Yesaya 38 - BAIBLO ALOO NGMAMI KLƆUKLƆU Ɔ

Matsɛ Hezekia ba nu hiɔ

¹ Jamɛ a be ɔ mi ɔ, Matsɛ Hezekia ba nu hiɔ, nɛ e miɔ nɛ e ma gbo. Kɛkɛ nɛ gbalɔ Yesaya, Amoz binyumu ɔ ya nɛ e ya de lɛ ke, “Bɔ nɛ Yawɛ de ji nɛ ɔ nɛ: ‘Moo to o níhi blɔ nya ngɛ o we ɔ mi, ejakaa o yi be wami nae; o ma gbo!’ ”

² Hezekia plɛ e hɛ mi ngɔ wo gbogbo, nɛ e fa kue ha Yawɛ nɛ e de ke,

³ “Yawɛ, i kpa mo pɛɛ nɛ o kai bɔ nɛ i ba ye je mi ngɛ o hɛ mi, bɔ nɛ i ye mo anɔkuale, bɔ nɛ i sɔmɔ mo kɛ ye tsui tsuo, kɛ bɔ nɛ i pee o suɔmi nya ní.” Nɛ Hezekia fo ya kɛ he hiami.

⁴ Kɛkɛ nɛ Yawɛ de Yesaya

⁵ ke e ya nɛ e ya de Hezekia ke, “Imi Yawɛ, o nɛ̃ David Mawu ɔ, i nu o kue fami ɔ, nɛ i na o hɛ mi vo nyu ɔ. Ma ngɔ jeha nyɔngma kɛ enuɔ ngɔ piɛ o wami ligbi ɔmɛ a he ha mo.

⁶ Ma he o kɛ Yerusalem yi wami kɛ je Asiria matsɛ ɔ dɛ mi, nɛ ma bu ma a he.”

²¹ Yesaya de matsɛ tsɔli ɔmɛ ke, “Nyɛɛ wɛɛ ngmɔkɔ nɛ nyɛɛ ngɔ kɛ ya to e tslɔɔ ɔ nɔ, kɛkɛ e ma na he wami.”

²² Kɛkɛ nɛ Hezekia hu bi Yesaya ke, “Mɛni okadi o maa to mi kaa niinɛ ma nyɛ ma ya Yawɛ we ɔ?”

⁷ Yesaya he nɔ ke, “Yawɛ ma ha mo okadi nɛ ɔ kɛ tsɔɔ kaa si nɛ e wo mo ɔ, e maa ye nɔ.

⁸ Ma ha nɛ nini ɔ nɛ ngɛ pu ngmlɛ nɛ Matsɛ Ahaz pee ɔ nɔ ɔ nɛ kpale kɛ ba se nane hiami nyɔngma.” E ba mi ja; niinɛ Yawɛ ha pu ɔ kpale e se, nɛ nini ɔ nɛ ngɛ pu ngmlɛ ɔ nɔ ɔ kpale e se nane hiami nyɔngma nɛ e nyɛɛ momo ɔ.

⁹ Benɛ Yuda matsɛ Hezekia na he wami ɔ, e ngma yi jemi la nɛ ɔ.

¹⁰ I de ngɛ ye yi mi ke ye nihe be mi ma gbo ngɛ. Ee, ye wami be nɛ piɛ ɔ, gbeje ma ye lɛ tsuo ngɛ.

¹¹ I susu kaa i be Yawɛ nae gblegbleegble ngɛ hɛ kali a zugba nɛ ɔ nɔ. I susu hu kaa i be ye nyɛmimɛ adesahi nae ngɛ je nɛ ɔ mi hu.

¹² A po ye wami nɔ kpiti kulaa; ye wami ɔ nya ta. E pee kaa to hyɛlɔ bo tsu nɛ a kpa ngɔ fɔ si, loo kaa bo nɛ bo lolɔ po nɔ ngɛ e bo lomi tso ɔ he. I susu kaa Mawu ha ye wami nyagbe ma amlɔ nɔuu.

¹³ Nyɔ mi tsuo i ngɛ kɛmɛe kaa nɔ́ nɛ jata lɛ ngɛ ye mi wuhi kue. I susu kaa Mawu ha ye wami nyagbe ma amlɔ nɔuu.

¹⁴ Ye gbi mia, he wami ko be hu. I ngɛ kɛmɛe kaa beleku lahuɛ. I hyɛ hiɔwe hluu kɛ ya si pɔ tɔ ye hɛngmɛ he. Nyɔmtsɛ, i kpa mo pɛɛ, e fi mi; jé mi kɛ je haomi nɛ ɔ mi.

¹⁵ Kɛ ma de kɛɛ? Bɔ nɛ e de ɔ, jã e pee ɔ nɛ. Ye tsui ngɛ yee sɔuu, i nyɛ we ma hwɔ mahe.

¹⁶ Nyɔmtsɛ, o nɔ ji mi. Ee, mo pɛ o nɔ i ngɔ ye hɛ kɛ fɔ. Ha ma na he wami ekohu, nɛ ye yi nɛ na wami.

¹⁷ Niinɛ, kpakpa nɛ o ngɛ hlae ha mi he je nɛ haomi nɛ nya wa nɛ ɔ ba ye nɔ ɔ nɛ; se o je mi kɛ je hɛ mi kpatami mi; ejakaa o kɛ ye he yayami ɔmɛ tsuo pa mi.

¹⁸ Ni gbogboehi be nyɛe ma je o yi. Ee, ni gbogboehi be nyɛe maa na mo si. Ni gbogboehi be nyɛe maa ngɔ a hɛ kɛ fɔ o nɔ kaa o yeɔ anɔkuale be tsuaa be.

¹⁹ Nihi nɛ ngɛ hɛ ngmengmle! Ee, hɛ ngmengmletsɛmɛ nɛ a jeɔ o yi kaa bɔ nɛ i ngɛ o yi jee mwɔnɛ nɛ ɔ. Tsɛmɛ tsɔɔ a bimɛ ɔmɛ ke o yeɔ anɔkuale be tsuaa be.

²⁰ Yawɛ, o he ye yi wami; lɔ ɔ he ɔ, wa wami ligbihi tsuo ɔ, wa ma la, nɛ wa maa fia kpa saku kɛ to he kɛ je mo, Yawɛ o yi, ngɛ o we ɔ.