Yesaya 50 - BAIBLO ALOO NGMAMI KLƆUKLƆU Ɔ

¹ Yawɛ ke, “Anɛ nyɛ susuɔ kaa i ha ye ma a je ye he kɛ ho kaa bɔ nɛ nyumu kɛ e yo poɔ gba mi, nɛ e haa yo ɔ gba mi pomi womi ɔ lo? Ke ja nyɛ susu ɔ, jije gba mi pomi womi ɔ ngɛ mɔ? Anɛ nyɛ susuɔ kaa i jua nyɛ kɛ ho ma se ya kaa bɔ nɛ a juaa bimɛ kaa nyɔguɛhi lo? Dɛbi, nyɛ yayami ɔmɛ a he nɛ a jua nyɛ ɔ nɛ; nyɛ mlaa tɔmi ɔmɛ a he a fie nyɛ kɛ ho ɔ nɛ.

² “Mɛni he je lɛ benɛ i ba a, nɔ ko be lejɛ ɔ? Benɛ i tsɛ nyɛ ɔ, mɛni he je nɔ ko pui mi ɔ? Anɛ nyɛ susuɔ kaa ye nine ngɛ kuku nɛ i be nyɛe ma kpɔ nyɛ kɛ je he nyɛlɔ ɔ dɛ mi lo? Ke i wo gbi ɔ, wo miiɔ, nɛ pahi plɛɔ peeɔ nga kplanaa. Ke nyu ɔ mii ta a, lo gboɔ nɛ e saa.

³ Imi lɛ i haa hiɔwe woɔ diblii kpii kaa nɔ́ nɛ a kɛ kpekpe ya bo ha he.”

Yawɛ tsɔlɔ ɔ bu lɛ tue

⁴ Nyɔmtsɛ Yawɛ tsɔɔ mi nɔ́ nɛ ma de, konɛ be nɛ sa mi ɔ, ma nyɛ ma wo nɔ nɛ pɔ tɔ lɛ ɔ he wami. Daa mɔtu ɔ, e haa i hlaa kaa nɔ́ nɛ e maa tsɔɔ mi ɔ, ma bu tue kaa ní kaselɔ.

⁵ Nyɔmtsɛ Yawɛ bli ye tue; i tsɔ we atuã, i kua we lɛ.

⁶ I ngmɛ blɔ nɛ a fia ye se mi kpa; a jɛ mi; a hia ye kpɛni si bwɔmi, nɛ a su lada ngɔ pue ye hɛ mi kɛ pue ye hɛ mi si.

⁷ Se enɛ ɔmɛ tsuo pee we mi nɔ́ ko, ejakaa Nyɔmtsɛ Mawu ɔ piɛ ye he, nɛ zo gbi mi. Lɔ ɔ he ɔ, i nu ye tsui, nɛ i wlua mi, ejakaa i le kaa zo be mi gbee.

⁸ Nɔ nɛ maa wo mi nguɔ ɔ ngɛ ye kasa nya. Mɛnɔ lɛ e kɛ mi ná a? É ba konɛ waa kpe! Mɛnɔ ji ye he nyɛlɔ ɔ? É hɛ lɛ kɛ ba ye ngɔ.

⁹ Nyɔmtsɛ Yawɛ nitsɛ ngɛ ye kasa nya, mɛnɔ maa bu mi fɔ mɔ? Ye he nyɛli ɔmɛ tsuo maa laa, a hɛ mi ma kpata pɛsɛpɛsɛ kaa bo nɛ wɔyewɔye ye.

¹⁰ Nyɛ ti mɛnɔ yeɔ Yawɛ gbeye, nɛ e buɔ e tsɔlɔ ɔ gbi tue? E tsɔlɔ nɛ ɔ, ke e nyɛɛ ngɛ diblii kpii mi po, e ngɔɔ e hɛ ngɔ fɔɔ Yawɛ nɔ, nɛ e ngɔɔ e he kɛ kpasaa e Mawu ɔ.

¹¹ Nyɛ nihi tsuo nɛ nyɛ peeɔ kpe kɛ soɔ nihi a yi nɔ, konɛ nyɛ kpata a hɛ mi, nyɛ yi mi tomi yaya amɛ ma kpata nyɛ nitsɛmɛ nyɛ hɛ mi. Yawɛ nitsɛ ma ha nɔ́ nɛ ɔ maa ba mi; nyɛ nyagbe maa pee mɔbɔ.