Yesaya 63 - BAIBLO ALOO NGMAMI KLƆUKLƆU Ɔ

Yawɛ ye je ma amɛ a nɔ kunimi

¹ “Mɛnɔ lɛ je Bozra ngɛ Edom zugba a nɔ kɛ ma nɛ ɔ? Mɛnɔ lɛ dla e he saminyayoo kɛ tade tsu, nɛ e ngɛ kɔsɔe wawɛɛ kɛ he wami kɛ ma nɛ ɔ?” “Imi Yawɛ, kpɔlɔ nɛ nine si wa a, i ngɛ dee kɛ ngmlaa ke i ye kunimi oo, i ye kunimi.”

² “Mɛni he je nɛ e tade tsu kikɛ nɛ ɔ kaa nɔ ko nɛ ngɛ wai yiblii ngae kɛ pee dã e tade ɔ?”

³ Yawɛ he nɔ ke, “Imi nɔ kake lɛ i naa je ma amɛ a nɔ kaa a naa wai yiblii nɔ; nɔ ko nɔ ko piɛ we ye he. A wo ye mi mi la, nɛ abofu nya a, i naa a nɔ, nɛ a muɔ ɔ fĩa wo ye tade ɔ mi tsuo.

⁴ I pee ye yi mi momo kaa ma gbla he nyɛli ɔmɛ a tue; lɔ ɔ he ɔ, ma he ye ma a yi wami; ejakaa be ɔ su jehanɛ.

⁵ Benɛ i hyɛ ɔ, e pee mi nyakpɛ kaa nɔ ko nɔ ko bɛ nɛ e ba je ngmlaa ha mi. Se ye mi mi nɛ fu ɔ wo mi he wami, nɛ imi nɔ kake too i ye kunimi.

⁶ I kɛ mi mi la naa je ma amɛ a nɔ basabasa, nɛ i gbɛ mɛ ngɔ fĩa. I tsɛ̃ a muɔ ngɔ pue zugba.”

Yawɛ pee Israel kpakpa

⁷ Ma gba Yawɛ suɔmi nɛ ngɛ daa a he sane. Ní kpakpahi tsuo nɛ e ha wɔ ɔ he ɔ, ma je e yi. E gbaa Israel ma a babauu; ejakaa Yawɛ mɔbɔ nami, kɛ e suɔmi be nyagbe.

⁸ Yawɛ ke, “Imi nitsɛ ye ma ji mɛ; a be mi sisie.” Lɔ ɔ he ɔ, e ha a yi na wami

⁹ kɛ je a haomi tsuo kulaa mi. Pi bɔfo ko nɛ e tsɔ, se lɛ nitsɛ lɛ e he a yi wami. E suɔmi, kɛ e mɔbɔ nami he je ɔ, e kpɔ mɛ, nɛ e hɛɛ mɛ saminya ngɛ blema be ɔmɛ tsuo a mi.

¹⁰ Se mɛɛ lɛɛ a tsɔ atuã; a ha nɛ aywilɛho nu mɛ. Yawɛ ba plɛ pee a he nyɛlɔ, nɛ e kɛ mɛ hwu.

¹¹ Kɛkɛ nɛ ma a kai blema, Yawɛ tsɔlɔ Mose be ɔ, nɛ a bi ke, “Yawɛ nɛ́ je ma a, kɛ a hɛ mi nyɛɛli ɔmɛ kɛ je wo ɔ mi ɔ, jije e ngɛ? Jije nɔ nɛ ngɔ e mumi klɔuklɔu ɔ kɛ wo a mi ɔ ngɛ?

^12-13 Nɔ nɛ ngɔ he wami kpetekpleenyɛ kɛ wo Mose mi kɛ tsu ní nguanguahi, nɔ nɛ gba wo ɔ mi ha mɛ, nɛ a nyɛɛ muɔ voovoo ɔmɛ a mi kɛ po wo ɔ nɛ e kɛ na biɛ nɛ maa hi si kɛ maa ya neneene ɔ, jije e ngɛ?” Yawɛ nitsɛ lɛ kpaka mɛ kɛ gu muɔ voovoo ɔmɛ a mi slɔkee kaa bɔ nɛ ke okpɔngɔ ngɛ fo tue ngɛ nga kplanaa nɔ nɛ́ e tɛ we si ɔ.

¹⁴ Yawɛ ha e ma a he jɔmi. Bɔ nɛ ke a kpaka na kɛ ya kɔ̃ mi nɛ e naa niye ní kpakpa nɛ e yeɔ ɔ, jã Yawɛ kpaka e ma a saminya, nɛ e kɛ na biɛ kpakpa kɛ hɛ mi nyami.

Ma a fa kue ha Mawu

¹⁵ Yawɛ, moo hyɛ wɔ kɛ je hiɔwe ngɛ o hi he klɔuklɔu he nɛ hɛ mi nyami bɔle mo ngɛ ɔ. O hɛdɔ, kɛ o he wami kpetekpleenyɛ ɔ, jije e ngɛ? O tsui mi sami, kɛ suɔmi babauu ɔ hu a se po.

¹⁶ Mo ji wa tsɛ. Wa nɛmɛ Abraham, kɛ Yakob li wɔ, se mo Yawɛ, wa tsɛ, mo ji wa kpɔlɔ kɛ je blema lokoo.

¹⁷ Yawɛ, mɛni he je o haa nɛ wa tlaa blɔ kɛ jeɔ o blɔ ɔmɛ a nɔ, nɛ wa kpliiɔ wa tsui, konɛ wa ko ye mo gbeye ɔ? Israel ma a, o nɔ, nɛ o tsɔli ji wɔ tsuo. Mo nitsɛ o nihi ji wɔ; lɔ ɔ he ɔ, kpale kɛ ba!

¹⁸ Wɔ o ma klɔuklɔu ɔ, wa hi o he klɔuklɔu ɔ be bɔɔ, kɛkɛ nɛ wa he nyɛli ba ywia o ma a!

¹⁹ Wa pee kaa nihi nɛ o hyɛ we a nɔ hyɛ, loo ni komɛ nɛ a kɛ o biɛ tsɛ we mɛ hyɛ!