Yesaya 62 - BAIBLO ALOO NGMAMI KLƆUKLƆU Ɔ

¹ I be ye nya mae oo! I be ye nya mae! Yerusalem he je ɔ, i be ye nya mae kɛ yaa si a ma he ye ma a yi wami. Nɛ e kunimi yemi ɔ maa je kpo paa nɛ a maa na kaa jatɛ ngɛ diblii mi.

² Yerusalem, je ma amɛ maa na kaa o ye kunimi, nɛ matsɛmɛ ɔmɛ tsuo maa na o hɛ mi nyami ɔ. A maa wo mo biɛ he. Biɛ nɛ Yawɛ nitsɛ maa wo mo ɔ, lɔ ɔ a kɛ ma tsɛ mo.

³ O maa pee kaa jlasi saminyayoo ngɛ Yawɛ, o Mawu ɔ dɛ mi.

⁴ A be mo tsɛe hu ke, “Nɔ nɛ a kua lɛ,” nɛ a be o zugba hu tsɛe ke, “Yo nɛ a fie lɛ kɛ je gba we.” Se a ma tsɛ mo ke, “Mawu ná e he bua jɔmi,” nɛ o zugba a, a ma tsɛ lɛ “Ayɛflo,” ejakaa Yawɛ bua jɔ o he, nɛ e maa ngɔ o zugba a kɛ pee kaa e we ayɛflo.

⁵ Kaa bɔ nɛ niheyo kpeɔ yomiyo ayɛflo ɔ, ja nɔ nɛ bɔ mo ɔ maa ngɔ mo hulɔ. Bɔ nɛ ayɛflo huno nyaa ayɛflo he ɔ, ja o Mawu ɔ bua maa jɔ o he.

⁶ Yerusalem, i ngɔ buli ngɔ to o gbogbo ɔmɛ a nɔ. Nyɔ kɛ pia tsuo, a ko pee dii; se mohu a hi Yawɛ kaie ngɛ si ko nɛ e wo e ma a he, konɛ e hɛ ko je nɔ.

⁷ A hi lɛ kaie kɛ yaa si e maa to Yerusalem si saminya ekohu. Nɛ ma a maa pee ma nɛ je ɔ tsuo ma je e yi.

⁸ Yawɛ ka e he kita, nɛ bɔ nɛ e ngɛ nɔ mi mae ngɛ dee ji, “Ye ma, i be o blɛfo ngɔe kɛ ha o he nyɛli nɛ a ye hu, nɛ o wai nɛ o gbo he dengme ɔ, nibwɔhi ba be nue hu.

⁹ Se mohu, o nihi nɛ du blɛfo nɛ a kpɔ ɔ, mɛ lɛ a maa ye, nɛ a ma je imi Yawɛ ye yi. Ni nɛmɛ nɛ bua wai yiblii nya a, mɛ lɛ a maa nu dã a ngɛ kue ɔmɛ a mi, ngɛ ye we klɔuklɔu ɔ.”

¹⁰ Yerusalem bi, nyɛɛ je kpo; nyɛɛ gu agbo ɔmɛ a mi kɛ je kpo! Nyɛɛ je gbɛjegbɛ kɛ ha ma a; nyɛ kukuɔ a nɔ tɛhi tsuo. Nyɛɛ si aflangaa nɛ je ma amɛ nɛ a na.

¹¹ Yawɛ ngɛ fiɛe kɛ yaa su je mi nyagbe he ɔ tɔɔ; e ke a de Zion biyo ɔ ke, “Be ɔ su jehanɛ, Yawɛ ma nɛ e ba he o yi wami. E ngɔ nihi nɛ e kpɔ ɔ kɛ ma.”

¹² A ma tsɛ nyɛ ke, “Ma klɔuklɔu”, “Ma nɛ Yawɛ kpɔ mɛ.” A ma tsɛ Yerusalem ke, “Ma nɛ a ya hla nɛ a na”, “Ma nɛ Mawu kua we lɛ.”