Yesaya 47 - BAIBLO ALOO NGMAMI KLƆUKLƆU Ɔ

Babilon hɛ mi kpatami

¹ Yawɛ ke, “Babilon, mo kple si kɛ je matsɛ sɛ ɔ nɔ! Ba hi si ngɛ zugba, ngɛ bunyuku mi! Be ko nɛ be ɔ, o ngɛ kaa yomiyo, se jehanɛ lɛɛ a be mo hɛɛ dɔdɔɔdɔ hu!

² Ngɔɔ wɛ tɛ kɛ ba! Moo wɛɛ blɛfo nɛ a kɛ pee ma! Je o hɛ mi hami nɔ́ ɔ esɔ! Kpa bo saminyayoo ɔ ngɛ o he, nɛ́ o nane nɛ je kpo. Poo pa amɛ kɛ ya!

³ Nihi maa na o he gu ɔ; a maa na o zo kpɔtɔɔ ɔ. Ma ha tue gblami maa ba, nɛ nɔ ko nɔ ko be ye nya tsie.”

⁴ Israel Mawu klɔuklɔu ɔ ha wa ye wa he. E biɛ ji Yawɛ Tabohiatsɛ.

⁵ Yawɛ ngɛ Babilon dee ke, “Hii si dii ngɛ diblii mi; a be mo tsɛe ke je ma amɛ a manyɛ hu.

⁶ Ye ma a wo ye mi mi la; lɔ ɔ he ɔ, i bui mɛ kaa ye ma hu. I ngɔ mɛ ngɔ wo o sisi, nɛ o nɛ́ mɛ mɔbɔ ko kulaa; nihi nɛ bwɔ po, o wa mɛ yi mi wawɛɛ nitsɛ.

⁷ E pee mo kaa o maa ye manyɛ daa, lɔ ɔ he ɔ, o susuu we ní nɛ ɔmɛ a he, bɔ nɛ a nyagbe maa ba ha hu, o bui.

⁸ “Jehanɛ lɛɛ, bu tue; mo nɛ o suɔ je mi ngɔɔmi yemi, nɛ o hii si gbɔjɔɔ kaa nɔ nɛ he mi jɔ lɛ, mo nɛ o fĩaa ke o kle kaa Mawu, nɛ nɔ ko nɔ ko kɛ mo sɔɛ. O susuu hu kaa o be yalɔyo pee gblee, nɛ o bimɛ hu be gboe kɔkɔɔkɔ.

⁹ Se tlukaa, ligbi kake mi ɔ, nɔ́ enyɔ nɛ ɔmɛ maa ba o nɔ; o maa ye kunya, nɛ o maa fi kablɛ babauu, se o huno, kɛ o bimɛ tsuo maa laa mo.

¹⁰ “Yayami nɛ o ngɛ pee ɔ peeɔ mo kaa o he mi jɔ mo. O susu kaa nɔ ko nɔ ko be mo nae. O ga, kɛ o nile ɔ ha o laa blɔ, nɛ o de o he ke, ‘Imi ji imi, nɛ ye se ɔ nɔ ko be hu.’

¹¹ Lɔ ɔ he ɔ, haomi maa ba o nɔ, nɛ o be nya nyɛe maa da. Oslaa ma ba na mo, se o be e nya nyɛe maa tsi. O hɛ mi ma kpata tlukaa be nɛ o li o he be.

¹² Kunya nɛ o ye, kɛ kablɛ nɛ o fi kɛ je o jokuɛwi a si ɔ, pɛtɛ he. Eko piɔ, a ma ha nɛ nihi a mi maa hi ha mo, nɛ o he nyɛli maa ye mo gbeye.

¹³ Nihi nɛ le hiɔwe níhi a mi, nihi nɛ kase dodoe ɔmɛ a he ní, kɛ nihi nɛ pee hiɔwe mi dlami ɔmɛ a he foni, nɛ a deɔ mo níhi nɛ maa ba o nɔ nyɔhiɔ tsuaa nyɔhiɔ mi ɔ, ha nɛ a ba nɛ a ba he o yi wami koo! Se pɔ tɔ mo kɛ a ga womi ɔmɛ!

¹⁴ “A maa pee kaa nga gbigbli, nɛ la maa sã mɛ! A be nyɛe ma he mɛ nitsɛmɛ a yi wami; la lilɛ ɔmɛ maa sã mɛ. Pi la kulɔɔ nɛ a hluiɔ ji nɛ ɔ; pi la nɛ a hii he.

¹⁵ Nihi tsuo nɛ o gbo a he dengme ɔ, se nɛ o ma na ngɛ a he ji nɛ ɔ nɛ; nihi nɛ kɛ mo ye jua kɛ je o jokuɛwi a si ɔ, mɛ tsuo a maa ngmɛɛ o he; nɔ tsuaa nɔ ma wo lɛ nitsɛ e blɔ, nɛ nɔ ko nɔ ko be piɛe nɛ ma he o yi wami.”