Yohane 1 - BAIBLO ALOO NGMAMI KLƆUKLƆU Ɔ

Munyu nɛ haa nɔ wami

¹ Loko nɔ́ tsuaa nɔ́ je sisi ɔ, Munyu ɔ ngɛ momo. Munyu ɔ kɛ Mawu nɛ ngɛ, nɛ Munyu ji ɔ Mawu ngɛ.

² Munyu ɔ kɛ Mawu kɛ je sisije, nɛ

³ Munyu ɔ nɔ Mawu gu kɛ pee nɔ́ tsuaa nɔ́. Níhi tsuo nɛ a pee ɔ, a si we Munyu ɔ se kɛ pee ekoeko.

⁴ Wami ngɛ Munyu ɔ mi, nɛ wami nɛ ɔ ngɔ la ba ha nimli adesahi.

⁵ La a ngɛ tsoe ngɛ diblii mi, se diblii ɔ nyɛ we lɛ nɛ e gbe gblegbleegble.

⁶ Mawu tsɔ nɔ ko kɛ ba je ɔ mi. A tsɛɛ lɛ Yohane.

⁷ E ba nɛ e ba ye la a he odase ha nimli adesahi, konɛ mɛ tsuo a he ye.

⁸ Yohane ɔ, pi lɛ ji la a; mohu e ba ye la a he odase.

⁹ La nɛ ɔ ji la nɛ tsoɔ haa nimli adesahi tsuo.

¹⁰ Munyu ɔ ngɛ je ɔ mi, nɛ e nɔ Mawu gu kɛ bɔ je ɔ, se mohu je ɔ yo we lɛ.

¹¹ E ba lɛ nitsɛ e ma mi, se e ma mi bi ɔmɛ he we lɛ.

¹² Se nihi tsuo nɛ he lɛ atuu, nɛ a he lɛ ye ɔ, e ha mɛ blɔ nya kaa a ba pee Mawu bimɛ.

¹³ A pee mɛ Mawu bimɛ, pi ngɛ he lo nya kaa nyumu fɔɔ bi aloo nɔmlɔ adesa suɔmi nya; Mawu mi a je kɛ fɔ mɛ.

¹⁴ Munyu ɔ ba plɛ adesa, nɛ e kɛ wɔ hi si. Dloomi kɛ anɔkuale hyi lɛ babauu. Wa na lɛ, nɛ a wo e hɛ mi nyami kaa lɛ pɛ ji Tsɛ ɔ Bi.

¹⁵ Yohane ye e he odase. E kɛ ngmlaa de ke, “Nɔmlɔ nɛ ɔ he munyu nɛ i tu ke, ‘Nɔ ko ma ngɛ ye se; se e pã mi, ejakaa e ngɛ loko i ngɛ’ ɔ nɛ.”

¹⁶ E mi mi hi kɛ be nɔ, lɔ ɔ he ɔ, e ha wa ti nɔ tsuaa nɔ dloomi nɔtonɔto.

¹⁷ Mawu ha wɔ mlaa kɛ gu Mose nɔ, se dloomi kɛ anɔkuale gu Yesu Kristo nɔ kɛ ba.

¹⁸ Mawu ɔ, nɔ ko nɛ lɛ hyɛ. E bi kake too ɔ nɛ hii si ngɛ Tsɛ ɔ hiɔ nɔ ɔ, lɛ nɛ e tsɔɔ wɔ bɔ nɛ Tsɛ ɔ ngɛ ha.

Yohane nɔ sɔlelɔ ɔ fiɛ

¹⁹ Yuda ma nimeli ɔmɛ nɛ ngɛ Yerusalem ɔ tsɔ osɔfo komɛ, kɛ Levi bi komɛ Yohane ngɔ. A ba bi lɛ ke, “Mɛnɔ ji mo?”

²⁰ Yohane laa we nɔ́ ko nɔ, se e gba mi paa ke, “Tsa pi imi ji Kristo ɔ.”

²¹ A bi lɛ ke, “Mɛnɔ ji mo mɔ? Eliya lo?” Yohane he nɔ ke, “Tsa pi imi ji Eliya.” A bi lɛ ekohu ke, “Mo ji gbalɔ ɔ lo?” Yohane he nɔ ke, “Dɛbi!”

²² Jehanɛ ɔ, a kpale bi lɛ ke, “Lɛɛ mɛnɔ ji mo mɔ? Tsɔɔ wɔ koo! Ejakaa nihi nɛ tsɔ wɔ ɔ, e hia kaa wa ya ha mɛ heto. Kɛ o deɔ ngɛ mo nitsɛ o he kɛɛ?”

²³ Yohane he nɔ ke, “Imi ji nɔ nɛ ngɛ fiɛe ngɛ nga a nɔ ke, ‘Nyɛ dla blɔ ngɔ to Nyɔmtsɛ ɔ,’ kaa bɔ nɛ gbalɔ Yesaya de ɔ nɛ.”

²⁴ Nihi nɛ Farisi bi ɔmɛ tsɔ kɛ ba a

²⁵ kpale bi lɛ ke, “Ke pi mo ji Kristo ɔ, pi Eliya ji mo, nɛ pi mo ji gbalɔ ɔ hulɔ ɔ, lɛɛ mɛni he nɛ o ngɛ nihi sɔlee mɔ?”

²⁶ Yohane he nɔ ke, “Imi lɛɛ nyu i kɛ ngɛ nyɛ sɔlee; se nɔ ko daa si ngɛ nyɛ kpɛti ngɛ hiɛmɛ nɛ ɔ nɛ nyɛ li lɛ.

²⁷ I sɛ e hlami kɛ ba mohu, se i sɛ nɔ nɛ pɛneɔ e tokota nya kpa tete po.”

²⁸ A pee ní nɛ ɔmɛ tsuo ngɛ Betania, ngɛ Yordan pa a beleku je, he nɛ Yohane ngɛ nihi sɔlee ngɛ ɔ.

Mawu To Bi ɔ

²⁹ E nɔ jena a, Yohane na Yesu nɛ ma e ngɔ. Kɛkɛ nɛ e de ke, “Hyɛ, Mawu To Bi ɔ nɛ woɔ je ɔ he yayami kɛ yaa a, lɛ ji nɛ ɔ nɛ.

³⁰ Nɔmlɔ nɛ ɔ he nɛ i de ngɛ ke, ‘Nɔ ko ma ngɛ ye se, se e pe mi, ejakaa e ngɛ loko i ngɛ’ ɔ nɛ.

³¹ Imi nitsɛ i li lɛ, se i kɛ nyu ba ngɛ nihi sɔlee, bɔ nɛ pee nɛ Israel ma a nɛ le lɛ.”

³² Jehanɛ ɔ, Yohane tu munyu kɛ ye Yesu he odase ke, “I na Mumi ɔ nɛ kple si kɛ je hiɔwe kaa lahuɛ ba ma e nɔ.

³³ Imi hu jinɛ i li lɛ, se Mawu, nɔ nɛ tsɔ mi ke ma ba sɔle nihi ngɛ nyu mi ɔ lɛ de mi ke, ‘Nɔ nɛ nɔ nɛ Mumi ɔ ma ba ma a, lɛ ji nɔ nɛ maa ngɔ Mumi Klɔuklɔu ɔ kɛ sɔle nihi.’

³⁴ Nɔ́ nɛ ɔ ba mi jã pɛpɛɛpɛ nɛ i na, lɔ ɔ he nɛ i ngɛ odase yee ke Yesu ji Mawu Bi ɔ nɛ.”

Yesu tsɛ kekleekle kaseli

³⁵ E nɔ jena benɛ Yohane kɛ e kaseli ɔmɛ a ti ni enyɔ daa si ekohu ɔ,

³⁶ e na Yesu nɛ bee. Kɛkɛ nɛ Yohane de ke, “Ne Mawu To Bi ɔ!”

³⁷ Amlɔ nɔuu nɛ kaseli enyɔ ɔmɛ nu munyu nɛ ɔ, a ya nyɛɛ Yesu se kɛ yaa.

³⁸ Benɛ Yesu plɛ e he, nɛ e na kaa kaseli ɔmɛ nyɛɛ e se ɔ, e bi mɛ ke, “Mɛni nyɛ ngɛ hlae?” A he nɔ ke, “Tsɔɔlɔ, jije o hii?”

³⁹ Yesu he nɔ ke, “Nyɛɛ ba nɛ nyɛ ba hyɛ.” (Jamɛ a be ɔ, a fia gbɔkuɛ ngmlɛ eywiɛ). Kɛkɛ nɛ a kɛ lɛ pue nɔ kɛ ho, nɛ a ya na e hi he ɔ; nɛ a kɛ lɛ hi si kɛ ya si du bu.

⁴⁰ Kaseli enyɔ ɔmɛ a ti nɔ kake biɛ ji Andrea, Simon Petro nyɛmi ɔ.

⁴¹ E kɛ we kulaa nɛ Andrea kɛ e nyɛmi Simon ba kpe. Andrea de Simon ke, “Wa na Mesia a.” (Mesia sisi ji Kristo).

⁴² Kɛkɛ nɛ e ngɔ Simon kɛ ya Yesu ngɔ. Yesu hyɛ Simon too, nɛ e de lɛ ke, “Tse mo ji Yohane bi Simon ɔ. Jehanɛ lɛɛ a ma tsɛ mo Kefa.” (E sisi ji Petro, loo tɛ sa.)

Yesu tsɛ Filipo kɛ Natanael

⁴³ E nɔ jena a, Yesu to e yi mi kaa e maa ya Galilea. Kɛkɛ nɛ e kɛ Filipo kpe, nɛ e de lɛ ke, “Filipo, nyɛɛ ye se.”

⁴⁴ Filipo je Betsaida, ma mi he nɛ Andrea kɛ Petro hu je ɔ.

⁴⁵ Benɛ Filipo hu kɛ Natanael ya kpe ɔ, Filipo de lɛ ke, “Natanael, hyɛ, nɔmlɔ ɔ nɛ Mose ngma e he sane ngɛ mlaa womi ɔ mi, nɛ gbali ɔmɛ hu tu e he munyu ɔ, wa na lɛ. Lɛ ji Yosef bi Yesu nɛ je Nazaret ɔ.”

⁴⁶ Se Natanael bi Filipo ke, “Anɛ nɔ́ kpakpa ko maa je Nazaret lo?” Filipo he nɔ ke, “Ba nɛ o ba hyɛ!”

⁴⁷ Benɛ Yesu na Natanael nɛ ma e ngɔ ɔ, e de ke, “Israel no ngmingmiingmi ji nɛ ɔ nɛ; sé ko be e he.”

⁴⁸ Natanael bi Yesu ke, “Jije o le mi ngɛ?” Yesu he nɔ ke, “I na mo pi mwɔnɛ; i na mo ngɛ ngmɔkɔ tso ɔ sisi tɔɔ loko Filipo tsɛ mo.”

⁴⁹ Natanael kpale he nɔ ke, “Tsɔɔlɔ, niinɛ, mo ji Mawu Bi ɔ! Mo ji Israel matsɛ ɔ nɛ!”

⁵⁰ Jehanɛ ɔ, Yesu bi Natanael ke, “Akɛnɛ i de mo ke i na mo ngɛ ngmɔkɔ tso ɔ sisi ɔ, lɔ ɔ he nɛ o he ye ɔ? O maa na ní nguahi nɛ pe enɛ ɔ.”

⁵¹ Nyagbe ɔ, e de mɛ ke, “I ngɛ nyɛ dee anɔkuale mi ke hiɔwe nya ma bli, nɛ nyɛ maa na Mawu bɔfo ɔmɛ nɛ a ngɛ kuɔe kɛ ngɛ imi Nɔmlɔ Bi ɔ ye ngɔ bae, nɛ a ngɛ kpalee kɛ ngɛ yae.”