Yesaya 8 - BAIBLO ALOO NGMAMI KLƆUKLƆU Ɔ

Yesaya binyumu maa da si kaa okadi ha ma a

¹ Jehanɛ, Yawɛ de mi ke, “Yaa hla nɔ́ nɛ a ngmaa ní ngɛ nɔ agbo ko, nɛ o ngma ní agbohi ngɛ nɔ. Ngmaa ke, ‘Puɛ ní esɔ; haa ní kɛ fo.’

² Ngɔɔ nihi enyɔ nɛ a buu mɛ saminya kɛ pee odase yeli. Mɛ ji Uria, kɛ Zakaria, Yeberekia bi ɔ.”

³ Pee se ɔ, i kɛ ye yo, gbalɔyo ɔ na bɔmi. E ngɔ hɔ nɛ e fɔ binyumu. Kɛkɛ nɛ Yawɛ de mi ke, “Wo lɛ biɛ ke, ‘Puɛ ní esɔ, haa ní kɛ fo.’

⁴ Loko bi nɛ ɔ maa le ‘Maa’ loo ‘Tsaatsɛ’ demi ɔ, Asiria matsɛ ɔ ma ba muɔ Damasko sika tsuo, kɛ Samaria ta yibu ní tsuo kɛ ho.”

Asiria matsɛ ɔ ma

⁵ Yawɛ kɛ mi tu munyu ekohu.

⁶ E ke, “Akɛnɛ ma nɛ ɔ sume Shiloa pa a nɛ mi nyu ɔ bee dii ɔ, se Matsɛ Rezin kɛ Matsɛ Peka mohu he a he ngɛ doe ngɛ ɔ,

⁷ imi Nyɔmtsɛ ɔ nitsɛ, ma ngɔ Asiria matsɛ ɔ, kɛ e ta a tsuo kɛ ba tua Yuda. Ta a ma ba tua mɛ kaa bɔ nɛ Yufrate pa a hyiɔ ywiaa nga nɛ e haa zugba a nɔ ɔ.

⁸ He nyɛli ɔmɛ ma ba gu Yuda zugba a nɔ kaa pa nɛ hyi ywia nga kɛ su nɔ konɔ tɔɔ, nɛ e ha nɔ́ tsuaa nɔ́ nɔ.” Mawu kɛ wɔ ngɛ! E bli e pɛlihi a mi kɛ ngɛ zugba a he bue.

⁹ Nyɛ je ma amɛ, nyɛɛ ye gbeye, nɛ nyɛ bua nyɛ he nya! Nyɛ nihi nɛ nyɛ ngɛ tsitsaa hu, nyɛɛ bu tue. Nyɛɛ mia kɛ ha ta, se kɛ̃ ɔ, nyɛɛ ye gbeye! Ee, nyɛɛ mia, se kɛ̃ ɔ, nyɛɛ ye gbeye!

¹⁰ Nyɛɛ to nyɛ ga amɛ! Se a maa pee yaka. Nyɛ de nɔ́ tsuaa nɔ́ nɛ nyɛ suɔ! Se enɛ ɔmɛ tsuo maa pee yaka, ejakaa Mawu kɛ wɔ ngɛ.

Yawɛ bɔ gbalɔ ɔ kɔkɔ

¹¹ Yawɛ kɛ hɛdɔ bɔ mi kɔkɔ ke ma ko nyɛɛ ni ɔmɛ a blɔ ɔ nɔ. E ke,

¹² “Koo piɛ ni ɔmɛ a he kɛ to a ga amɛ, nɛ níhi nɛ mɛɛ a yee gbeye ɔ, koo ye gbeye.

¹³ O hɛ nɛ hi nɔ kaa imi Yawɛ Tabohiatsɛ ɔ, i ngɛ klɔuklɔu; imi ji nɔ nɛ sa kaa o ye gbeye.

¹⁴ Ma plɛ pee he ko nɛ ngɛ klɔuklɔu; ma pee tɛ nɛ maa tsi mo blɔ. Se Israel kɛ Yuda bi ɔmɛ ɔ, ma pee tɛ sa nɛ maa tsɛ̃ mɛ kɛ ko si; nɛ ma pee klama nɛ maa du nihi nɛ a ngɛ Yerusalem.

¹⁵ Nihi babauu ma tɛ nɔ nɛ a maa nɔɔ si, nɛ a hɛ mi ma kpata. A maa tsɔ mɛ klama, nɛ a maa du.”

A bɔ ma a kɔkɔ ke a ko tsɛ kpade

¹⁶ Sɛ gbihi nɛ Mawu ngɔ ha mi ɔ, nyɛ, ye kaseli ɔmɛ, nyɛɛ hyɛ a nɔ saminya, konɛ a hi si daa.

¹⁷ Yawɛ ngɔ e hɛ mi ngɔ laa e ma a, se imi lɛɛ i heɔ yeɔ, nɛ i ngɔ ye hɛ ngɔ fɔ e nɔ.

¹⁸ Nyɛ nɛ mi, kɛ ye bimɛ ɔmɛ nɛ Yawɛ ke mi ɔ. Yawɛ Tabohiatsɛ ɔ nɛ e matsɛ sɛ ngɛ Zion yo ɔ nɔ ɔ tsɔ wɔ ke waa ngɔ sɛ gbi nɛ ɔmɛ kɛ ba ha Israel ma a.

¹⁹ Se ni komɛ de nyɛ ke nyɛ ya bi ní ngɛ klaali, kɛ ní peeli nɛ kpaa nyagba, nɛ a tuɔ gugwɔ mi gbi ɔ a ngɔ. A ma de ke, “E pee we nɔ́ ko; e sa kaa a ya bi ní ngɛ mumihi a ngɔ, nɛ a nu nɔ́ ko nɛ kɔɔ hɛ ngmengmletsɛmɛ a he kɛ je kpadehi a ngɔ.”

²⁰ Ke a de nyɛ ja a, nyɛ he nɔ ke, “Nyɛɛ bu nɔ́ nɛ Yawɛ ngɛ nyɛ tsɔɔe ɔ tue! Nyɛ ko bu ní peeli tue. Níhi nɛ a deɔ nyɛ ɔ, a he be se nami.”

Haomi be ko ma

²¹ Ni komɛ maa wo lalaalo ngɛ zugba a nɔ; hwɔ maa ye mɛ, nɛ a ní maa pee mɔbɔ. Mi mi fumi, kɛ hwɔ nɛ ngɛ mɛ yee he je ɔ, a maa gbiɛ a matsɛ ɔ, kɛ a mawu ɔmɛ. A ma wo a yi nɔ kɛ hyɛ hiɔwe,

²² aloo a ma kɔkɔ a yi si kɛ hyɛ zugba mi gaa, se a be nɔ́ ko nɔ́ ko nae kaa ja haomi kɛ diblii kpii nɛ woɔ nɔ he gbeye nɛ a ngɛ mɛ fiee kɛ ngɛ mi woe.