Yesaya 65 - BAIBLO ALOO NGMAMI KLƆUKLƆU Ɔ

Yawɛ maa gbla atuã tsɔli a tue

¹ Yawɛ ke, “I pee klaalo konɛ nihi nɛ li mi ɔ nɛ a hla ye se blɔ; i pee klaalo konɛ ni nɛmɛ nɛ li mi ɔ nɛ a le mi jehanɛ. Daa nɛ ɔ, i pee klaalo nɛ i ngɛ ma a dee ke, ‘I ngɛ hiɛ ɔ oo; nyɛ tsɛ mi nɛ ma piɛ nyɛ he.’

² Se ma a tsɛ we mi. Daa nɛ ɔ, i pee klaalo nɛ ma he ye ma a atuu; ma nɛ kplii a tsui, nɛ a peeɔ nɔ́ nɛ dɛ, kɛ mɛ nitsɛmɛ a suɔmi nya ní ji mɛ.

³ Be tsuaa be ɔ, ma nɛ ɔ jeɔ blɔ paa nɛ a woɔ ye mi mi la; a sãã bɔhi ngɛ abɔɔhi a mi; a sãã tsopa kɛ e he via ngɛ tɛhi a nɔ;

⁴ nyɔ mi tsuo a hii yɔkɔhi a mi, kɛ hehi nɛ e sɛ́ nɛ a na mɛ ngɛ; kpotoo lo pohu a yeɔ, kɛ flɔɔ nɛ a ngɔ níhi nɛ a hiee kɛ pee ngɛ a tsesihi a mi.

⁵ Se bɔ nɛ mɛ mohu a deɔ ni kpahi ji, ‘Nyɛɛ hɛ nyɛ kɛ ya se; nyɛ ko ba wa kasa nya; wɔɔ lɛɛ wa he tsɔ!’ Kikɛmɛ a nimli nɛ ɔmɛ ngɛ kaa la su ku nɛ ngɛ ye gugwɔ mi sɛe, kɛ la nɛ ngɛ tsoe daa ligbi!

⁶ “I pee ye yi mi momo, nɛ i ngma ngɔ fɔ si ke i be ye nya mae hu; ma gbla a tue wawɛɛ kɛ to nane mi sisiisi

⁷ ngɛ mɛ nitsɛmɛ, kɛ a nɛmɛ ɔmɛ a he yayami ɔmɛ tsuo a he. Ejakaa a ya sãã tsopa kɛ e he via ngɛ yo ɔmɛ a nɔ. A tuɔ munyu hu kɛ siɔ mi ngɛ yoku ɔmɛ a nɔ. Enɛ ɔmɛ tsuo a he ɔ, ma gbla a tue sisiisi bɔ nɛ sa.”

⁸ Yawɛ ke, “Nɔ ko kpataa we e wai yiblii kpakpa hɛ mi; dã mohu e kɛ peeɔ. Jã kɛ̃ i be ye ma a hɛ mi kpatae pɛsɛpɛsɛ. Ni nɛmɛ nɛ sɔmɔɔ mi ɔ, ma he a yi wami.

⁹ Ma ha Yakob nina babauu. Ma ha Yuda bi ɔmɛ ma ba hi yo ɔmɛ a nɔ; lejɛ ɔ tsuo maa pee ye sɔmɔli nɛ i hla nɛ ɔ a nɔ́.

¹⁰ Ye ma a mi bi nɛ hlaa ye se blɔ ɔ, Sharon nga a nɔ maa pee a to lɛmi he, nɛ Haomi kɔ̃ ɔ mi ji he nɛ a nahi maa jɔɔ a he ngɛ.

¹¹ “Se nyɛ nihi nɛ kuaa imi Yawɛ, nɛ nyɛ hɛ jeɔ ye yo klɔuklɔu ɔ nɔ ɔ, nyɛɛ lɛɛ nyɛ nɔ́ maa slo. Nyɛ nihi nɛ nyɛ ngmɛɔ okplɔɔ kɛ haa mawu nɛ haa nɔ siade, kɛ nyɛ nihi nɛ nyɛ ngɔɔ wai nɛ a futu kɛ sãã bɔ ha mawu nɛ tsɔɔ nyɛ nɔ́ nɛ maa ba nyɛ nɔ ngɛ je mi,

¹² nyɛɛ lɛɛ nɔ́ nɛ fɔɔ si ha nyɛ ji klaate. Nyɛ tsuo nyɛ maa nɔ basabasa ngɛ klaate nya; ejakaa benɛ i tsɛ nyɛ ɔ, nyɛ he we nɔ, nɛ benɛ i tu munyu kɛ tsɔɔ nyɛ ɔ, nyɛ bui tue. Yayami mohu nyɛ pee ngɛ ye hɛ mi; níhi nɛ i sume ɔ, lɔ ɔmɛ mohu a se nyɛ ya nyɛɛ.

¹³ Lɔ ɔ he ɔ, imi Nyɔmtsɛ Yawɛ, i ngɛ dee ke, ni nɛmɛ nɛ buɔ mi tue, nɛ a jaa mi ɔ, a ma ná ní babauu maa ye, se nyɛɛ lɛɛ hwɔ maa gbe nyɛ; ye sɔmɔli ɔmɛ ma na nyu maa nu, se nyɛɛ lɛɛ kuma maa gbe nyɛ; ye sɔmɔli ɔmɛ ma nya, se nyɛɛ lɛɛ zo maa gbe nyɛ.

¹⁴ Ye sɔmɔli ɔmɛ ma la, nɛ a bua maa jɔ a he, se nyɛɛ lɛɛ nyɛ ma kpa huhui, nɛ nyɛ maa ye nyɛ tsui wawɛɛ; nyɛ maa ye kɔmɔ, nɛ nyɛ ma fo ya mɔbɔmɔbɔ.

¹⁵ Nyɛ biɛ maa pee nɔ nɛ a kɛ gbiɛɔ ha ye ma nɛ i hla a; ejakaa imi Nyɔmtsɛ Yawɛ nitsɛ, ma kpata nyɛ hɛ mi; se ni nɛmɛ nɛ jaa mi ɔ lɛɛ ma wo mɛ biɛ he.

¹⁶ Kɛkɛ ɔ, nɔ tsuaa nɔ nɛ ma hla kaa a gbaa lɛ ɔ ma bi Mawu anɔkualetsɛ ɔ; nɛ nɔ nɛ ma ka kita ngɛ zugba a nɔ ɔ hu maa ngɔ Mawu anɔkualetsɛ ɔ biɛ kɛ ka; ejakaa blema haomi ɔmɛ maa be kɛ ho, nɛ a be kaie hu.”

Je he ɔ

¹⁷ Yawɛ ke, “I ngɛ hiɔwe he, kɛ zugba he bɔe; nɛ a be blema ní ɔmɛ kaie hu; hɛ maa je a nɔ pɛsɛpɛsɛ.

¹⁸ Nyɛ nya, nɛ nyɛ bua nɛ jɔ kɛ ya neneene ngɛ níhi nɛ i ngɛ bɔe ɔ a he. Ejakaa i ngɛ Yerusalem he bɔe kaa he ko nɛ bua jɔmi sɔuu lɛ a naa ngɛ lejɛ ɔ, nɛ́ ma a mi bi ɔmɛ hu a bua jɔɔ saminya.

¹⁹ Imi nitsɛ ye bua maa jɔ Yerusalem, kɛ ma mi bi ɔmɛ tsuo a he. A be ya fomi, loo kɔmɔ yemi he nue ngɛ ma a mi hu.

²⁰ Ma he nɛ ɔ mi ɔ, bimwɔyo be gboe hu; nɔmoyo hu be gboe loko e be maa su. Ke a fɔ nɔ ko ɔ, ja e ye jeha lafa loko e ma gbo. Yayami peelɔ pɛ nɛ lɛɛ e be nae ja.

²¹ A maa po wehi, nɛ mɛ nitsɛmɛ a maa hi mi; a maa pee wai ngmɔhi, nɛ mɛ nitsɛmɛ a maa ye a mi yiblii.

²² A be wehi poe nɛ ni kpahi ba hi mi, nɛ a be ngmɔ pee nɛ ni kpahi ba ye e mi ní. Bɔ nɛ tso nguahi a se kɛɔ ɔ, ja ye ma mi bi ɔmɛ a se maa kɛ ngɛ je mi. A ma ná mɛ nitsɛmɛ a nine nya ní tsumi mi ní maa ye, nɛ a bua maa jɔ a he saminya.

²³ A be yaka dengme gboe; a bimɛ be kpatu gbenɔ gboe; ejakaa nihi nɛ imi Yawɛ i gbaa mɛ a nina ji mɛ; a ngmɛdu maa hi si daa.

²⁴ Loko a ma tsɛ mi ɔ, i he nɔ momo; benɛ a ngɛ kue fae ha mi nɛ a gbi nya lolo ɔ, i nu momo.

²⁵ Ogbetee kɛ jijɔ ma bla kɛ ye ní; jata ma kpe nga kaa na; nɛ sinɔ lɛɛ zu e maa ye. Nɔ ko be e nyɛmi awi yee, nɛ nɔ ko be e nyɛmi hɛ mi kpatae ngɛ ye yo klɔuklɔu ɔ nɔ. Imi, Yawɛ lɛ i de.”