Yesaya 9 - BAIBLO ALOO NGMAMI KLƆUKLƆU Ɔ

¹ He ko he ko be nɛ a maa gu kɛ je haomi nɛ ɔ mi. Zebulun kɛ Naftali wɛtso ɔmɛ a zugba nɛ be ko mi a pue e hɛ mi si ɔ, hwɔɔ se ɔ, a maa wo e hɛ mi nyami ngɛ zugba nɛ ɔmɛ tsuo a nɔ: kɛ je Mediterenia wo ɔ beleku je kɛ yaa su Yordan pa a se, kɛ yaa su Galilea nitsɛ, he nɛ nibwɔhi hii ɔ.

Matsɛ nɛ ma hwɔɔ se ɔ

² Ma nɛ hi diblii kpii mi ɔ na la kpetekpleenyɛ ko. A hi zugba ko nɛ nɔ wo diblii kpii nɔ, se jehanɛ lɛɛ la ngɛ kpɛe ha mɛ.

³ Yawɛ, o ha nɛ ma a bɔ, nɛ o ha mɛ bua jɔmi babauu. A ngɛ nyae ngɛ o hɛ mi kaa nihi nɛ ngɛ ngmɔ ní kpae, loo nihi nɛ ngɛ ta yibu ní dlae ha a he.

⁴ Ejakaa lohwe kuɛpã tso nɛ jiɔ kaa tlomi ngɛ a nɔ, kɛ to tsɔ̃mi tso nɛ a kɛ fiaa a konɔ kɛ wa mɛ yi mi ɔ, o ku a mi kaa bɔ nɛ blema a o pee Midian bi ɔmɛ ɔ.

⁵ Ta buli nɛ ma wɔ tuami ɔ, a tokota amɛ, kɛ a tade ɔmɛ nɛ muɔ sɛ mi ɔ, a kɛ la maa sã lɛ tsuo, kaa lɛ́ ngɛ la mi.

⁶ Ejakaa a fɔ bi ha wɔ! A ha wɔ binyumuyo! Lɛ nɛ e ma ba ye wa nɔ. A ma tsɛ lɛ ke, “Nyakpɛ ga wolɔ,” “Mawu he walɔ,” “Tsɛ nɛ ngɛ kɛ yaa neneene,” “Ganɔ nɛ yi nɔ jɔ.”

⁷ E nɔ yemi ɔ ma he si, nɛ e maa bɔ; ma a ma na tue mi jɔmi daa, ejakaa e maa ye tsɛ kaa Matsɛ David nitsɛ se yelɔ. E maa pee kpakpa, nɛ e maa ye dami sane, kɛ maa je be nɛ ɔ mi kɛ yaa su je mi nyagbe. Yawɛ Tabohiatsɛ ɔ kɛ hɛdɔ ma tsu ní nɛ ɔmɛ tsuo.

Yawɛ maa gbla Israel tue

⁸ Nyɔmtsɛ ɔ bu Yakob nina, Israel ma a fɔ.

⁹ Israel bi tsuo nɛ ngɛ Samaria ma a mi ɔ, a ti nɔ tsuaa nɔ ma na maa le kaa lɛ nɛ e tsu nɔ́ nɛ ɔ nɛ. Amlɔ nɛ ɔ lɛɛ, a ngɛ a he nɔ woe; a ngɛ pupuupu pee. A ngɛ dee ke,

¹⁰ “Bliikisi we ɔmɛ ku pue si; wɔɔ lɛɛ wa maa ngɔ tɛ nɛ a kó kɛ maa ma ekohu. A poo sikamore tsohi ngɔ pueɔ si; se wɔɔ lɛɛ waa kɛ seda tso kpakpahi ma tsake mɛ.”

¹¹ Enɛ ɔ he je ɔ, Yawɛ sú a he nyɛli ɔmɛ kɛ wo mɛ.

¹² Siria ngɛ beleku je, nɛ Filistia ngɛ bonyoku je. A pa a nya mi hatoo, konɛ a mii Israel. Enɛ ɔ tsuo se ɔ, Yawɛ mi mi fumi ɔ se be poe kɛ yaa si e ma kpata a hɛ mi pɛsɛpɛsɛ.

¹³ Israel bi ɔmɛ kpale we kɛ bɛ Yawɛ Tabohiatsɛ ɔ ngɔ. E ngɛ mi kaa e gbla a tue bɔ nɛ sa lɛɛ,

¹⁴ lɔ ɔ he ɔ, ligbi kake too ɔ, Yawɛ gbla Israel ma a tue. E po mɛ ngɔ hɛɛ fɔ, yi kɛ hlemi tsuo.

¹⁵ Nikɔtɔmahi, kɛ nihi nɛ a buu mɛ ji yi ɔ nɛ; nɛ lakpa gbali ɔmɛ ji hlemi ɔ nɛ.

¹⁶ Nihi nɛ nyɛɛ ma a hɛ mi ɔ ha ma a laa blɔ, nɛ a pee basaa.

¹⁷ Lɔ ɔ he ɔ, Nyɔmtsɛ ɔ na we nihewi ɔmɛ a he bua jɔmi. Yalɔyi ɔmɛ, kɛ awusa amɛ hu e mɛ nɛ mɔbɔ; ejakaa ni ɔmɛ tsuo li Mawu; a pee a he yiwutsotsɛmɛ, nɛ munyu yaya pɛ a tuɔ. Enɛ ɔ tsuo he ɔ, Yawɛ mi mi fumi ɔ se be poe kɛ yaa si e ma kpata a hɛ mi pɛsɛpɛsɛ.

¹⁸ Ma a yi wu tso ní peemi ɔ nya wa kaa la nɛ ngɛ mio tso hue, kɛ miohi sãe. E ngɛ tsoe kaa hue nɛ ngɛ sãe, nɛ la su ku ngɛ jee titiiti kɛ yaa hiɔwe.

¹⁹ Akɛnɛ Yawɛ Tabohiatsɛ ɔ mi mi fu he je ɔ, e tue gblami ɔ nya wa kaa la nɛ ngɛ nimli tsuo a hɛ mi kpatae ngɛ zugba a nɔ. Nɔ tsuaa nɔ ngɛ lɛ nitsɛ e wami he plee.

²⁰ O maa na nɛ nihi ngɛ ní gblɔe hiɔ kɛ muɔ, nɛ a ngɛ yee tsuatsuaatsua, se a tɔɛ gblee. Mɛ nitsɛmɛ a bimɛ po, a ngɛ yee!

²¹ Manase bi, kɛ Efraim bi maa hwu ta, nɛ lɔ ɔ se ɔ, a ma bua kɛ wo Yuda he. Enɛ ɔ tsuo se ɔ, Yawɛ mi mi fumi ɔ se be poe kɛ yaa si e ma kpata a hɛ mi pɛsɛpɛsɛ.