Yesaya 37 - BAIBLO ALOO NGMAMI KLƆUKLƆU Ɔ

Matsɛ Hezekia ya bi Yesaya ga womi

¹ Benɛ Matsɛ Hezekia nu amaniɛ ɔ, e kɛ aywilɛho hía e tade ɔmɛ ngɛ e he. E ha kpekpe ya bo, nɛ e pue nɔ kɛ ho Yawɛ we ɔ ya.

² E tsɔ Eliakim, matsɛ we ɔ nɔ hyɛlɔ ɔ, Shebna, matsɛ pɛdiyo ɔ, kɛ osɔfo ɔmɛ a nikɔtɔma amɛ kɛ ya na gbalɔ Yesaya, Amoz bi ɔ. Tsɔli ɔmɛ hu ha kpekpe ya bo.

³ Sɛ gbi nɛ e ha mɛ kɛ ya ha Yesaya a ji, “Mwɔnɛ ligbi nɛ ɔ, wa yi fi; a jɛ wɔ, nɛ a pue wa hɛ mi si. Wa pee kaa yo nɛ nu kɔɔmi, se e be he wami nɛ e kɛ maa kɛ̃ bi ɔ kɛ je kpo.

⁴ Asiria matsɛ tsɔ e we asafoatsɛngua a kɛ ba jɛ Mawu hɛ kalɔ ɔ. Wa heɔ yeɔ kaa Yawɛ, o Mawu ɔ nu kikɛmɛ a jɛmi ɔ, nɛ ni nɛmɛ nɛ bɔ musu nɛ ɔ, e maa gbla a tue. Lɔ ɔ he ɔ, moo fa kue ha Yawɛ kɛ ha wa ti ni nɛmɛ nɛ piɛ ngɛ hiɛ ɔ.”

⁵ Benɛ Yesaya nine su Matsɛ Hezekia sɛ ɔ nɔ ɔ,

⁶ e ngɔ Yawɛ sɛ gbi nɛ ɔ mane lɛ ke, “Munyuhi nɛ nyɛ nu nɛ Asiria matsɛ tsɔli ɔmɛ ba tu kɛ pue ye hɛ mi si ɔ, nyɛ ko ye gbeye ngɛ he.

⁷ Hyɛ! Ma ha mumi ko maa ba e nɔ, nɛ e maa nu akeake munyu ko nɛ ma ha e maa kpale kɛ ya lɛ nitsɛ e zugba nɔ, nɛ ma ha e maa nɔ ngɛ ta mi ngɛ lejɛ ɔ.”

Asiria bi ɔmɛ tsɔ kɛ ba ekohu

⁸ Asiria asafoatsɛngua a nu kaa Asiria matsɛ ɔ hia kɛ je Lakish, nɛ e kɛ Libna bi ya ngɛ ta hwue. Lɔ ɔ he ɔ, e ho nɛ e ya na lɛ ngɛ lejɛ ɔ.

⁹ Kɛkɛ nɛ gbi ko ba su Asiria matsɛ ɔ, kaa Sudan matsɛ, Tirhaka hia ta kɛ nyɛɛ Egipt tabo ɔ hɛ mi kɛ ma nɛ e ba tua lɛ. Benɛ Asiria matsɛ ɔ nu sane nɛ ɔ, e ngma womi, nɛ e tsɔ kɛ ya ha Yuda matsɛ, Hezekia.

¹⁰ Bɔ nɛ e ngma ngɛ womi ɔ mi ji nɛ ɔ nɛ: “Ko ha nɛ o Mawu ɔ nɛ o ngɔ o hɛ ngɔ fɔ e nɔ ɔ nɛ mlɔɔ mo ke i be nyɛe ma ngɔ Yerusalem.

¹¹ Mo nitsɛ o nu níhi nɛ Asiria matsɛmɛ ɔmɛ pee zugba amɛ; bɔ nɛ a kpata a hɛ mi butuu. Nɛ moo lɛɛ o susu kaa o maa ye o he lo?

¹² Benɛ nɛnɛmɛ kpata Gozan, Haran, kɛ Rezef ma amɛ a hɛ mi, nɛ a gbe Beteden bi ɔmɛ ngɛ Telasa zugba a nɔ ɔ, anɛ a mawu ɔmɛ nyɛ a yi wami he lo?

¹³ Hamat matsɛ, Arpad matsɛ, Sefarvaim matsɛ, Hena matsɛ, kɛ Iva matsɛ ɔ, jije a ngɛ?”

¹⁴ Matsɛ Hezekia he womi ɔ ngɛ tsɔli ɔmɛ a dɛ, nɛ e kane. Lɔ ɔ se ɔ, e ho Yawɛ we ɔ ya, nɛ e ya bli womi ɔ mi gbajaa ngɔ pue si ngɛ Yawɛ hɛ mi,

¹⁵ nɛ e fa kue ke,

¹⁶ “Yawɛ Tabohiatsɛ Israel Mawu lee, mo nɛ o hii si ngɛ o matsɛ sɛ nɔ ngɛ kerub ɔmɛ a yi mi lokoo; mo nɔ kake too pɛ ji Mawu, nɛ je nɛ ɔ mi matsɛ yemi ɔmɛ tsuo ngɛ o sisi. Mo lɛ o bɔ hiɔwe kɛ zugba!

¹⁷ Yawɛ, wa kpa mo pɛɛ jehanɛ, mo bli o hɛngmɛ nɛ o hyɛ nɔ́ nɛ a ngɛ wɔ pee! Yawɛ, mo ta tue nɛ o nu munyuhi nɛ Senakerib ngɛ tue kɛ ngɛ mo, Mawu hɛ kalɔ ɔ, o he guɛ gbee!

¹⁸ Yawɛ, wɔ tsuo wa le kaa Asiria matsɛmɛ ɔmɛ kpata je mahi, kɛ a zugbahi babauu a hɛ mi,

¹⁹ nɛ a sã a mawu ɔmɛ. A kpata a hɛ mi, ejakaa tsa pi mawu nitsɛnitsɛhi ji mɛ; nimli a nine nya ní tsumihi, kɛ tsohi, kɛ tɛhi kɛkɛ ji mɛ.

²⁰ Lɔ ɔ he ɔ, Yawɛ, wa Mawu, i kpa mo pɛɛ nɛ o kpɔ wɔ kɛ je Asiria matsɛ ɔ dɛ mi, konɛ je ma amɛ tsuo pɛpɛɛpɛ nɛ a le kaa mo Yawɛ, mo nɔ kake too ji Mawu.”

Yesaya kɛ sɛ gbi mane Hezekia

²¹ Kɛkɛ nɛ Amoz binyumu Yesaya tsɔ ke a ya de Hezekia ke, “Yawɛ, Israel Mawu ɔ ke, kue nɛ o fa ha lɛ ngɛ Asiria matsɛ, Senakerib he ɔ, e nu.”

²² Nɔ́ nɛ Yawɛ ngɛ Asiria matsɛ ɔ dee ji nɛ ɔ nɛ: “Asiria matsɛ, Zion biyo, yomiyo ɔ ngɛ mo muɔe oo!

²³ Mɛnɔ he fɛu o ye ɔ? Mɛnɔ ahlua o bɔ ɔ? Mɛnɔ nɔ o wo o nya nɔ ngɛ ɔ? Mɛnɔ o bui ɔ? Pi imi, Israel Mawu klɔuklɔu ɔ lo?

²⁴ O tsɔ o tsɔli kɛ ba ye imi Nyɔmtsɛ ɔ ye he fɛu, nɛ o de ke, ‘I ngɔ ye ta zugba lɛhi kɛ kuɔ yo ɔmɛ kɛ ya su Lebanon tɔɔ. I poo Lebanon seda tso gagaa amɛ, kɛ sɛsɛo saminyawiiwi ɔmɛ ngɔ pue si. I sɛ Lebanon hue kusuu ɔ mi kɛ ya tsitsaa lokoo.

²⁵ I tsua vuhi nɛ i nu ma se zugba nɔ nyu; i ngɔ ye nane sisi kɛ naa Egipt pa amɛ tsuo a mi nɛ nyu ɔ ta!’

²⁶ “Anɛ o nui kaa i bɔni nɔ́ nɛ ɔ he ní tsumi kɛ je kɛ lo? Nɔ́ nɛ i ngɛ pee nɛ ɔ, i to he ga kɛ je blema lokoo, konɛ mahi nɛ a fia gbogbo ngɔ wo a he ɔ, nyɛɛ pee mɛ ma dokuhi.

²⁷ Nimli nɛ ngɛ ma amɛ a mi lɛɛ a he wami nɔ gbɔ. A tsui po, nɛ bibi gbe mɛ. A pee kaa nga mi tsohi. A pee kaa nga mumu, loo nga nɛ pu sã lɛ, nɛ e ngla ngɛ tsu yi mi.

²⁸ “I le o he nɔ́ tsuaa nɔ́, nɔ́ nɛ o peeɔ, he nɛ o yaa, kɛ bɔ nɛ o kɛ mi tuɔ munyu basabasa a.

²⁹ Akɛnɛ o kɛ mi tuɔ munyu basabasa, nɛ i nu o he nɔ womi hu he he je ɔ, ma ngɔ gbowe kɛ wo o gugwɔ mi; ma wo o nya mi dade, nɛ ma kpale mo kɛ gu blɔ nɛ o gu kɛ ba a nɔ.”

³⁰ Jehanɛ, Yesaya de Matsɛ Hezekia ke, “Enɛ ɔ maa pee okadi ha mo; jeha nɛ ɔ mi ɔ, nyɛ maa ye níhi nɛ mɛ nitsɛmɛ a puɛ, níhi nɛ nɔ ko du we. Jeha enyɔne ɔ mi ɔ, nyɛ maa ye níhi nɛ puɛ ngɛ lɔ ɔmɛ a se. Jeha nɛ ji etɛ ɔ mi lɛɛ nyɛ ma du ní, nɛ nyɛ ma kpa ní; nyɛ maa pee wai ngmɔhi nɛ nyɛ maa ye a yiblii.

³¹ Yuda we ɔ mi ni nɛmɛ nɛ a yi ma na wami ɔ, a ma plɔke kaa tsohi; a ma tsɛ̃ sipoku kɛ ya zu mi ekohu, nɛ a maa wo yiblii.

³² Ni komɛ maa piɛ kɛ̃, nɛ a maa je Yerusalem kɛ Zion yo ɔmɛ a nɔ kɛ ya; ejakaa Yawɛ Tabohiatsɛ ɔ ma tsu nɔ́ nɛ ɔ kɛ hɛdɔ.

³³ “Lɔ ɔ he ɔ, bɔ nɛ Yawɛ de ngɛ Asiria matsɛ ɔ he ji nɛ ɔ nɛ: ‘E be ma nɛ ɔ mi sɛe, nɛ e be kɛ̃ɛ̃ kake po tsɛ̃e kɛ ba hiɛ ɔ. Ta buli nɛ hɛɛ tsɛ̃i be ma a he sue, nɛ a be kpoku ko fiae kɛ wo ma a he.

³⁴ Blɔ nɛ e gu nɔ kɛ ba a, jamɛ a blɔ ɔ nɔ nɔuu e maa gu kɛ kpale kɛ ho; se ma nɛ ɔ mi lɛɛ e be sɛe. Imi, Yawɛ lɛ i de.

³⁵ Ejakaa ma bu ma nɛ ɔ he; nɛ nɔ́ ko nɔ́ ko be a he sae. Ma pee nɔ́ nɛ ɔ ngɛ ye tsɔlɔ David he kɛ wo imi nitsɛ ye hɛ mi nyami.’ ”

³⁶ Jamɛ a nyɔ ɔ mi nɔuu ɔ, Yawɛ bɔfo ko ya gbe ta buli 185,000 ngɛ Asiria ta a mi. E nɔ jena makɛ ɔ, ne mɛ nɛ a gbo kɛ pueɔ si.

³⁷ Kɛkɛ nɛ Asiria matsɛ Senakerib hia kɛ je lejɛ ɔ, nɛ e kpale kɛ ho Nineve ya.

³⁸ Ligbi ko, benɛ e ngɛ e mawu ɔ nɛ a tsɛɛ Nisrok ɔ jae ngɛ e mawu ɔ we ɔ mi ɔ, e binyumuhi enyɔ, Adramelek kɛ Sharezer kɛ klaate ya gbe lɛ, nɛ a tu fo kɛ ho Ararat zugba a nɔ ya. E bi nyumu kpa nɛ a tsɛɛ lɛ Esarhadon ba ye matsɛ ngɛ e se.