu kaa alini Yesu tsɔ lɛ ke e ya he ní nɛ hia nɛ a kɛ maa ye nyami be ɔ, aloo e ngɔ nɔ́ ko ya ha ohiatsɛmɛ.

³⁰ Yuda sɔle abolo popoe ɔ, nɛ e je kpo amlɔ nɔuu. Jamɛ a be ɔ, je jɔ.

Mlaa he ɔ

³¹ Benɛ Yuda je kpo se ɔ, Yesu de ke, “Jehanɛ ɔ, a wo Nɔmlɔ Bi ɔ hɛ mi nyami; nɛ a gu e nɔ kɛ wo Mawu hɛ mi nyami.

³² Nɛ ke a gu Nɔmlɔ Bi ɔ nɔ kɛ wo Mawu hɛ mi nyami ɔ, Mawu nitsɛ hu maa wo Nɔmlɔ Bi ɔ hɛ mi nyami. E ma tsu nɔ́ nɛ ɔ amlɔ nɔuu.

³³ Ye bimɛ, be nɛ i kɛ nyɛ maa hi si kɛ yaa si ɔ pi saasaa. Nyɛ ma hla mi, se kaa bɔ nɛ i de Yuda ma nimeli ɔmɛ ɔ, ‘He nɛ i yaa a, nyɛ be nyɛe maa ba.’

³⁴ Jehanɛ ɔ, mlaa he i ngɛ nyɛ woe; nyɛɛ suɔ nyɛ sibi kaa bɔ nɛ i suɔ nyɛ ɔ.

³⁵ Ke nyɛ suɔ nyɛ sibi ɔ, kɛkɛ nɔ tsuaa nɔ maa le kaa ye kaseli ji nyɛ.”

Yesu de to ke Petro ma de ke e li lɛ

³⁶ Simon Petro bi lɛ ke, “Nyɔmtsɛ, jije po o yaa?” Yesu he nɔ ke, “He nɛ i yaa a, amlɔ nɛ ɔ lɛɛ o be ye se nyɛe maa nyɛɛ; se pee se ɔ, o ma ba nyɛɛ ye se.”

³⁷ Petro de lɛ ke, “Nyɔmtsɛ, mɛni ma ha nɛ i be nyɛe ma nyɛɛ o se amlɔ nɛ ɔ? Gbenɔ tete po ma gbo ngɛ o he.”

³⁸ Yesu he nɔ ke, “Ei! O ma gbo ngɛ imi ye he? I ngɛ mo dee anɔkuale mi ke, loko kungwɔ ma kpa nɔ hwɔɔ ɔ, o ma de si etɛ ke o li mi.”