Yesaya 6 - BAIBLO ALOO NGMAMI KLƆUKLƆU Ɔ

Mawu tsɛ Yesaya ke e ba pee gbalɔ

¹ Jeha a nɛ Matsɛ Uzia gbo ɔ, i na Nyɔmtsɛ ɔ nɛ hii si ngɛ e matsɛ sɛ gojoo ko nɔ. E tade klɔii ɔ nya wuyaa a hyi Yawɛ we ɔ tsuo.

² Serafhi bɔle lɛ. A ti nɔ tsuaa nɔ ngɛ pɛli ekpa. Eko tsuaa eko ngɔ pɛli enyɔ ngɔ ha e hɛ mi, nɛ e ngɔ enyɔ hu ngɔ ha e he, nɛ enyɔ nɛ piɛ ɔ, e kɛ te.

³ A ti nɔ tsuaa nɔ ngɛ e sibi dee boboobo ke, “Klɔuklɔu, klɔuklɔu, klɔuklɔu! Yawɛ Tabohiatsɛ ɔ ngɛ klɔuklɔu! E hɛ mi nyami ɔ hyi je ɔ tsuo.”

⁴ A gbi ɔ ha nɛ Yawɛ we ɔ sisi tomi ɔ mimiɛ, nɛ la su ku hyi Yawɛ we ɔ nitsɛ tɔ.

⁵ Kɛkɛ nɛ i de ke, “Akuanyɛ! Ye yi ta pɛ! Ejakaa i na matsɛ ɔ nɛ ji Yawɛ Tabohiatsɛ ɔ! Ye nya mi munyu he tsɔ we; nɛ nimli nɛ i ngɛ a kpɛti ɔ, mɛ hu a nya mi munyu he tsɔ we ja nɔuu!”

⁶ Tlukaa a, seraf ɔ kake te kɛ ba ye ngɔ kɛ e dɛ mi la ngu hɛuu nɛ e kɛ abɛɛle ya kɔ ngɛ bɔ sami la tɛ ɔ nɔ.

⁷ E ngɔ la ngu hɛuu ɔ ngɔ sa ye nya he nɛ e de ke, “Hyɛ, nɛ nɔ́ nɛ ɔ sa o nya he nɛ ɔ, a ngɔ o he yayami ɔmɛ ngɔ pa mo, nɛ piami ko be o he hu.”

⁸ Jehanɛ, i nu nɛ Nyɔmtsɛ ɔ bi ke, “Mɛnɔ ma tsɔ? Mɛnɔ maa ya?” I he nɔ ke, “I ngɛ hiɛ ɔ, Moo tsɔ mi!”

⁹ Kɛkɛ nɛ e de mi ke ma ya nɛ ma ya de ma a ke, “Nyɛ maa bu tue, se nyɛ be sisi nue; nyɛ maa hyɛ, se nyɛ be se kɔe.”

¹⁰ E ya nɔ nɛ e de mi ke, “Ha nimli nɛ ɔmɛ a tsui nɛ ti; a tue nɛ wa, nɛ a hɛngmɛ hu nɛ ma, bɔ nɛ pee nɛ a hɛngmɛ ko hyɛ nɔ́, nɛ a tue hu ko nu nɔ́, konɛ a ko nu nɔ́ sisi, nɛ a ba kpale kɛ ba nɛ a tsa mɛ.”

¹¹ I bi ke, “Nyɔmtsɛ, nɔ́ nɛ ɔ maa ya nɔ kɛ yaa si mɛni be?” E he nɔ ke, “Kɛ yaa su be nɛ ma amɛ a hɛ mi ma kpata, nɛ a maa pee ma dokuhi nɛ a be nɔ ko nɔ ko nae ngɛ we ɔmɛ a mi, nɛ zugba a nitsɛ hu nɔ maa je gu.

¹² Ma ha a maa je zugba a nɔ kɛ ya tsitsaa he ko, nɛ zugba a tsuo nɔ maa je gu.

¹³ Ke nɔ kake pɛ nɛ maa piɛ ngɛ ni nyɔngma mi po, lɛ hu a ma kpata e hɛ mi; e maa pee kaa tso ngua ko nɛ a po, nɛ e piɛ tso kpɔ ɔ kɛkɛ.” (Tso kpɔ nɛ ɔ daa si ha Mawu ma he ɔ sisi jemi.)