Yesaya 44 - BAIBLO ALOO NGMAMI KLƆUKLƆU Ɔ

Yawɛ nɔ kake too pɛ ji Mawu

¹ Yawɛ ke, “Jehanɛ, mo Israel, ye tsɔlɔ, ye ma nɛ i hla, Yakob nina, bu tue.

² Imi ji Yawɛ nɛ bɔ mo ɔ nɛ; kɛ je be nɛ a fɔ mo kɛ ba su amlɔ nɛ ɔ, imi lɛ i baa o yi. Koo ye gbeye, ye tsɔlɔ ji mo, ye ma nɛ i hla nɛ i suɔ mo.

³ “Nihi nɛ kuma ngɛ mɛ yee ɔ, ma ha mɛ nyu nɛ a nu. Ma ha zugba gbigbli ɔ nyu, nɛ pahi maa hia. Ma ngɔ ye mumi ɔ kɛ wo o bimɛ ɔmɛ a mi, nɛ ma gbaa o nina a.

⁴ A ma plɔke kaa nga nɛ na nyu saminya, loo tsohi ngɛ pa tue.

⁵ “Nɔ kake ma de ke ‘Imi lɛɛ Mawu nɔ́ ji mi;’ nɔ kake ma tsɛ e he ke Yakob. Nɔ kake hu ma kadi kɛ wo e kɔni nɔ ke, ‘Yawɛ nɔ́,’ nɛ e ma tsɛ e he ke Israel.”

⁶ Bɔ nɛ Yawɛ, Israel matsɛ, kɛ e kpɔlɔ, nɛ lɛ ji Tabohiatsɛ ɔ ngɛ dee ji, “Imi ji kekleekle no, kɛ nyagbe no. Ye se ɔ, Mawu kpa ko be hu.

⁷ Mɛnɔ kɛ mi sɔ? Ha nɛ a ha heto. Ha nɛ a je nya nɛ a de ngɛ ye hɛ mi. Níhi nɛ ba blema a, mɛnɔ lɛ de to? Ha nɛ a gba níhi nɛ maa ba hwɔɔ se.

⁸ Ye ma, koo nu sawale! Koo ye gbeye! Ye we odase ji mo. Anɛ i de we enɛ ɔ blema lokoo lo? Anɛ ye se ɔ, Mawu ko pa ngɛ lo? Dɛbi, i li he wami kpa ko ngɛ ye se hu?”

A gbe amaga jami he guɛ

⁹ Amaga puɛli ɔmɛ tsuo ji nimli guhi, nɛ amaga amɛ nɛ a buu kaa nɔ́ ko ɔ, a he be se nami ko kulaa. Nihi nɛ jaa kikɛmɛ a ní nɛ ɔmɛ ɔ, a hɛngmɛ yu; a li nɔ́ ko fɛɛ; zo maa gbe mɛ.

¹⁰ Mɛnɔ lɛ puɛɔ amaga nɛ he be se nami, nɛ e jaa lɛ?

¹¹ Nihi tsuo nɛ jaa kikɛmɛ a nɔ́ nɛ ɔ, zo maa gbe mɛ. Nihi nɛ puɛɔ amaga amɛ ɔ, nimli adesahi kɛkɛ ji mɛ kaa nihi nɛ jaa mɛ ɔ kɛ̃. Nyɛ ha amaga puɛli ɔmɛ kɛ e jali ɔmɛ tsuo nɛ a ba. Mɛ tsuo a tsui maa po, nɛ zo maa gbe mɛ kpɔtɔɔ.

¹² Sɔ̃lɔ ngɔɔ dade kɛ woɔ la mi, nɛ e dɔɔ la. E kɛ e he wami woɔ hamle nɔ kɛ fiaa dade ɔ nɛ e kɛ sɔ̃ɔ̃ nɔ́ ko. Ke e ngɛ nɔ́ ɔ sɔ̃e ɔ, hwɔ kɛ kuma yee lɛ, nɛ pɔ tɔɔ lɛ.

¹³ Tso galɔ ngɔɔ kpa kɛ susuu tso, e ngɔɔ kadimi nɔ́ kɛ kadiɔ, nɛ e ngɔɔ ga dade kɛ hlɔɔ tso ɔ he kɛ peeɔ nɔ́ ko nɛ je nɔmlɔ; e ngɔɔ nɔ́ kɛ e he fɛu nɛ ɔ kɛ ya maa we mi.

¹⁴ E ma nyɛ maa po seda kɛ pee amaga nɛ ɔ, aloo e ma hla odum, loo nga mi tso kpa ko. Ke e suɔ po, e ma du sɛsɛo, nɛ e maa mlɛ kɛ yaa si hiɔmi maa nɛ, nɛ tso ɔ maa wa saminya.

¹⁵ Nɔmlɔ adesa ngɔɔ tso nɛ ɔ fa ko kɛ peeɔ lɛ́ kɛ slɛɔ la nɛ e hluiɔ; nɛ e kɛ sãã abolo hulɔ. E ngɔɔ tso ɔ fa ko hu kɛ peeɔ amaga. E kplaa si ha lɛ, nɛ e jaa lɛ.

¹⁶ E ngɔɔ tso ɔ fa kɛ slɛɔ la; e kɛ la a sãã de lo, nɛ e yeɔ nɛ e tɔɔ. E hluiɔ la, nɛ e deɔ ke, “Yɛɛ, ye he dɔ la. La nɛ ɔ ngɔɔ loo!”

¹⁷ Tso ɔ fa nɛ piɛ ɔ, e ngɔɔ kɛ peeɔ amaga, nɛ e kplaa si nɛ e jaa lɛ. E faa kue ha lɛ, nɛ e deɔ ke, “Mo ji ye mawu! He ye yi wami!”

¹⁸ Nɔ́ nɛ a ngɛ pee ɔ, a li, nɛ a nui sisi hulɔ. A nga a hɛngmɛ, konɛ a ko hyɛ nɔ́, a tsi a juɛmi nya, konɛ a ko nu nɔ́ sisi.

¹⁹ Amaga peelɔ ɔ be juɛmi, loo e kɔ we nɔ́ se nɛ e ma de ke, “Hyɛ kaa i sã tso ɔ fa kaa lɛ́; i sã abolo ngɛ la a mi; i ngɔ la a kɛ sã de lo, nɛ i ye. Anɛ nɔ́ nɛ piɛ ɔ, ma kɛ puɛ amaga lo? Anɛ ma kpla si ha tso kpoku lo?”

²⁰ E ní pee mɔbɔ kaa nɔ nɛ ngɛ la zu yee; a mlɔɔ lɛ, nɛ e laa blɔ; lɔ ɔ he ɔ, e be nyɛe ma he lɛ nitsɛ e yi wami, loo nɛ e ma de ke, “Anɛ pi yaka nɔ́ nɔ nɛ i ngɔ ye hɛ ngɔ fɔ nɛ ɔ?”

Yawɛ, bɔlɔ kɛ yi wami helɔ ɔ

²¹ Yawɛ ke, “Israel, o hɛ ko je nɔ́ nɛ ɔ nɔ! Kai kaa ye tsɔlɔ ji mo. Imi lɛ i bɔ mo, konɛ o pee ye tsɔlɔ; lɔ ɔ he ɔ, ye hɛ be o nɔ jee gblegbleegble.

²² I je o tɔmi ɔmɛ kɛ je o he kɛ ho kaa bɔku. O yayami ɔmɛ laa kaa mɔtu afua. Kpale kɛ ba ye ngɔ, imi lɛ i he o yi wami ɔ nɛ.”

²³ Nyɛ hiɔwe tsuo, nyɛ la nɛ nyɛ nya; nyɛ zugba a sisi hehi nɛ kuɔ, nyɛ he ose! Nyɛ yo ɔmɛ, kɛ hue ɔmɛ kɛ a mi tso ɔmɛ tsuo, nyɛɛ kɛ bua jɔmi nɛ he ose. A je Yawɛ he wami kpetekpleenyɛ ɔ yi; ejakaa e he e ma Israel yi wami.

²⁴ Yawɛ, o yi wami helɔ, kɛ o bɔlɔ ɔ ngɛ dee ke, “Imi ji Yawɛ, nihi tsuo kulaa a bɔlɔ ɔ nɛ. Imi nɔ kake too lɛ i bli hiɔwe mi, nɛ i ha zugba a fɔɔ si gbajaa. Mɛnɔ ke e nine ngɛ mi?

²⁵ Imi ji nɔ nɛ haa lakpa gbali ɔmɛ, kɛ dodoe mi hyɛli a we okadi ɔmɛ peeɔ yaka. Imi ji nɔ nɛ kuɔ ní leli a nya la, nɛ i haa a nile plɛɔ peeɔ kuasia jemi.

²⁶ Ke i tsɔ ye tsɔlɔ ke e ya je ye yi mi tomi kpo kɛ tsɔɔ ɔ, munyu nɛ e tuɔ ɔ, i maa nɔ mi, nɛ gbami ɔmɛ tsuo baa mi pɛpɛɛpɛ. I ngɛ Yerusalem dee ke, nihi ma ba hi ma a mi ekohu; a maa ma Yuda ma amɛ ekohu, nɛ nimli ma ba hi a mi. A maa to jamɛ a ma amɛ si ekohu ngɛ ma doku ɔmɛ a nane mi.

²⁷ I faa, kɛkɛ wo miiɔ, nɛ nyu taa pa amɛ a mi.

²⁸ I deɔ Sirus ke, ‘Mo ji nɔ nɛ maa ye ye ma a nɔ ha mi; nɔ́ nɛ i suɔ ɔ, lɔ ɔ sɔuu o maa pee. O ma fa ke a ma Yerusalem ekohu, nɛ́ a to Yawɛ we ɔ sisi.’ ”