Yesaya 54 - BAIBLO ALOO NGMAMI KLƆUKLƆU Ɔ

Yawɛ suɔ Israel sane

¹ Yerusalem, jinɛ o ngɛ kaa yosa, se jehanɛ lɛɛ o ma nyɛ ma la nɛ o ma hwɔ lele. Jehanɛ lɛɛ o ma fɔ bimɛ babauu pe yo nɛ e kɛ e huno ngɛ tsu nya daa!

² Bli o bo tsu ɔ mi; bli bo tsu ɔ mi gbajaa, tsa kpa amɛ a nɔ, nɛ o ka tso plɛɛko ɔmɛ kɛ wo zu mi nɛ a he nɛ wa!

³ Ejakaa o he maa hiɛ ngɛ zugba a tsuo nɔ; zugba a nɛ je ma kpa amɛ ngɛ nɔ amlɔ nɛ ɔ, o nina ma ba kpɔ ngɛ a dɛ, nɛ ma doku ɔmɛ a mi ma hyi tɔ kɛ nimli.

⁴ Koo ye gbeye, ejakaa zo be mo gbee! O tsui ko po, ejakaa a be o hɛ mi si puee hu. Zo ní nɛ o tsu ngɛ o yihe be mi ɔ, o hɛ maa je nɔ, nɛ si nɛ o hi mɔbɔmɔbɔ kaa yalɔyo ɔ, o be kaie hu.

⁵ O bɔlɔ ɔ ma ba pee o huno. E biɛ ji Yawɛ Tabohiatsɛ. Israel Mawu Klɔuklɔu ɔ ma he o yi wami; lɛ ji je ɔ tsuo Mawu.

⁶ Israel, o ngɛ kaa yo nɛ e huno je e he, yo nɛ a je he ngɛ yihe mi, nɛ e ngɛ kɔmɔ yee wawɛɛ. Se Yawɛ, o Mawu ɔ ngɛ mo tsɛe kɛ ba e ngɔ ekohu, nɛ e ngɛ dee ke,

⁷ “Be kpiti ko kɛkɛ nɛ i je o he, se ye mi mi ngɛ mi sããe wawɛɛ ngɛ o he; lɔ ɔ he ɔ, ma ngɔ mo kɛ ba ye ngɔ ekohu.

⁸ Ye mi mi fu mo wawɛɛ. Kɛkɛ nɛ i je hɛ ngɛ o he be kuku, se jehanɛ lɛɛ ma je ye suɔmi kpo kɛ tsɔɔ mo kɛ maa ya neneene.” Imi Yawɛ yi wami helɔ ɔ, nɛ i de.

⁹ “Noa be ɔ mi ɔ, i wo si ko; i de ke i be hae nɛ nyu babauu ma ba ha zugba a nɔ hu. Amlɔ nɛ ɔ, i ngɛ mo si woe kaa ye mi mi be mo fue hu gblegbleegble.

¹⁰ Yo ɔmɛ, kɛ yoku ɔmɛ maa ywia pue si, se suɔmi nɛ i ngɛ kɛ ha mo ɔ se be poe. Somi nɛ i kɛ mo so kaa ma ha o tue mi nɛ jɔ mo ɔ, ma ye nɔ kɛ maa ya neneene.” Imi Yawɛ, o mɔbɔ nalɔ ɔ nɛ i de.

Yerusalem he ɔ

¹¹ Yawɛ ke, “Yerusalem, ma nɛ na amanehlu, mo nɛ nɔ ko piɛ we o he nɛ e wo mo bua. Ma ngɔ tɛhi nɛ a he jua wa kɛ fia o sisi tomi ɔ ekohu.

¹² Ma ngɔ tɛ nɛ he jua wa nɛ a tsɛɛ rubi tɛ kɛ ma gbogbo ɔmɛ a yi mi ngɛ saflɛ ɔmɛ a nɔ. Ma ngɔ tɛ nɛ kpɛɔ kaa la, nɛ a tsɛɛ karbunkle tɛ ɔ kɛ pee agbo ɔmɛ. Gbogbo nɛ bɔle mo ɔ, tɛ nɛ he jua wa sɔuu ma ngɔ kɛ fia.

¹³ “Imi Yawɛ nitsɛ, ma tsɔɔ ye ma a ní, nɛ ma ha a ma na ní babauu.

¹⁴ Dami sane yemi, kɛ kpakpa peemi ma ha o ma a he maa wa. Nɔ ko nɔ ko be mo yi mi wae, nɛ nɔ ko nɔ ko be o he gbeye woe.

¹⁵ Ke nɔ ko ba tua mo ɔ, pi imi nɛ i tsɔ lɛ; nɔ tsuaa nɔ nɛ ma ba tua mo ɔ, jamɛ a nɔ ɔ be mo nyɛe.

¹⁶ “Imi ji nɔ nɛ bɔ sɔ̃lɔ nɛ huu la mi, nɛ e sɔ̃ɔ̃ ta hwumi níhi. Imi nɔuu ji nɔ nɛ bɔ ta hwulɔ ɔ nɛ ngɔɔ ta hwumi dade kɛ kpataa nɔ hɛ mi.

¹⁷ Se ta hwumi níhi nɛ a sɔ̃ nɛ ɔmɛ ekoeko be nyɛe maa pee mo nɔ́ ko; jehanɛ hu, nɔ tsuaa nɔ nɛ kɛ mo ma na sane ɔ, a maa bu lɛ fɔ. Ma bu ye tsɔli ɔmɛ a he, nɛ ma ha a maa ye kunimi.” Yawɛ lɛ de.