Yesaya 43 - BAIBLO ALOO NGMAMI KLƆUKLƆU Ɔ

Mawu wo si ke e ma he e ma a yi wami

¹ Se jehanɛ lɛɛ Israel, Yawɛ nɛ bɔ mo ɔ ngɛ mo dee ke, “Koo ye gbeye. Imi nitsɛ ma he o yi wami. O biɛ i ngɔ kɛ tsɛ mo ɔ nɛ; ye nɔ́ ji mo.

² Ke o haomi ɔmɛ pee kaa pa nɛ o ngɛ poe po, ma piɛ o he; o haomi ɔmɛ be nyɛe maa ye o nɔ. Ke o nyɛɛ la mi po, la a be mo sãe. Haomihi tsuo nɛ maa ba o nɔ ɔ, o maa ye a nɔ.

³ Ejakaa imi Yawɛ, o Mawu ɔ, imi Israel Mawu Klɔuklɔu ɔ lɛ he o yi wami ɔ nɛ. Ma ngɔ Egipt ngɔ ha ngɛ o nane mi, konɛ o ye o he. Ma ngmɛɛ Sudan kɛ Seba hu a he.

⁴ Akɛnɛ o he jua wa ha mi, akɛnɛ o hɛ mi ba nyami, nɛ i suɔ mo he je ɔ, ma ngmɛɛ je mahi kɛ a mi bi ɔmɛ a he ngɔ ha, konɛ ma he o yi wami.

⁵ Koo ye gbeye, imi nitsɛ i kɛ mo ngɛ! “Ma bua o nina nya kɛ maa je beleku je, kɛ bonyoku je kɛ maa ba we.

⁶ Ma de omleyi je ke, ‘Ngmɛɛ a he nɛ a ho,’ nɛ ma de leneyi je hu ke, ‘Koo tsi a nya. Nyɛ ha nɛ ye ma a nɛ kpale kɛ ba, kɛ je zugba amɛ a nɔ ngɛ tsitsaa lokoo ngɛ je ɔ mi tsuo.

⁷ Imi nitsɛ ye ma ji mɛ; nɛ i bɔ mɛ, konɛ a wo ye hɛ mi nyami.’ ”

Israel ji Yawɛ we odase

⁸ Mawu ke, “Tsɛ ye ma a kɛ ba nɛ waa kpe. A ngɛ hɛngmɛ, se a hyɛ we nɔ́, a ngɛ tue hulɔ, se a nui nɔ́!

⁹ Tsɛ je ma amɛ tsuo kɛ ba, nɛ a ba bua a he nya. A ti mɛnɔ ma nyɛ maa sɛɛ wɔ blema níhi. Ha nɛ a we odase yeli ɔmɛ nɛ a ba, nɛ a ba nu, konɛ a de ke e ngɛ mi, loo e be mi.

¹⁰ “Israel ma, mo ji ye we odase. Imi ji nɔ nɛ hla mo, konɛ o pee ye tsɔlɔ, bɔ nɛ pee nɛ o le mi, o he ye nɔ nɛ o ye, nɛ o na nɛ o le kaa imi pɛ ji Mawu. Ye se ɔ, mawu kpa ko be hu, mawu kpa ko hi si hyɛ, nɛ eko be bae gblegbleegble.

¹¹ “Imi nɔ kake pɛ ji Yawɛ, imi pɛ ji nɔ nɛ ma nyɛ ma he o yi wami.

¹² Níhi nɛ ba a, imi Yawɛ nɔuu lɛ i de to, nɛ i ba piɛ o he. Ma se mawu ko pee we nɔ́ nɛ ɔ eko hyɛ; mo ji ye we odase.

¹³ Imi ji Mawu, nɛ i ngɛ daa. Nɔ ko nɔ ko be nyɛe ma je e he kɛ je ye dɛ mi. Ke i pee nɔ́ ko ɔ, mɛnɔ ma tsake?”

Israel ma a je Babilon

¹⁴ Yawɛ, yi wami helɔ, Israel Mawu Klɔuklɔu ɔ, bɔ nɛ e de ji nɛ ɔ nɛ: “Ma tsɔ nihi kɛ ya Babilon tɔɔ kɛ he o yi wami. Ma ku agbo ɔmɛ ngɔ pue si, nɛ lele nɛ a ngɛ hwɔe ɔ ma plɛ pee kɔmɔ yemi.

¹⁵ Imi ji Yawɛ Mawu klɔuklɔu ɔ nɛ. Israel, imi ji o bɔlɔ, kɛ o matsɛ.”

¹⁶ Blema lokoo ɔ, Yawɛ je blɔ ko kɛ gu wo ɔ mi. Blɔ ɔ gu nyu glegleegle ɔ mi.

¹⁷ Ta nguaa nɛ ngɛ he wami, nɛ je kpo kɛ e ta zugba lɛhi kɛ okpɔngɔhi babauu ɔ, e ha mɛ tsuo a nɔ si nɛ a nyɛ we nɛ a te si hu; a la a gbo kaa kane mi tako, loo kaa kane nɛ nu ta mi.

¹⁸ Se Yawɛ ke, “Blema sanehi, kɛ blema níhi nɛ be momo ɔ, nyɛ ko ngɔ nyɛ juɛmi ngɔ fɔ a nɔ hu.

¹⁹ Nɔ́ he nɛ ma pee ɔ, nyɛɛ hyɛ lɔ ɔ mohu blɔ; nɔ́ he ɔ je sisi momo; nyɛ bli nyɛ hɛngmɛ nɛ nyɛɛ hyɛ! Ma je gbɛjegbɛ ko kɛ gu nga kplanaa a nɔ, nɛ ma ha pahi maa hia ngɛ lejɛ ɔ.

²⁰ Nga mi lohwe nane eywiɛɛywiɛtsɛmɛ pohu maa wo ye hɛ mi nyami; nga mi gbehi, kɛ dugumahi ma je ye yi. Ejakaa ma ha pahi maa hia kɛ be ngɛ nga kplanaa a nɔ, nɛ ye ma nɛ i hla a ma na nyu maa nu.

²¹ Mɛ ji ye ma nɛ imi nitsɛ i bɔ ha ye he, konɛ a la kɛ je ye yi!”

Yayami nɛ Israel pee

²² Yawɛ ke, “Se mo Israel, ye he sane ba ti mo; o ja we mi hu.

²³ O ngɔɛ jijɔ kɛ ba sã we sami bɔ ha mi; nɛ o ngɔɛ bɔhi kɛ ba wui ye hɛ mi nyami hulɔ. I gba we o nya ke o ba sã bɔ ha mi, loo o ba ha mi tsopa kɛ e he via.

²⁴ O he we tsopa kɛ e he via ha mi, nɛ o ngɔɛ lohwehi a zɔ hu kɛ ba sã we bɔ kɛ sa ye hɛ mi, se mohu, o ngɔ o he yayami kɛ ngɛ mi haoe sɔuu, nɛ pɔ tɔ mi kɛ o tɔmi ɔmɛ.

²⁵ Se imi nɔuu ji Mawu nɛ ngɔɔ o he yayami ngɔ paa mo. I be o he yayami ɔmɛ kaie hu.

²⁶ “Mo kai mi, konɛ waa hla mi. Moo jaje o sane ɔ koo, konɛ waa hyɛ nɔ nɛ nɔ́ da!

²⁷ O nɛ̃ pee yayami, nɛ ma nimeli ɔmɛ hu tɔ ye nɔ,

²⁸ nɛ nyɛ ganɔ ɔmɛ hu ble ye he klɔuklɔu ɔ; lɔ ɔ he ɔ, i ha a kpata Israel hɛ mi; i ha a pue ye ma a hɛ mi si.”