Yoel 3 - BAIBLO ALOO NGMAMI KLƆUKLƆU Ɔ

Mawu maa kojo je ma amɛ

¹ Yawɛ ke, “Jamɛ a be ɔ mi ɔ, ma ha Yuda ma a kɛ Yerusalem bi ɔmɛ ma na ní kpɔtɔɔ ekohu.

² Ma bua je ma amɛ tsuo a nya, nɛ i kɛ mɛ maa ba Kojomi kɔ̃ ɔ mi. Ma kojo mɛ ngɛ lejɛ ɔ, ngɛ níhi tsuo nɛ a pee ye ma a he. A gbɛ Israel bi ɔmɛ kɛ fĩa zugba kpahi a nɔ; nɛ a gbá Israel, ye zugba a mi.

³ A fɔ sɔ kɛ dla nyɔguɛhi nɛ a nuu ngɛ ta mi ɔ ngɔ ha a he. A kɛ nyumuwi ɔmɛ tsake yaholi, nɛ a jua yiwi ɔmɛ kɛ he wai nɛ a nu.

⁴ “Tiro, Sidon, kɛ Filistia zugba a tsuo, mɛni nyɛ ngɛ hlae kaa nyɛ maa pee mi nɛ ɔ? Nyɛ ngɛ hlae nɛ nyɛɛ ye nyɛ he lue lo? Ke ja ji sane ɔ, lɛɛ ma ha nyɛ nitsɛmɛ nyɛ yayami ɔ ma kpa bu nyɛ nɔ esɔ.

⁵ Nyɛ muɔ ye sika tsu, ye sika hiɔ, kɛ ye juetli kpakpa amɛ kɛ ya wo nyɛ jami he ɔmɛ.

⁶ Nyɛ ngɔ Yuda kɛ Yerusalem bi ɔmɛ kɛ je a zugba nɔ kɛ ho ma se lokoo ya, nɛ nyɛ jua mɛ ngɔ ha Hela bi.

⁷ Jehanɛ lɛɛ ma kpaka mɛ kɛ je he tsuaa he nɛ nyɛ jua mɛ kɛ ho ɔ kɛ ba ekohu. Bɔ nɛ nyɛ pee mɛ ɔ, ja ma pee nyɛ ɔ nɛ.

⁸ Ma ha a maa jua nyɛ binyumu ɔmɛ, kɛ nyɛ biyi ɔmɛ kɛ ha Yuda bi ɔmɛ; nɛ mɛ hu a ma ya jua mɛ kɛ ha Sabea bi ɔmɛ ngɛ ma se tsitsaa. Imi, Yawɛ lɛ i de.

⁹ “Nyɛɛ fiɛ kɛ ha je ma amɛ ke, ‘Nyɛ dla nyɛ he kɛ ha ta; nyɛ tsɛ nyɛ ta buli ɔmɛ kɛ ba; nyɛ bua nyɛ ta buli ɔmɛ a nya, nɛ nyɛɛ hia ta.

¹⁰ Nyɛɛ ngɔ nyɛ kpakplaa amɛ kɛ sɔ klaatehi; nɛ nyɛɛ ngɔ nyɛ tso he suami ha amɛ kɛ sɔ akplɔhi. Nɔ nɛ he wɛ po nɛ e de ke, “Ta hwulɔ ji mi.”

¹¹ Nyɛ je ma amɛ tsuo nɛ nyɛ pueɔ si ɔ, nyɛɛ ba mlamlaamla nɛ nyɛ ba bua nyɛ he nya ngɛ kɔ̃ ɔ mi.’ ” Yawɛ lee, ha nɛ o tabo ɔ nɛ ba ba tua mɛ.

¹² “Je ma amɛ, nyɛ he nɛ sɔ, nɛ nyɛɛ ba Kojomi kɔ̃ ɔ mi. Lejɛ ɔ nɛ imi, Yawɛ nitsɛ, ma ba kojo je ma amɛ tsuo nɛ pueɔ si ɔ ngɛ.

¹³ Yiwutsotsɛmɛ ji mɛ; poo mɛ ngɔ pue si kaa bɔ nɛ a pooɔ blɛfo tsohi pueɔ si ngɛ ní kpami be mi ɔ; ngaa a mi kaa bɔ nɛ a ngaa wai yiblii mi ngɛ wai ngami he kɛ ya siɔ e hyiɔ muɔ ɔ, nɛ e pueɔ si ɔ.”

¹⁴ A ya bua a he nya babauu, akpeakpe abɔ ngɛ Kojomi kɔ̃ ɔ mi. E be kɛe kulaa nɛ Yawɛ ligbi ɔ ma ba na mɛ ngɛ lejɛ ɔ.

¹⁵ Pu kɛ nyɔhiɔ maa wo diblii, nɛ dodoe ɔmɛ be kpɛe hu.

Mawu maa gbaa e ma a

¹⁶ Yawɛ wo gbi kɛ je Zion yo ɔ nɔ; e gbi ɔ ké kɛ je Yerusalem. Kɛkɛ nɛ hiɔwe kɛ zugba mimiɛ. se Yawɛ ji wesa he kɛ ha e ma Israel ɔ.

¹⁷ “Israel, jamɛ a be ɔ mi nɛ o ma na maa le kaa imi ji Yawɛ, o Mawu ɔ nɛ. I hii Zion yo klɔuklɔu ɔ nɔ. Yerusalem maa pee ma klɔuklɔu; nibwɔhi be nyɛe ma ba tua ma a gblegbleegble hu.

¹⁸ “Jamɛ a be ɔ mi ɔ, yoku ɔmɛ a nɔ ma hyi kɛ wai nɛ ngɔɔ, nɛ na nyɔ nyu maa pɔ he ngɛ yoku ɔmɛ tsuo a nɔ. Yuda pa amɛ tsuo ma hyi tɔ. Nyu hɛngmɛ maa hia kɛ je Yawɛ we ɔ mi, nɛ nyu ɔ ma ya pue Akasia kɔ̃ ɔ mi.

¹⁹ “Egipt ma plɛ pee nga kplanaa, nɛ Edom hu maa pee ma doku. Ejakaa a ya tua Yuda zugba a, nɛ a gbe ma a mi bi ɔmɛ yaka be mi nɛ a pee we yayami ko.

^20-21 Ma ye ni ɔmɛ nɛ a gbe yaka a a he lue; i be blɔ ngmɛe nɛ nɔ tɔli nɛ ɔmɛ nɛ a ye a he. Jehanɛ, nimli maa hi Yuda kɛ Yerusalem daa kɛ daa; nɛ Imi, Yawɛ nitsɛ ma hi Zion yo ɔ nɔ.”