Yesaya 7 - BAIBLO ALOO NGMAMI KLƆUKLƆU Ɔ

Sɛ gbi nɛ a kɛ ya ha Matsɛ Ahaz

¹ Ta ba te si benɛ Uzia bibi Ahaz, Yotam bi ɔ ngɛ matsɛ yee ngɛ Yuda a. Lɔ ɔ ji kaa Siria matsɛ, Rezin kɛ Remalia bi Peka, Israel matsɛ ɔ, ba tua Yerusalem; se a nyɛ we nɛ a ngɔ ma a.

² Benɛ Yuda matsɛ ɔ nu kaa Siria ta a ba sɛ Israel zugba a mi momo ɔ, e kɛ e ma mi bi ɔmɛ tsuo ye gbeye wawɛɛ nitsɛ, nɛ a he do blibliibli kaa tsohi nɛ ngɛ mimiɛe ngɛ kɔɔhiɔ nya.

³ Yawɛ de Yesaya ke, “Yaa nɛ o kɛ Matsɛ Ahaz ya kpe; ngɔɔ o bi Shear Yashub ngɔ piɛ o he kɛ ya. O maa na lɛ ngɛ gbɛjegbɛ ɔ nɔ ngɛ bo loli a ní tsumi he ɔ, he nɛ nyu dɔ nɛ gblaa nyu kɛ jee pa a nɛ ngɛ yiti je ɔ nya ya ta ngɛ ɔ.

⁴ De lɛ ke e ko ye Matsɛ Rezin, kɛ Siria bi ɔmɛ, kɛ Matsɛ Peka gbeye. A mi mi fumi ɔ ngɛ kaa la tso enyɔ nɛ a ngɛ tsoe tikɔɔ kɛkɛ.

⁵ Siria, Israel, kɛ Remalia bi ɔ ya so ngɔ wo o he.

⁶ A to a yi mi kaa a ma ba tua Yuda, nɛ a maa wo ni ɔmɛ a he gbeye, bɔ nɛ pee nɛ a kɛ mɛ nɛ pee kake. Kɛkɛ ɔ, a maa wo Tabeel bi ɔ matsɛ.

⁷ “Se imi Yawɛ, i ngɛ hae nɛ nyɛɛ le kaa enɛ ɔ be mi bae kɔkɔɔkɔ.

⁸ Mɛni he je? Ejakaa Siria he wɛ pi Damasko nɛ ji e matsɛ ma a, nɛ Damasko he wɛ pi Rezin. Israel lɛɛ hiɛmɛ nɛ ɔ jeha nyingmi ekpa kɛ enuɔ ɔ, a ma kpata e hɛ mi butuu, bɔ nɛ e be nyɛe maa da si kaa ma hu.

⁹ Israel he wɛ pi Samaria nɛ ji e matsɛ ma a, nɛ Samaria hu he wɛ pi Matsɛ Peka. “Ke nyɛ he we yi ɔ, nyɛ yi be wami nae.”

Yimanuel he okadi ɔ

¹⁰ Yawɛ kɛ sɛ gbi kpa mane Ahaz ke,

¹¹ “Bi Yawɛ, o Mawu ɔ ke e ha mo okadi ko. E ma nyɛ maa je gbeje lokoo, loo hiɔwe tsitsaa kɛ ba.”

¹² Se Ahaz he nɔ ke, “I be okadi ko bie. I be Yawɛ kae.”

¹³ Yesaya he nɔ ke, “Matsɛ David nina, jehanɛ bu tue. E ji nɔ́ yayami kaa o maa hao nimli adesahi hluu kɛ yaa si a tsui si tomi maa ta. Anɛ o ngɛ hlae nɛ o hao wa Mawu ɔ hu ja kɛ yaa si e tsui si tomi maa ta lo?

¹⁴ Yoo, i nu. Nyɔmtsɛ ɔ nitsɛ ma ha nyɛ okadi ko; yiheyo ko maa ngɔ hɔ, nɛ e ma fɔ binyumu, nɛ e maa wo lɛ biɛ ke, ‘Yimanuel’.

¹⁵ Loko e hɛ ma fã nɛ e maa le kpakpa kɛ yayami a kpɛti slɔɔto ɔ, ma a mi bi ɔmɛ ma ná na nyɔ nyu maa nu, nɛ a ma na hwo maa ye ekohu.

¹⁶ Jamɛ a be ɔ be sue tete po nɛ matsɛmɛ enyɔ ɔmɛ nɛ ngɛ nyɛ he gbeye woe ɔ a zugba amɛ a nɔ maa je gu.

¹⁷ “Yawɛ ma ha haomi be ko ma ba na mo, kɛ o ma mi bi ɔmɛ, kɛ matsɛ weku ɔ tsuo. Kɛ je be nɛ Israel kɛ Yuda mi gba nɛ ɔ, be yaya kaa enɛ ɔ eko bɛ hyɛ. Asiria matsɛ ɔ ji haomi nɛ Yawɛ maa ngɔ kɛ ba a nɛ.

¹⁸ “Ke jamɛ a be ɔ su ɔ, Yawɛ ma kpa bɛ kɛ tsɛ Egipt kɛ Asiria bi ɔmɛ. Egipt bi ɔmɛ ma bu kɛ je pa amɛ a nya kɛ ba babauu kaa anunuhi, nɛ Asiria bi ɔmɛ hu maa je a zugba a nɔ ja nɔuu kaa hwo bihi.

¹⁹ A ma ba pue si ngɛ kɔ̃ voovoo ɔmɛ, kɛ tɛ puɔ ɔmɛ a mi, nɛ a maa ha si ngɛ mio tso ɔmɛ a sisi, kɛ lohwe lɛmi he ɔmɛ tsuo.

²⁰ “Jamɛ a be ɔ, Nyɔmtsɛ ɔ ma ya ba asoyi ngɛ Yufrate pa a se kɛ ba. E kɛ ma ba sɛ nyɛ yi bwɔmi, kɛ nyɛ nane he bwɔmi, nɛ a maa sɛ nyɛ kpɛni hulɔ. Asiria matsɛ ɔ ji asoyi ɔ nɛ.

²¹ “Ke jamɛ a be ɔ su ɔ, ke ngmɔ hulɔ ko ngɛ na yo kake, kɛ to enyɔ pɛ ɔ,

²² e ma ná nyɔ nyu fuu nɛ maa su e hiami ní tsuo nya. Niinɛ, nihi bɔɔ nɛ a yi ma na wami, nɛ maa piɛ ngɛ zugba a nɔ ɔ ma ná na nyɔ nyu maa nu, kɛ hwo nɛ a maa ye.

²³ “Jamɛ a be ɔ, hehi tsuo nɛ wai tso akpe hi sa a, nɛ a he jua peeɔ sika hiɔ yi akpe ɔ, lejɛ ɔ tsuo ma plɛ pee pú, kɛ mio tsohi sɔuu.

²⁴ Nihi maa hɛɛ kɛ̃ɛ̃, kɛ kɛ̃ɛ̃ mi bi kɛ ya da de ngɛ lejɛ ɔ. Niinɛ, zugba a nɔ tsuo ma hyi kɛ pú, kɛ mio tsohi sɔuu.

²⁵ Yo ɔmɛ a nɔ hehi nɛ a huɔ sa a lɛɛ nɔ ko nɔ ko be lejɛ ɔ yae, ejakaa hu, kɛ mio maa puɛ ngɛ nɔ. Zugba a maa pee tohi, kɛ nahi a niye he.”