Yohane 11 - BAIBLO ALOO NGMAMI KLƆUKLƆU Ɔ

Lazaro gbenɔ

¹ Nyumu ko hi Betania, Maria kɛ Marta a ma a mi. Nyumu nɛ ɔ, a tsɛɛ lɛ Lazaro. Be ko ɔ, Lazaro ba nu hiɔ.

² Lazaro nɛ ɔ, Maria nɛ ngɔ nu kɛ e he via kɛ pɔ Nyɔmtsɛ ɔ nane, nɛ e kɛ e yi bwɔmi tsu ɔ nyɛminyumu ji lɛ.

³ Lɔ ɔ he ɔ, nyɛmiyi ɔmɛ kɛ sɛ mane Yesu ke, “Nyɔmtsɛ, o huɛ nɛ o suɔ lɛ ɔ ngɛ gboe.”

⁴ Benɛ Yesu nu kaa Lazaro ngɛ gboe ɔ, e de ke, “Hiɔ nɛ ɔ be Lazaro gbee, se mohu a maa gu enɛ ɔ nɔ kɛ wo Mawu hɛ mi nyami; nɛ enɛ ɔ nɔuu a kɛ maa wo Mawu Bi ɔ hɛ mi nyami.”

⁵ Yesu suɔ Marta kɛ e nyɛmiyo ɔ, kɛ Lazaro saminya.

⁶ Se benɛ e nu Lazaro hiɔ he ɔ, e kpale ye ligbi enyɔ sɔuu ngɛ he nɛ e ngɛ ɔ.

⁷ Kɛkɛ nɛ e de e kaseli ɔmɛ ke, “Nyɛ ha waa kpale wa se kɛ ho Yudea ya.”

⁸ Kaseli ɔmɛ he nɔ ke, “Tsɔɔlɔ, pi lingmi pɛ nɛ Yuda bi ɔmɛ ka mo tɛ fiami, nɛ o yaa lejɛ ɔ ekohu?”

⁹ Yesu he nɔ ke, “Anɛ pi ngmlɛfia nyɔngma kɛ enyɔ nɛ peeɔ ligbi kake? Ke nɔ ko nyɛɛ piani ɔ, e tɛ we si, mɛni he je ɔ, e naa je nɛ ɔ mi la a.

¹⁰ Se ke nɔ ko nyɛɛ nyɔ mi ɔ, e tɛɔ si, ejakaa la be.”

¹¹ Yesu de kɛ gbe nya ke, “Wa huɛ Lazaro hwɔ mahe, se i yaa nɛ ma ya tsɛ̃ɛ̃ lɛ.”

¹² Kaseli ɔmɛ he nɔ ke, “Nyɔmtsɛ, ke mahe e ngɛ hwɔe ɔ, lɛɛ e maa hi ha lɛ.”

¹³ Yesu ngɛ tsɔɔe kaa Lazaro gbo momo, se mɛɛ lɛɛ a susu kaa mahe nitsɛ nɛ e ke Lazaro ngɛ hwɔe.

¹⁴ Lɔ ɔ he ɔ, Yesu de mɛ kpoo ke, “Lazaro gbo,

¹⁵ se e ngɔ ye nya kaa i be lejɛ ɔ, bɔ nɛ pee nɛ nyɛ he ye. Nyɛ ha waa ya e ngɔ.”

¹⁶ Toma nɛ a tsɛɛ lɛ Hayo hulɔ ɔ, de e nyɛmimɛ kaseli ɔmɛ ke, “Nyɛ ha wɔ hu waa kɛ Tsɔɔlɔ ɔ nɛ ya, nɛ waa kɛ lɛ ya gbo.”

Yesu ji si temi ɔ kɛ wami ɔ

¹⁷ Benɛ Yesu ba su Betania a, e na kaa Lazaro ye ligbi eywiɛ momo ngɛ yɔkɔ ɔ mi.

¹⁸ Betania kɛ Yerusalem a kpɛti kɛmi maa pee kaa si tomi enyɔ;

¹⁹ lɔ ɔ he ɔ, Yuda bi babauu ba Marta kɛ Maria a ngɔ, konɛ a ba ye mɛ kɔmɔ ngɛ a nyɛminyumu ɔ gbenɔ ɔ he.

²⁰ Benɛ Marta nu kaa Yesu ma a, e je kpo nɛ e kɛ lɛ ya kpe, se Maria lɛɛ e hii si ngɛ we ɔ mi.

²¹ Marta de Yesu ke, “Nyɔmtsɛ, kaa o ngɛ hiɛ ɔ jinɛ ye nyɛminyumu ɔ ko gbo we.

²² Se amlɔ nɛ ɔ hu, i le kaa nɔ́ tsuaa nɔ́ he pɛɛ nɛ o ma kpa Mawu ɔ, e maa pee ha mo.”

²³ Yesu de lɛ ke, “O nyɛminyumu ɔ maa te si kɛ ba wami mi ekohu.”

²⁴ Marta he nɔ ke, “I le kaa nyagbe ligbi ɔ nɛ ni gbogboehi maa te si ɔ, e maa te si kɛ ba wami mi.”

²⁵ Yesu de lɛ ke, “Imi ji si temi ɔ, kɛ wami ɔ nɛ. Nɔ tsuaa nɔ nɛ heɔ mi yeɔ ɔ, ke e gbo tete po, e maa hi hɛ ngmengmle;

²⁶ nɛ nɔ tsuaa nɔ nɛ hɛ ngɛ, nɛ e heɔ mi yeɔ ɔ, e be gboe gblegbleegble. O heɔ enɛ ɔ yeɔ lo?”

²⁷ Marta he nɔ ke, “Ee Nyɔmtsɛ, i heɔ yeɔ kaa mo ji Kristo ɔ nɛ! Mo ji Mawu Bi ɔ nɛ ma je ɔ mi ɔ nɛ.”

Yesu fo ya

²⁸ Benɛ Marta de enɛ ɔ, e kpale e se kɛ ho nɛ e ya tsɛ e nyɛmiyo Maria zaa. E de lɛ ke, “Tsɔɔlɔ ɔ ba, nɛ e ngɛ o si bie.”

²⁹ Benɛ Maria nu enɛ ɔ, e te si pam, nɛ e je kpo esɔ, nɛ e kɛ Yesu ya kpe.

³⁰ Yesu na we nɛ e su kɔpe ɔ mi lolo; mohu ɔ, he nɛ Marta kɛ lɛ ya kpe ngɛ ɔ, lejɛ ɔ nɔuu nɛ e ngɛ kɛ mwɔɔ.

³¹ Yuda bi ɔmɛ nɛ kɛ Maria ngɛ we ɔ mi, nɛ a ngɛ lɛ kɔmɔ yee ɔ na bɔ nɛ e te si nɛ e sá e he kɛ je kpo, nɛ a nyɛɛ e se. A susu kaa e yaa yɔkɔ ɔ he nɛ e ya fo ya ngɛ lejɛ ɔ.

³² Maria ya su he nɛ Yesu ngɛ ɔ, nɛ amlɔ nɔuu nɛ e na Yesu ɔ, e kpla si ngɛ Yesu nane nya, nɛ e de lɛ ke, “Nyɔmtsɛ, kaa o ngɛ hiɛ ɔ jinɛ ye nyɛminyumu ɔ ko gbo we.”

³³ Yesu na kaa Maria ngɛ ya foe; nɛ jehanɛ ɔ, bɔ nɛ Yuda bi ɔmɛ nɛ piɛ Maria he ɔ hu ngɛ ya foe ɔ ha Yesu hao ngɛ mumi mi.

³⁴ E bi mɛ ke, “Jije nyɛ to lɛ ngɛ?” A he nɔ ke, “Nyɔmtsɛ, ba nɛ o ba hyɛ.”

³⁵ Yesu fo ya.

³⁶ Kɛkɛ nɛ Yuda bi ɔmɛ de ke, “Hyɛ bɔ nɛ e suɔ lɛ ha!”

³⁷ Se ni komɛ de ke, “Pi lɛ nɛ e bli hɛ yuyuilɔ ɔ hɛngmɛ ɔ! Anɛ e ko nyɛ we nɛ e pee nɛ Lazaro kó gbo we lo?”

Yesu tle Lazaro si kɛ ba wami mi ekohu

³⁸ Yesu hao ngɛ mumi mi ekohu, nɛ e pue nɔ kɛ ho yɔkɔ ɔ he ya. Tɛ puɔ nɛ a ngɔ tɛ kɛ tsi nya ji yɔkɔ ɔ.

³⁹ Yesu fa mɛ ke, “Nyɛ je tɛ ɔ.” Marta, nyumu ɔ nɛ gbo ɔ nyɛmiyo ɔ he nɔ ke, “Nyɔmtsɛ, be nɛ ɔ mi ɔ, nɔ ɔ puɛ, ejakaa ligbi eywiɛ sɔuu ji nɛ ɔ nɛ e gbo.”

⁴⁰ Yesu de lɛ ke, “Anɛ i de we mo ke, ke o he ye ɔ, o maa na Mawu hɛ mi nyami ɔ lo?”

⁴¹ Jehanɛ a je tɛ ɔ; kɛkɛ nɛ Yesu wo e hɛ nɔ nɛ e hyɛ hiɔwe, nɛ e de ke, “Tsaatsɛ, i naa mo si kaa o buɔ mi tue.

⁴² I le kaa o buɔ mi tue be tsuaa be; se i ngɛ enɛ ɔ dee ngɛ nihi nɛ pueɔ si nɛ ɔ a he, bɔ nɛ pee nɛ a he ye kaa mo nɛ o tsɔ mi.”

⁴³ Benɛ e de enɛ ɔ se ɔ, e tsɛ lɛ kɛ gbi wawɛɛ ke, “Lazaro lee-ee, jee kpo!”

⁴⁴ Kɛkɛ nɛ gbogboe ɔ je kpo. Bo nɛ a kɛ pu lɛ ɔ blaa e nine kɛ e nane, nɛ duku fi e hɛ mi. Yesu de mɛ ke, “Nyɛɛ pɛne lɛ nɛ nyɛ ha e ya.”

A so Yesu yi nɔ

⁴⁵ Yuda bi ɔmɛ nɛ ba Maria ngɔ ɔ, a ti nihi babauu na nɔ nɛ Yesu pee ɔ, nɛ a he lɛ ye.

⁴⁶ Se a ti ni komɛ pue nɔ kɛ ho nɛ a ya sɛɛ níhi nɛ Yesu pee ɔ ha Farisi bi ɔmɛ.

⁴⁷ Lɔ ɔ he ɔ, osɔfo nikɔtɔma amɛ, kɛ Farisi bi ɔmɛ tsɛ kpe ngua a mi bi ɔmɛ kɛ kpe, nɛ a de ke, “Kɛ wa maa pee kɛɛ? Nyɛɛ hyɛ níhi tsuo nɛ nyumu nɛ ɔ ngɛ pee kɛ ngɛ okadi toe.

⁴⁸ Ke wa ngmɛ lɛ blɔ nɛ e ya nɔ ngɛ ní nɛ ɔmɛ pee ɔ, ma a tsuo ma he lɛ maa ye. Kɛkɛ ɔ, Roma bi ɔmɛ maa ba ba kpata wa sɔlemi we ɔ, kɛ wa ma a tsuo hɛ mi.”

⁴⁹ A ti nɔ kake nɛ a tsɛɛ lɛ Kayafa, nɛ ngɛ osɔfo nɔkɔtɔma pe kulaa yee jamɛ a jeha a de ke, “Nyɛ biɛ pɛ!

⁵⁰ Anɛ nyɛ li kaa ke nyɛ ha nɔ kake mohu gbo ngɛ ma a tsuo nane mi ɔ, e hi pe nɛ a ma kpata ma a tsuo hɛ mi lo?”

⁵¹ Se anɔkuale mi ɔ, pi lɛ nitsɛ e yi mi nɛ e to kɛ de enɛ ɔ. Mohu ɔ, akɛnɛ lɛ nɛ ngɛ osɔfo nɔkɔtɔma pe kulaa yee jamɛ a jeha a nɛ e ngɛ gbae kaa Yesu ma gbo ngɛ Yuda bi ɔmɛ a nane mi.

⁵² Pohu pi ma a nane mi kɛkɛ, se e ma bua Mawu bimɛ tsuo nɛ gbɛ fĩa hu a nya kɛ pee kake.

⁵³ Kɛ je jamɛ a ligbi ɔ kɛ yaa a, Yuda ma nimeli ɔmɛ so kaa a maa gbe Yesu.

⁵⁴ Lɔ ɔ he ɔ, Yesu nyɛɛ we ngɛ Yuda bi ɔmɛ a kpɛti nɛ a na lɛ paa hu. Se e je kɛ ho nga a nɔ ya, nɛ e kɛ e kaseli ɔmɛ ya hi ma ko nɛ a tsɛɛ Efraim ɔ.

⁵⁵ Jehanɛ ɔ, Hetsɔmi nyami be ɔ su ta; lɔ ɔ he ɔ, nihi babauu nɛ je ngmɔ si ɔ pue nɔ kɛ ho Yerusalem ya. Kusumi nɛ a peeɔ kɛ tsukɔɔ a he ɔ, a ya konɛ a ya pee loko nyami be ɔ nɛ su.

⁵⁶ Ni ɔmɛ bɔni Yesu hlami, lɔ ɔ he ɔ, benɛ a ya bua a he nya ngɛ sɔlemi we ɔ, a bi a he ke, “Anɛ e maa ba Hetsɔmi nyami ɔ, loo e be bae?”

⁵⁷ Osɔfo nikɔtɔma amɛ, kɛ Farisi bi ɔmɛ ya wo ma a si kaa nɔ tsuaa nɔ nɛ le he nɛ Yesu ngɛ ɔ, e ba wo a tue nɔ, konɛ a ya nu lɛ.