Yesaya 42 - BAIBLO ALOO NGMAMI KLƆUKLƆU Ɔ

Yawɛ tsɔlɔ ɔ

¹ Yawɛ ke, “Ye tsɔlɔ, nɔ nɛ i kplɛɛ we nɔ́ ngɛ e he ɔ, lɛ ji nɛ ɔ nɛ. Nɔ nɛ i hla nɛ i suɔ e sane ɔ, lɛ ji nɛ ɔ nɛ. I ngɔ ye mumi ɔ kɛ wo e mi, nɛ e maa ye dami sane kɛ kojo je ma amɛ tsuo.

² E be ngmlaa kpae, nɛ e be munyu tue boboobo nɛ a nu ngɛ gbɛjegbɛ ɔmɛ a nɔ hulɔ.

³ Ngɔwu nɛ mi dɔ momo ɔ, e be mi kue, nɛ kane nɛ ngɛ tsoe sulii ɔ, e be gbee. E maa ye dami sane kɛ maa ya neneene.

⁴ E kɔni mi be jɔ̃e, nɛ pɔ be lɛ tɔe kɛ yaa si dami sane yemi ma he si ngɛ je ɔ mi tsuo. Zugbahi nɛ ngɛ tsitsaa lokoo ɔ po maa hyɛ lɛ blɔ nɛ e ba wo mɛ ga.”

⁵ Yawɛ Mawu ɔ, lɛ nɛ bɔ hiɔwe, nɛ e bli mi gbajaa. Lɛ nɛ bɔ zugba a, kɛ níhi tsuo nɛ ngɛ zugba a nɔ ɔ. Lɛ nɔ nɛ ha nimli adesahi tsuo wami kɛ mumi ɔ, bɔ nɛ e ngɛ e tsɔlɔ ɔ dee ji nɛ ɔ nɛ:

⁶ “Imi Yawɛ lɛ i tsɛ mo; i baa o yi, nɛ i ha mo he wami, konɛ o hyɛ nɛ a ye dami sane ngɛ je ɔ mi. Ma gu o nɔ nɛ i kɛ je ma amɛ tsuo maa so, nɛ a ma na la.

⁷ O ma bli hɛ yuyuili a hɛngmɛ, nɛ nihi nɛ a wo mɛ tsu, nɛ a hii si ngɛ diblii mi ɔ, o ma ha a maa ye a he.

⁸ “Ye biɛ ji Yawɛ; imi pɛ ji Mawu. I be ye hɛ mi nyami ɔ ngɔe kɛ ha mawu kpahi, nɛ ye yi jemi ɔ hu i be ngɔe kɛ ha amagahi.

⁹ Nyɛɛ hyɛ koo! Níhi nɛ i de to blema a ba mi. Jehanɛ, ma gba nyɛ níhi nɛ maa ba. I ngɛ nyɛ dee loko a ba mi.”

Yi jemi la

¹⁰ Nyɛ la la he ha Yawɛ; nyɛ je ɔ tsuo, nyɛ la kɛ je e yi! Nyɛ nihi nɛ nyɛ nyɛɛ wo hɛ mi, nyɛ je e yi! Nibɔ níhi tsuo nɛ ngɛ wo ɔ mi, nyɛ je e yi! Zugbahi ngɛ tsitsaa lokoo, kɛ nihi tsuo nɛ ngɛ a nɔ, nyɛ je e yi!

¹¹ Nyɛ ha nga kplanaa a kɛ e nɔ ma amɛ tsuo nɛ a je Mawu yi. Nyɛ ha Kedar bi ɔmɛ nɛ a je e yi! Nyɛ ha nihi nɛ ngɛ Sela ma a mi nɛ a hwɔ lele ngɛ yo ɔmɛ a nɔ!

¹² Nyɛ ha nihi nɛ ngɛ zugbahi a nɔ ngɛ tsitsaa lokoo ɔ nɛ a wo Yawɛ hɛ mi nyami!

¹³ Yawɛ hia kpo kaa ta bulɔ; e hia kpo kaa ta bulɔ nɛ hɛ dɔ. E ngɛ ngmlaa kpae. E ngɛ ose hee kɛ ngɛ e he nyɛli ɔmɛ woe kaa e kɛ mɛ maa to ní.

Mawu wo si kaa e maa piɛ e ma a he

¹⁴ Mawu ke, “I pee kpoo hluu; i ma ye nya, nɛ i ye ye he nɔ. Se jehanɛ lɛɛ be ɔ su; ma kpa ngmlaa kaa yo nɛ nu kɔɔmi, ma kɛmɛ kaa nɔ nɛ mumi nya ngɛ tae.

¹⁵ Ma kpata yo ɔmɛ, kɛ yoku ɔmɛ a hɛ mi, nɛ ma ha a nɔ nga kɛ tsohi tsuo ma gbli. Ma ha pa amɛ a mi nyu ɔ maa mii, nɛ pa amɛ ma plɛ pee zugba gbigbli.

¹⁶ “Ma ngɔ ye hɛ yuyuili ɔmɛ kɛ gu hehi nɛ a nyɛɛ we hyɛ. Ma ha a diblii ɔ ma plɛ pee la; nɛ ma ha zugba nɛ nɔ ngɛ googagooga a nɔ maa sɔ tɛtlɛɛ ha mɛ. Níhi nɛ i ngɛ si woe kaa ma pee ji nɛ ɔmɛ nɛ; ma ha a maa ba mi pɛpɛɛpɛ.

¹⁷ Se nihi nɛ ngɔɔ a hɛ ngɔ fɔɔ amagahi a nɔ, amagahi nɛ a kpɛ́, loo a puɛ, nɛ a kpale deɔ ke a mawuhi ji mɛ ɔ, a maa ba mɛ si, nɛ zo maa gbe mɛ.”

Israel kase we ní

¹⁸ Yawɛ ke, “Nyɛ tuekpokutsɛmɛ, nyɛɛ bu tue! Nyɛ hɛ yuyuili, nyɛɛ hyɛ nɛ nyɛɛ na ní!

¹⁹ Anɛ nɔ ko ngɛ nɛ e hɛ yu pe ye tsɔlɔ ɔ, loo nɛ e tue tsi pe nɔ nɛ i tsɔ kɛ sɛ pɔtɛɛ ɔ lo?

²⁰ Israel, o naa níhi babauu, se o kɔ se lo? O ngɛ tue hu nɛ o kɛ nuɔ nɔ́, se mɛni tutuutu o nu?”

²¹ Yawɛ ji Mawu nɛ suɔ kaa e ma he o yi wami; lɔ ɔ he ɔ, e wo mlaa kpakpahi, e to blɔ nya nɛ hi saminya, nɛ e suɔ kaa e ma a nɛ ye a nɔ.

²² Se amlɔ nɛ ɔ, a fia e ma a ojo, nɛ a nuu ni ɔmɛ kɛ ya wo tsu. A kpɔ a níhi ngɛ a dɛ, nɛ a ha a níhi; nɛ nɔ ko nɔ ko bɛ nɛ e ba je ngmlaa ha mɛ.

²³ Nyɛ kpɛti mɛnɔ maa bu nɔ́ nɛ ɔ tue? Kɛ je be nɛ ɔ kɛ yaa a, mɛnɔ ma ta tue, konɛ e nu níhi nɛ maa ba a?

²⁴ Mɛnɔ lɛ ngɔ Yakob kɛ ha nɛ a ha e níhi, nɛ mɛnɔ ha nɛ a fia lɛ ojo ɔ? Yawɛ nitsɛ, nɔ nɛ wa pee yayami kɛ si ɔ, lɛ ji nɔ nɛ ha enɛ ɔmɛ tsuo ba! Wa bɛ wa je mi bɔ nɛ e ngɛ hlae, nɛ mlaa amɛ nɛ e wo wɔ ɔ hu wa yi a nɔ.

²⁵ Lɔ ɔ he ɔ, e ha wa nu e mi mi fumi nɛ nya wa a he, nɛ ta nɛ nya wa ba tua wɔ. E mi mi la a mle kɛ wo Israel he kɛ kpe, se a li nɔ́ nɛ ngɛ nɔ yae ɔ; wa kase we nɔ́ ko kulaa kɛ ji mi.