Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Yesaya 41 - BAIBLO ALOO NGMAMI KLƆUKLƆU Ɔ


Mawu ma e munyu nɔ mi ha Israel

1 Mawu ke, “Nyɛ, wo nya mahi, nyɛɛ pee dii, nɛ nyɛɛ bu mi tue! Nyɛ dla nyɛ he saminya, konɛ waa hyɛ sane ɔ mi! Nyɛɛ hɛ nyɛ kɛ ba, konɛ nyɛ ba je nyɛ nya, nɛ waa hyɛ nɔ nɛ nɔ́ da.

2 “Jamɛ a kunimi yelɔ ɔ nɛ yeɔ kunimi ngɛ he tsuaa he ɔ, mɛnɔ lɛ ngɔ lɛ kɛ je beleku je kɛ ba? Mɛnɔ haa nɛ e yeɔ matsɛmɛ, kɛ je ma amɛ a nɔ ɔ? E kɛ e klaate peeɔ mɛ butuu kaa bunyuku, nɛ e kɛ̃ɛ̃ ɔ gbɛɛ mɛ fĩaa kaa nga nɛ kɔɔhiɔ muɔ kɛ yaa.

3 E nyɛɛɔ a se kɛ fo wawɛɛ kaa nɔ́ nɛ e nane ma we zugba, nɛ e nine ya suu a nɔ kɛ̃.

4 Mɛnɔ ji nɔ nɛ pee enɛ ɔ? Mɛnɔ lɛ tsɛ yi nɔ ɔmɛ tsuo kɛ je sisije? Sisije ɔ, imi Yawɛ, i ngɛ lejɛ ɔ; nɛ nyagbe ɔ hu, imi Yawɛ nɔuu ma hi lejɛ ɔ.

5 “Nihi nɛ a ngɛ wo nya ma amɛ a mi ɔ na nɔ́ nɛ i tsu ɔ, nɛ a ye gbeye; je ɔ tsuo mimiɛ. Lɔ ɔ he ɔ, mɛ tsuo a bua a he nya nɛ a ba.

6 Nɔ tsuaa nɔ piɛɔ e nyɛmi ní tsulɔ he. A woɔ a sibi bua, nɛ a deɔ ke, ‘Na tsui!’

7 Tso galɔ deɔ sika tsu galɔ ke, ‘O bɔ mɔde, e hi!’ Nɔ nɛ kɛ hamle ngɛ amaga a he dlae ɔ hu woɔ nɔ nɛ ngɛ ní tsue ngɛ sɔ̃ tɛ nɔ ɔ he wami jã kɛ̃; e deɔ nɔ́ sɔ̃lɔ ɔ ke, ‘Bɔ nɛ o sɔu ɔ hi.’ Kɛkɛ ɔ, a ngɔɔ plɛɛko bihi kɛ kaa, konɛ e ko kpɔ.

8 “Se mo, ye tsɔlɔ Israel, mo ji ma nɛ i hla, ye huɛ Abraham nina.

9 I ngɔ mo kɛ je je ɔ nyagbe he ɔmɛ kɛ ba; i tsɛ mo kɛ je ma se lokoo, nɛ i de mo ke, ‘Ye tsɔlɔ ji mo.’ I kua we mo, se mohu, i hla mo.

10 Koo ye gbeye. I kɛ mo ngɛ! Ko ha nɛ nɔ́ ko nɛ wo o he gbeye. Imi ji o Mawu ɔ nɛ! Ma wo mo he wami; ma piɛ o he; Ma bu o he, nɛ ma baa o yi.

11 “Hyɛ, nihi tsuo nɛ a mi mi fu mo ɔ, zo maa gbe mɛ, nɛ a hɛ mi ma pue si. Nihi nɛ kɛ mo ná a, a hɛ mi ma kpata pɛsɛpɛsɛ.

12 Nihi tsuo nɛ kɛ mo ná a, o be mɛ nae hu; nihi nɛ hia ta wo mo ɔ, a hɛ mi ma kpata pɛsɛpɛsɛ.

13 Ejakaa imi ji Yawɛ, o Mawu ɔ nɛ; imi lɛ i ngɛ mo he wami woe ɔ nɛ, i ngɛ mo dee ke, ‘Koo ye gbeye! Ma piɛ o he!’ ”

14 Yawɛ ke, “Yakob, o ngɛ kaa gɔgɔ kɛkɛ; o Israel, ma nɛ o he wɛ, koo ye gbeye; ma piɛ o he. Imi, Israel Mawu klɔuklɔu ɔ, imi ji o yi wami helɔ.

15 Hyɛ, ma pee mo kaa ngma mi sami he klama kɛ e lunguhi nɛ a nya ba. O maa ywia yo ɔmɛ, nɛ o maa pee mɛ butuu; o maa pee yoku ɔmɛ kaa jakati.

16 O maa fɔ̃ mɛ kɛ ya kɔɔhiɔ mi; nɛ kɔɔhiɔ maa muɔ mɛ kɛ ho. Ahumi maa gbɛ mɛ kɛ fĩa; se moo lɛɛ, o bua maa jɔ saminya; ejakaa imi ji o Mawu ɔ nɛ. O ma je imi! Israel Mawu Klɔuklɔu ɔ, ye yi.

17 “Ke ye ma a ní pee mɔbɔ, nɛ a nɛ nyu nɛ a nu, a kuɔ si tsuo gbli, nɛ kuma ngɛ mɛ yee ɔ, ke a fa kue kɛ tsɛ imi Yawɛ ɔ, ma bu mɛ tue. Imi Israel Mawu ɔ, i be mɛ kuae kɔkɔɔkɔ.

18 Ma ha pahi maa hia ngɛ yo kpataa amɛ a nɔ, nɛ nyu maa fo dɔ ngɛ kɔ̃ ɔmɛ a mi. Ma ha nga kplanaa a nɔ ma plɛ pee taku, nɛ nyu maa ba babaaba ngɛ zugba gbigbli ɔ nɔ.

19 Ma ha seda tso, akasia tso, mɔmɔ tso, kɛ oliv tso maa bɔ ngɛ nga kplanaa a nɔ. Ma ha zugba nɛ nɔ́ ko be nɔ ɔ ma plɛ pee hue nɛ sɛsɛo, papao, kɛ nga mi tsohi ngɛ mi.

20 Mahi tsuo maa na nyakpɛ nɔ́ nɛ ɔ, nɛ a maa le kaa imi Yawɛ, Israel Nɔ Klɔuklɔu ɔ nɛ i tsu nɔ́ nɛ ɔ nɛ.”


Yawɛ pue lakpa mawu ɔmɛ a hɛ mi si

21 Yawɛ, Israel matsɛ ɔ ke, “Nyɛ je ma amɛ, nyɛɛ jaje nyɛ sane ɔ nɛ waa nu. Nyɛ je nyɛ we odase ɔmɛ kpo.

22 Nyɛɛ ba nɛ nyɛ ba gba níhi nɛ maa ba hwɔɔ se, konɛ ke a ba mi ɔ, waa le kaa ja nyɛ de ɔ nɛ. Níhi nɛ ba momo ɔ, nyɛ gba mi kɛ tsɔɔ wɔ, nɛ nyɛɛ tsɔɔ wɔ a sisi.

23 Nyɛɛ gba níhi nɛ maa ba hwɔɔ se, kɛkɛ wa maa na kaa mawuhi ji nyɛ niinɛ! Nyɛɛ pee nɔ́ ko nɛ hi saminya, aloo nyɛ ha nɛ haomi ko nɛ ba; nyɛɛ pee nɔ́ ko nɛ maa wo wa he gbeye, loo nɔ́ ko nɛ maa pee wɔ nyakpɛ nɛ waa hyɛ!

24 Nyɛɛ hyɛ, nyɛ pi nɔ́ ko nɔ́ ko kulaa, nɛ nyɛ ní tsumi hu nɔ ko bui fɛɛ; nihi nɛ jaa nyɛ ɔ, nimli guhi ji mɛ; a ngɛ kaa nyɛ kɛ̃.

25 “I ha nɛ nɔ ko je beleku je kɛ ma nɛ e kɛ nyɛ ba kpe. E maa ba ngɛ ye biɛ mi. E ma ba tua nyɛ kɛ je omleyi je. E maa naa nɔ yeli a nɔ kaa a naa zu, loo kaa buɛ puɛlɔ pɔtɔɔ zu.

26 Nyɛ ti mɛnɔ gba enɛ ɔ kɛ to momo ke bɔ nɛ e maa ba ji nɛ ɔ, konɛ wa de ke, ‘Ja tutuutu o gba a nɛ.’ Nyɛ ti nɔ ko nɔ ko de we nɔ́ nɛ ɔ he nɔ́ ko. Nɔ ko nɔ ko wui nɔ ta, nɛ nɔ ko nɔ ko nui hulɔ.

27 Imi Yawɛ ji kekleekle nɔ nɛ bɔ Zion amaniɛ nɛ ɔ. Imi nɛ i tsɔ nɔ Yerusalem kɛ manye munyu ke, ‘O ma mi bi ɔmɛ ma oo! A ma we!’

28 Benɛ i hyɛ ɔ, nɔ ko nɔ ko be a mawu ɔmɛ a kpɛti nɛ nyɛ́ de nɔ́ ko kulaa. Ke i bi mɛ munyu hu, nɔ ko nɔ ko nyɛ we nɛ e ha mi heto.

29 Nyɛɛ hyɛ, mawu nɛ ɔmɛ tsuo pi nɔ́ ko nɔ́ ko kulaa; a nyɛ we nɔ́ ko kpakpa nɛ a tsu. Amaga amɛ nɛ a puɛ ɔ, a he be se nami; a ngɛ kaa kɔɔhiɔ kɛkɛ.”

Bible in Dangme © Bible Society of Ghana, 2018.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ