Yesaya 52 - BAIBLO ALOO NGMAMI KLƆUKLƆU Ɔ

Mawu ma he Yerusalem yi wami

¹ Yerusalem, tee si nɛ o pee ma nguaa ekohu! Mawu ma klɔuklɔu, o hɛ mi nɛ ba nyami, nɛ́ a bu mo saminya! Ma je li be hiɛ ɔ bae hu gblegbleegble.

² Yerusalem nɛ a pee mo nyɔguɛ, tee si nɛ o huanya bunyuku ɔ ngɔ pue si, nɛ o hi o matsɛ sɛ ɔ nɔ! Zion biyo nɛ a nu mo nɛ a bɔ mo pã, je pã a ngɛ o kuɛ!

³ Bɔ nɛ Yawɛ ngɛ e ma a dee ji nɛ ɔ nɛ: “Tsa pi sika nɛ a kɛ he nyɛ kɛ pee nyɛ nyɔguɛ, lɔ ɔ he ɔ, a kɛ sika be nyɛ kpɔe.

⁴ Kekle ɔ, nyɛ ya Egipt, nɛ nyɛ ya to nubwɔ ngɛ lejɛ ɔ; pee se ɔ, Asiria bi ɔmɛ wa nyɛ yi mi yaka gu.

⁵ Jehanɛ, ngɛ Babilonia hu, jamɛ a amimi ɔ nɔuu a ye nyɛ; a pee nyɛ nyɔguɛhi nɛ a wui hiɔ ko ngɛ nyɛ he. Nihi nɛ ye nyɛ nɔ ɔ fĩa, nɛ a jɛ nyɛ saminya kɛ gbe ye he guɛ.

⁶ Be ma nɛ nyɛ maa le kaa imi ji Mawu; nyɛ maa le kaa imi lɛ i kɛ nyɛ tu munyu ɔ nɛ.”

⁷ Mɛni ji afɛu! Nyɛɛ hyɛ manye munyu fiɛlɔ ko nyɛɛ yo ɔmɛ a nɔ kɛ ma; e hɛɛ manye munyu sɔuu; manye munyu ɔ kɔɔ tue mi jɔmi he! E ngɛ fiɛe ke a ye kunimi, nɛ e ngɛ Zion dee ke, “O Mawu ɔ ngɛ matsɛ yee!”

⁸ Ma a he buli ɔmɛ a nya nɛ a ngɛ nue boboobo ɔ nɛ; mɛ tsuo a kɛ bua jɔmi ngɛ lae kɛ ngmlaa! Ejakaa mɛ nitsɛmɛ a kɛ a hɛngmɛ na bɔ nɛ Yawɛ kpale e ma, Zion kɛ ma ekohu!

⁹ Nyɛ Yerusalem tsu kokoehi, nyɛ bua nɛ jɔ, nɛ nyɛ hwɔ lele! Ejakaa Yawɛ ma he e ma a yi wami, nɛ e maa jɔɔ e ma mi bi ɔmɛ a bua.

¹⁰ Yawɛ ma je e he wami klɔuklɔu ɔ kpo; e ma he e ma a yi wami, nɛ je ɔ tsuo maa na.

¹¹ Nyɛ tsuo nyɛ ba be kɛ ho; nyɛɛ je Babilonia! Nyɛ nihi nɛ nyɛ hɛɛ Mawu we ɔ ní klɔuklɔu ɔmɛ, nyɛɛ pee nyɛ he klɔuklɔu; nyɛ ko ta nɔ́ ko nɛ he tsɔ we he.

¹² Jehanɛ lɛɛ e hia we kaa nyɛ maa ye esɔ kɛ hia blɔ; nyɛ be fo tue kɛ je. Ejakaa Yawɛ, Israel Mawu ɔ maa nyɛɛ nyɛ hɛ mi ngɛ he tsuaa he nɛ nyɛ yaa a, nɛ e maa bu nyɛ he.

Tsɔlɔ nɔ́ nalɔ ɔ

¹³ Yawɛ ke, “Ye tsɔlɔ ɔ maa ye manye ngɛ e ní tsumi mi; a ma wo e nɔ gojoo, nɛ a maa wo e hɛ mi nyami babauu!

¹⁴ Nihi babauu nɛ na lɛ ɔ, a he mi po; ejakaa a puɛ e nɔmlɔ tso subai ɔ kulaa; ke o hyɛ lɛ ɔ, e slo lɛ kulaa ngɛ adesa he!

¹⁵ Se jehanɛ lɛɛ e he maa pee je mahi babauu nyakpɛ; nɛ matsɛmɛ pohu a nya maa kpɛ a he wawɛɛ. Ejakaa nɔ́ ko nɛ a de we mɛ hyɛ ɔ, a maa na, nɛ nɔ́ ko nɛ a nui hyɛ ɔ, a maa nu sisi jehanɛ.”