Yesaya 55 - BAIBLO ALOO NGMAMI KLƆUKLƆU Ɔ

Mawu naa mɔbɔ

¹ Yawɛ ke, “Kuuwi, nyɛ nihi tsuo nɛ kuma ngɛ nyɛ yee, nyu babaaba ngɛ hiɛ ɔ ha nyɛ! Nyɛ nihi nɛ nyɛ be sika hu, nyɛɛ ba; nyɛ ba he niye ní nɛ nyɛɛ ye! Nyɛɛ ba nyɛ ba he dã, kɛ na nyɔ nyu e hia we sika; a jua we!

² Mɛni he je nyɛ puɛɔ sika kɛ heɔ nɔ nɛ be nyɛ tɔe? Mɛni he je nyɛ ngɔɔ nyɛ ní tsumi mi hiɔwo kɛ heɔ nɔ́ nɛ tɔɛ nɔ? Nyɛɛ bu mi tue saminya nɛ nyɛɛ pee nɔ nɛ i ngɛ dee ɔ; kɛkɛ nyɛ maa ye ní kpakpahi nɛ nyɛ bua maa jɔ nyɛ he.

³ “Ye ma, nyɛ ta tue, nɛ nyɛɛ ba ye ngɔ; nyɛɛ ba ye ngɔ, konɛ nyɛ yi nɛ na wami. I kɛ nyɛ maa so somi ko nɛ maa hi si kɛ maa ya neneene; nɛ gbaami nɛ i wo David si ke ma ha e nina a, ma kɛ ha nyɛ.

⁴ I wo lɛ je ma amɛ a nyatsɛ, kɛ asafoatsɛngua, nɛ e nɔ i gu kɛ je ye he wami kpo.

⁵ Jehanɛ lɛɛ, o ma tsɛ je mahi nɛ li mo kɛ ba; sa a, a li mo, se jehanɛ lɛɛ a ma wo fo kɛ ba o ngɔ! Imi Yawɛ, Israel Mawu klɔuklɔu ɔ ma ha ní nɛ ɔmɛ tsuo maa ba mi.”

⁶ Be mi nɛ Yawɛ he kɛ we nɛ ɔ, nyɛ hla e se blɔ nɛ nyɛɛ fa kue ha lɛ.

⁷ Nyɛ yiwutsotsɛmɛ, nyɛ kpa awi yemi, nyɛ yayami peeli, nyɛ ko susu nɔ́ yaya hu. Nyɛɛ kpale kɛ ba Yawɛ, wa Mawu ɔ ngɔ. E naa mɔbɔ, nɛ be tsuaa be ɔ, e kɛ nɔ tɔmi paa.

⁸ Yawɛ ke, “E slo bɔ nɛ i susuɔ nɔ́ he, nɛ e slo bɔ nɛ nyɛ hu nyɛ susuɔ nɔ́ he; jehanɛ e slo ye blɔ ɔmɛ ngɛ nyɛ blɔ ɔmɛ a he.

⁹ Bɔ nɛ hiɔwe kɛ zugba a kpɛti kɛ ɔ, ja ye blɔ ɔmɛ, kɛ nyɛ blɔ ɔmɛ a kpɛti kɛ, nɛ ja nɔuu ye susumi ɔmɛ hu pã nyɛ susumi ɔmɛ.

¹⁰ “Ye munyu ngɛ kaa snoo kɛ hiɔmi nɛ nɛɔ kɛ jeɔ hiɔwe kɛ pueɔ zugba. Ní nɛ ɔmɛ haa dumi níhi puɛɔ. Wa naa wu nɛ wa duɔ, kɛ ngma nɛ wa yeɔ.

¹¹ Munyuhi nɛ i tuɔ ɔ, ja a maa pee. Munyu tsuaa munyu nɛ jeɔ ye nya a, nɔ́ nɛ i ke e pee ɔ, ja e pee loko e maa kpale kɛ ba. Nɔ́ tsuaa nɔ́ nɛ i to ke e ba mi ɔ maa ba mi kokooko.

¹² “Nyɛɛ kɛ bua jɔmi maa je lejɛ ɔ. A maa ngɔ nyɛ kɛ je ngɛ tue mi jɔmi mi. Yo ɔmɛ, kɛ yoku ɔmɛ maa hia la, nɛ pu mi tso ɔmɛ tsuo maa fia a dɛ mi.

¹³ Mio tso nane mi ɔ, sɛsɛo maa puɛ. Tso kpakpa maa puɛ ngɛ mio tso nane mi. E maa pee okadi nɛ maa hi si kɛ maa ya neneene, nɛ a kɛ ma kai nɔ́ nɛ Yawɛ tsu.”