Yesaya 46 - BAIBLO ALOO NGMAMI KLƆUKLƆU Ɔ

¹ “Babilon mawu ɔmɛ a nyagbe ji nɛ ɔ nɛ. Be ko ɔ, a ja Bel kɛ Nebo. A hɛɛɔ mɛ kɛ hii si poe. Se jehanɛ lɛɛ a plɛ pee tlomi ngɛ tejihi nɛ pɔ tɔ mɛ a se mi.

² Amaga amɛ nyɛ we nɛ a he mɛ nitsɛmɛ a yi wami; a ngɔ mɛ kɛ ho. Babilon mawu ɔmɛ a nyagbe ji nɛ ɔ nɛ!

³ “Nyɛ ye ma a mi nihi tsuo, Yakob nina nɛ nyɛ ngɛ wami mi kɛ mwɔɔ, nyɛɛ bu mi tue. Imi ji nɔ nɛ baa nyɛ yi kɛ je nyɛ fɔmi be tɔɔ.

⁴ Imi nɔuu ji nyɛ Mawu nɛ maa hyɛ nyɛ nɔ kɛ ya su be nɛ nyɛ maa wa nɛ nyɛ maa puɛ mua. Imi lɛ i bɔ nyɛ; ma baa nyɛ yi; ma piɛ nyɛ he, nɛ ma he nyɛ yi wami.

⁵ “Yawɛ ngɛ bie ke, ‘Mɛnɔ he nyɛ maa ngɔ mi kɛ to? Nɔ ko ngɛ nɛ kɛ mi sɔ lo?’

⁶ Nihi jeɔ sika tsu babauu kɛ jee a kotoku mi, nɛ a ngmɛɛ sika hiɔ ngɛ sɛni tɛ nɔ. A bɔɔ sika tsu galɔ apaa, nɛ e kɛ peeɔ amaga ha mɛ; kɛkɛ ɔ, a kplaa si nɛ a jaa amaga a!

⁷ A ngɔɔ amaga a ngɔ fɔɔ a konɔ; a kɛ ya maa si ngɛ he ko, nɛ e nyɛ we nɛ e mimiɛɔ e he po kɛ je he nɛ e maa si ngɛ ɔ! Ke nɔ ko fa kue ha lɛ ɔ, e nyɛ we nɛ e haa lɛ heto, nɛ e nyɛ we nɛ e jeɔ nɔ ɔ kɛ jeɔ haomi mi hulɔ.

⁸ “Nyɛ yayami peeli, nyɛ kai nɔ́ nɛ ɔ, nɛ nyɛ susu he.

⁹ Nyɛ kai níhi nɛ i pee blema lokoo ɔ; ejakaa Mawu kpa ko be nɛ kɛ mi sɔ.

¹⁰ Níhi tsuo nɛ maa ba hwɔɔ se ɔ, imi ji nɔ nɛ gba kɛ to kɛ je blema lokoo; níhi nɛ na we nɛ a ba lolo ɔ hu, imi lɛ i gba kɛ to. I de ke ye yi mi tomi maa ba mi, nɛ nɔ́ tsuaa nɔ́ nɛ i suɔ ɔ, lɔ ɔ ma pee.

¹¹ I ngɛ nɔ ko tsɛe kɛ je beleku je; e he maa sɔ kaa kayo kɛ ba kple si, nɛ e ma ba tsu níhi nɛ i to nɛ ma pee ɔ. Bɔ nɛ i de ɔ, ja pɛpɛɛpɛ e maa ba mi.

¹² “Nyɛ ma nɛ nyɛ tue mi ti, nɛ nyɛ susuɔ kaa kunimi yemi ngɛ se lokoo, nyɛɛ bu tue.

¹³ I ha ye kunimi yemi ligbi ɔ na nyɛ haa; e be tsitsaa lokoo kulaa. Ye kunimi yemi ɔ be se kpɛe. Ma he Yerusalem yi wami, nɛ ma wo Israel hɛ mi nyami.”