Yesaya 48 - BAIBLO ALOO NGMAMI KLƆUKLƆU Ɔ

Israel kuɛ wa

¹ Israel ma, Yuda nina, nyɛɛ bu nɔ́ nɛ ɔ tue; nyɛ nɛ nyɛ ngɔɔ Yawɛ biɛ kɛ kaa kita, nɛ nyɛ tsiɔ Israel Mawu ɔ ta ke nyɛ ngɛ lɛ jae, pi anɔkuale mi, se nya mi gu.

² Nyɛ siɔ nyɛ gugue, nɛ nyɛ deɔ ke ma klɔuklɔu ɔ mi bi ji nyɛ; nyɛ deɔ hu ke Israel Mawu nɛ e biɛ ji Yawɛ Tabohiatsɛ ɔ nɔ nyɛ ngɔ nyɛ hɛ ngɔ fɔ.

³ Yawɛ ngɛ Israel dee ke, “Níhi nɛ maa ba hwɔɔ se ɔ, i gba ngɔ to blema lokoo, nɛ tlukaa, i ha a ba mi.

⁴ Israel bi, i le kaa nyɛ kuɛ wa; e ngɛ kpakpataa kaa dade, nɛ nyɛ yi wu tso ngɛ kpɛkpɛtɛɛ kaa akɔblee.

⁵ Lɔ ɔ he ɔ, i gba nɔ́ nɛ maa ba nyɛ nɔ ɔ ngɔ to blema lokoo; i gba ní nɛ ɔmɛ ngɔ to loko á ba mi, bɔ nɛ pee nɛ nyɛ ko de ke nyɛ we amaga amɛ, níhi nɛ a kpɛ́, kɛ níhi nɛ a sɔ̃ ɔ nɛ a ha ní ɔmɛ ba mi.

⁶ “Jehanɛ, níhi nɛ i gba ngɔ to ɔ tsuo ba mi. Anɛ e sɛ kaa nyɛ kplɛɛɔ nɔ kaa ja i de ɔ lo? Jehanɛ ma gba nyɛ ní hehi nɛ maa ba hwɔɔ se, laami mi sanehi nɛ maa ba, nɛ i je we kpo kɛ tsɔɔ we hyɛ.

⁷ Kpaako i ha ní nɛ ɔmɛ ngɛ mi bae; nɔ́ ko kaa kikɛ nɛ ɔ bɛ hyɛ. Ke pi ja a, nyɛ ma de ke nyɛ le enɛ ɔ tsuo momo.

⁸ Nyɛ nui hyɛ, nɛ nyɛ li lolo; kɛ je blema lokoo ɔ, nyɛ tue bli we lolo! Ejakaa i le kaa yi wu tso níhi nyɛ peeɔ; kɛ je nyɛ fɔmi be mi tɔɔ ɔ, atuã tsɔli a tsɛɔ nyɛ.

⁹ “Bɔ nɛ pee nɛ a je ye biɛ yi he je ɔ, i tsi ye mi mi la a nya; i tsi nya, konɛ ma ko kpata nyɛ hɛ mi.

¹⁰ I ngɔ amanehlu kɛ ka nyɛ kaa bɔ nɛ a tsuɔ sika hiɔ he ngɛ flɔɔnɔɔ mi; se i na kaa nyɛ he be se nami ko kulaa.

¹¹ Imi nitsɛ ye he i pee ha; ee, imi nitsɛ ye he ma pee ha. Ejakaa mɛni he je e sa kaa a puɛ ye biɛ? I be ye hɛ mi nyami ngɔe kɛ ha nɔ kpa ko.”

Yawɛ hla Sirus kaa hɛ mi nyɛɛlɔ

¹² Yawɛ ke, “Israel, ma nɛ imi nitsɛ i hla, nyɛɛ bu mi tue! Imi ji Mawu, kekleekle nɔ, kɛ nyagbe nɔ; imi nɔ kake too ji Mawu!

¹³ Imi nitsɛ lɛ i to zugba a sisi, nɛ i bli hiɔwe mluguduu ɔ mi. Benɛ i tsɛ hiɔwe kɛ zugba a, mɛ tsuo a he sɔ kɛ ba.

¹⁴ “Nyɛ tsuo nyɛ ba bua nyɛ he nya nɛ nyɛɛ bu tue! Nyɛ mawu ɔmɛ a ti mɛnɔ gba enɛ ɔ kɛ to? Nɔ nɛ imi Yawɛ, i suɔ lɛ ɔ, ma ba pee nɔ́ nɛ sa imi Yawɛ ye hɛ mi, nɛ e ma kpata Babilon hɛ mi butuu.

¹⁵ Imi nitsɛ nɛ i hla lɛ. Imi nɛ i ngɔ lɛ kɛ ba, nɛ ní tsumi nɛ i ha lɛ ɔ, e maa ye manye ngɛ mi.

¹⁶ “Jehanɛ, nyɛɛ hɛ nyɛ kɛ ba ye ngɔ nɛ nyɛ ba bu mi tue. Kɛ je sisije ɔ tsuo lakpa ko be ye munyu mi, nɛ ye munyu ɔmɛ baa mi sisiisi.” Hɛ mi nyɛɛlɔ ɔ nɛ Yawɛ hla a he nɔ ke, “Nyɔmtsɛ Yawɛ ngɔ e mumi ɔ ngɔ wo ye mi, nɛ e tsɔ mi.”

Yawɛ to yi mi ha e ma a

¹⁷ Yawɛ, Israel Mawu Klɔuklɔu ɔ, nɔ nɛ heɔ e ma a yi wami ɔ ngɛ dee ke, “Imi ji Yawɛ, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔ nɛ nyɛɛ ba nyɛ je mi ha, konɛ e hi ha nyɛ nitsɛmɛ.

¹⁸ “I na nɛ nyɛ ye ye mlaa amɛ a nɔ! Jinɛ a maa gbaa nyɛ; nɛ nyɛ maa pee kaa pa nɛ nyu tɛ̃ mi gblegbleegble. Nyɛ maa ye kunimi nɔtonɔto kaa bɔ nɛ oslɔke kuɔ kɛ pueɔ wo dɔ mi.

¹⁹ Nyɛ ngmɛdu ko hiɛ babauu kaa zia, nɛ i ko hyɛ a nɔ saminya, konɛ a hɛ mi ko kpata gblegbleegble.”

²⁰ Nyɛɛ je Babilon esɔesɔ; nyɛ wo fo! Nyɛ hwɔ lele nɛ a nu ngɛ he tsuaa he ke, “Yawɛ he e tsɔlɔ Israel yi wami!”

²¹ Benɛ Yawɛ kɛ e ma a nyɛɛ nga kplanaa a nɔ ɔ, kuma yi mɛ; ejakaa e ha nyu je tɛ sa mi ha mɛ; tɛ sa a mi gba, kɛkɛ nɛ nyu je mi kaa pa.

²² Yawɛ ke, “Yayami peeli be he jɔmi nae gblegbleegble.”