Yoel 1 - BAIBLO ALOO NGMAMI KLƆUKLƆU Ɔ

¹ Yawɛ sɛ gbi nɛ e kɛ ha Petuel binyumu Yoel, ji nɛ ɔ nɛ.

Ma a ye kɔmɔ ngɛ ngmɔ ní nɛ hɛ mi kpata a he

² Nyɛ ma nimeli, nyɛɛ bu tue; nyɛ Yuda ma a tsuo, nyɛ ta tue. Anɛ nɔ́ ko kaa kikɛ nɛ ɔ ba hyɛ ngɛ nyɛ yi nɔ, aloo ngɛ nyɛ nɛmɛ a yi nɔ lo?

³ Nyɛɛ sɛɛ ha nyɛ bimɛ. Nyɛ bimɛ nɛ a sɛɛ ha a bimɛ, konɛ nyɛ bimɛ a bimɛ hu nɛ a sɛɛ ha yi nɔ nɛ maa nyɛɛ a se ɔ.

⁴ Baalɛ kuuhi babauu ba, ba puɛ ngmɔ niba ní tsuo: Kekleekle kuu ɔ ba poo ní, nɛ a kpe. Enyɔne ɔ ba kpe niba ní nɛ piɛ ɔ. Etɛne ɔ ba kpe kakaaka nɛ piɛ ngɛ se ɔ. Nyagbe kuu ɔ ba ye niba ní nɛ piɛ ngɛ sisi ɔ tsuo.

⁵ Nyɛ dã deli, nyɛ hɛ nɛ tsɛ, nɛ nyɛɛ wo yana; nyɛ wai dɔkɔdɔkɔ nuli, nyɛ nya awe; ejakaa a je nɔ́ ngɛ nyɛ nya mi.

⁶ Baalɛ babauu ba tua zugba a; a ngɛ kaa ta buli pɛ; a he wa, nɛ a he hiɛ; a lungu nya ba kaa jata ku lungu, nɛ a so hu ngɛ kaa jata yo so.

⁷ A kpata wa wai tso ɔmɛ a hɛ mi, nɛ a kpe wa ngmɔkɔ tso ɔmɛ. A kpe toto ɔ ngɛ tso ɔmɛ a he kɛ ya si tso kɔni ɔmɛ a he pee futaa.

⁸ Nyɛ nya awe kaa bɔ nɛ yomiyo nyɛɛ ya kɛ haa nyumu nɛ na we nɛ e kpee lɛ loko e gbo ɔ.

⁹ Niye ní kɛ wai nɛ a kɛ ba sãã bɔɔ se po ngɛ Yawɛ we ɔ mi; lɔ ɔ he ɔ, osɔfo ɔmɛ nɛ sɔmɔɔ ngɛ Yawɛ we ɔ ngɛ kɔmɔ yee.

¹⁰ Ngmɔ ɔmɛ a hɛ mi kpata; zugba a pee mɔbɔmɔbɔ kaa nɔ́ nɛ kɔmɔ e ngɛ yee; ejakaa blɛfo ɔ hɛ mi kpata; wai tso ɔmɛ gbli, nɛ oliv tso ɔmɛ ylɔ.

¹¹ Nyɛ ngmɔ huli, nyɛɛ ye kɔmɔ; nyɛ nihi nɛ nyɛ hyɛɛ wai ngmɔhi a nɔ, nyɛ nya awe; ejakaa ngma, akoko, kɛ ngmɔ nɔ ní tsuo hɛ mi kpata.

¹² Wai tso ɔmɛ, ngmɔkɔ tso ɔmɛ, kɛ tã amɛ ylɔ; nɛ tso kpa amɛ tsuo gbli, nɛ a gbo. Ma a bua jɔmi ɔ se po.

¹³ Nyɛ osɔfohi nɛ nyɛ sɔmɔɔ ngɛ bɔ sami la tɛ ɔ he, nyɛɛ ha kpekpe ya bo, nɛ nyɛɛ wo yana! Nyɛɛ ya Mawu we ɔ mi, nɛ nyɛ ya ye kɔmɔ nyɔnyɔɔnyɔ tsuo. Ejakaa niye ní be ɔ, wai hu be nɛ nyɛɛ kɛ maa sã bɔ ha nyɛ Mawu ɔ.

¹⁴ Nyɛɛ wo mlaa nɛ ma a tsuo nɛ ha hwɔ; nɛ a ba bua a he nya. Nyɛ bua Yuda ma nimeli ɔmɛ, kɛ ma a tsuo a nya ngɛ Yawɛ, nyɛ Mawu ɔ we ɔ nɛ nyɛɛ fa kue ha lɛ.

¹⁵ Yawɛ ligbi ɔ su ta; ligbi nɛ Ope ɔ ma kpata wa hɛ mi ɔ su. E maa pee gbeye jamɛ a ligbi ɔ!

¹⁶ Pi wa niba ní nɛ wa ngɛ hyɛe nɛ hɛ mi ngɛ kpatae nɛ ɔ? Bua jɔmi, kɛ nyami se po ngɛ wa Mawu ɔ we ɔ.

¹⁷ Níhi nɛ a du ɔ tsuo gbo ngɛ zu mi. A na we ngma a eko kulaa nɛ a kɛ maa to. Lɔ ɔ he ɔ, blɛfo gba amɛ a mi je gu, nɛ a ku kɛ pueɔ si.

¹⁸ Hyɛ bɔ nɛ we mi lohwehi ngɛ kɛmɛe ha! Na amɛ hao, ejakaa a nɛ nga nɛ a kpe; to ɔmɛ hu ngɛ nɔ́ nae jã kɛ̃.

¹⁹ Yawɛ, i ngɛ kue fae kɛ ngɛ mo tsɛe; ejakaa la sã tso ɔmɛ tsuo ngɛ nga a nɔ. La kpata lohwe lɛmi he ɔmɛ tsuo a hɛ mi ngɛ nya nɔ!

²⁰ Nga mi lohwe ɔmɛ po ngɛ ngmlaa kpae kɛ ngɛ mo tsɛe; ejakaa pa amɛ tsuo gbli, nɛ la hu kpata lohwe lɛmi he ɔmɛ a hɛ mi ngɛ nga a nɔ.