Yesaya 64 - BAIBLO ALOO NGMAMI KLƆUKLƆU Ɔ

¹ I ná nɛ hiɔwe mi gba enyɔ nɛ o kple si kɛ ba!

² I ná nɛ yo ɔmɛ mimiɛ ngɛ o hɛ mi kaa bɔ nɛ lɛ́ tsɔwi la tsoo nɛ e haa nyu fiaa gudaguda ngɛ la nɔ ɔ. Ke e ba mi ja a, o he nyɛli ɔmɛ maa nu o he, nɛ je ma amɛ a he maa do blibliibli ngɛ o hɛ mi!

³ Blema, benɛ o pee nyakpɛ níhi nɛ wa hyɛ we blɔ ɔ, o kple si kɛ ba; yo ɔmɛ mimiɛ ngɛ o hɛ mi!

⁴ Kɛ je blema lokoo ɔ, nɔ ko nui hyɛ, nɛ nɔ ko hu nɛ kaa o se ɔ, mawu kpa ko ngɛ nɛ peeɔ nɔ́ haa nihi nɛ ngɔɔ a hɛ ngɔ fɔɔ e nɔ ɔ!

⁵ Nihi nɛ kɛ bua jɔmi peeɔ o suɔmi nya ní, nɛ blɔ nɛ o to ha mɛ ɔ, a ji nɔ ɔ, mo hu o naa a he bua jɔmi. Wa pee yayami, nɛ o mi mi fu wɔ. Kɛ je blema lokoo ɔ, yayami sɔuu wa ngɛ pee. Anɛ hɛ kɛ nɔ fɔmi ko pa ngɛ ha wɔ kaa a ma he wa yi wami lo?

⁶ Wɔ tsuo wa pee yayami, nɛ wa plɛ pee nihi nɛ a he tsɔ we. Kpakpa nɛ wa peeɔ ɔ po ngɛ kaa tade sɛmusɛmu ngɛ o hɛ mi. Wa yayami ɔmɛ ha wɔ tsuo wa pee kaa ba gbigbli nɛ kɔɔhiɔ muɔ kɛ yaa.

⁷ Nɔ ko nɔ ko be nɛ faa kue ha mo; nɛ nɔ ko nɔ ko ba bi we yemi kɛ buami kɛ ji o ngɔ. O ngɔ o hɛ mi kɛ laa wɔ. Wa yayami ɔmɛ ha nɛ o kua wɔ.

⁸ Se kɛ ɔ, Yawɛ, mo ji wa tsɛ. Wa ngɛ kaa zu, nɛ moo lɛɛ o ngɛ kaa buɛ puɛlɔ; mo lɛ o bɔ wɔ.

⁹ Lɔ ɔ he ɔ, Yawɛ, wa kpa mo pɛɛ nɛ o mi mi ko fu wɔ tsɔ; ko kai wa yayami ɔmɛ kɛ ya neneene! O ma ji wɔ; naa wɔ mɔbɔ.

¹⁰ O ma klɔuklɔu ɔ plɛ pee nga kplanaa. Zion plɛ pee nga nɔ, nɛ Yerusalem pee ma doku.

¹¹ Wa sɔlemi we klɔuklɔu saminyayoo, he nɛ wa nɛmɛ ɔmɛ je o yi ngɛ ɔ, a kɛ la sã, nɛ a kpata hehi nɛ ngɛ fɛu ɔ tsuo a hɛ mi.

¹² Yawɛ, níhi nɛ ngɛ wa nɔ bae nɛ ɔ, o be he nɔ́ ko pee ha wɔ lo? Anɛ o maa pee dii nɛ o ha waa na nɔ́ pe bɔ nɛ wa ma nyɛ nya maa da lo?