Yesaya 36 - BAIBLO ALOO NGMAMI KLƆUKLƆU Ɔ

Asiria wo Yerusalem he gbeye

¹ Yuda matsɛ, Hezekia yi nɔ jeha nyɔngma kɛ eywiɛne ɔ, Asiria matsɛ, Senakerib ba tua Yuda mahi nɛ a fia gbogbo ngɔ wo a he ɔ, nɛ e ngɔ ma amɛ.

² Lɔ ɔ se ɔ, e fa e we asafoatsɛ nɔkɔtɔma kɛ e ta buli babauu kɛ je Lakish ke a ya Yerusalem nɛ a ya de Matsɛ Hezekia ke e ha yi. Asafoatsɛ ɔ kɛ e ta a ba da si ngɛ yiti je taku ɔ nyu dɔ ɔ he, ngɛ gbɛjegbɛ ɔ nɔ kɛ yaa ní a he fɔli ɔmɛ a ní tsumi he ɔ.

³ Kɛkɛ nɛ ni etɛ nɛ ɔmɛ je kpo nɛ a kɛ lɛ ba kpe: Hilkia bi Eliakim nɛ hyɛɛ matsɛ we ɔ nɔ ɔ; Shebna, matsɛ pɛdiyo ɔ; kɛ Asaf bi Yoa nɛ ngmaa sanehi kɛ toɔ ɔ.

⁴ Asiria asafoatsɛ ɔ de mɛ ke Asiria matsɛ nguaa a tsɔ mɛ ke a ba bi Matsɛ Hezekia nɔ́ nɛ ha nɛ e yi nɔ́ ko nɔ́ ko gbeye ɔ.

⁵ E bi lɛ ke, “Anɛ o susuu kaa nya puu peemi ji ga kɛ he wami nɛ a kɛ hwuɔ ta lo? Mɛnɔ nɔ po o ngɔ o hɛ kɛ fɔ loko o tsɔ ye hɛ mi atuã a?

⁶ Tse o ngɛ blɔ hyɛe kaa Egipt ma ba piɛ o he? O ngɛ kaa nɔ ko nɛ e kɛ gla pee dɛma tso; gla a maa ku nɛ e maa gbɔ o dɛ mi. Egipt matsɛ ɔ ngɛ kaa gla. E gbɔɔ nɔ tsuaa nɔ nɛ ngɔɔ e he kɛ kpasaa lɛ.”

⁷ Asiria asafoatsɛ ɔ ya nɔ nɛ e de ke, “Aloo o ma de mi ke o ngɔ o hɛ ngɔ fɔ Yawɛ, o Mawu ɔ nɔ! Anɛ pi Yawɛ jami he ɔmɛ, kɛ bɔ sami la tɛ ɔmɛ nɛ Hezekia ywia a? Pi lɛ nɛ e de Yuda, kɛ Yerusalem ke a ya ja Mawu ngɛ bɔ sami la tɛ ɔ nɛ ngɛ Yerusalem ɔ pɛ hɛ mi lo?

⁸ I kɛ mo maa po nga ngɛ ye nyɔmtsɛ, Asiria matsɛ ɔ biɛ mi. Ma ha mo okpɔngɔ akpe enyɔ kaa o ma na mo nitsɛ o nihi nɛ maa hi a nɔ lo.

⁹ O ngɛ blɔ hyɛe nɛ Egipt ba ha mo ta zugba lɛhi kɛ okpɔngɔ ta buli, be mi nɛ ye nyɔmtsɛ ɔ we asafoatsɛ nyafii pe kulaa a po o be lɛ nyɛe.

¹⁰ O susu kaa loko ma ba tua ma nɛ ɔ nɛ ma kpata e hɛ mi ɔ, Yawɛ li he nɔ́ ko lo? Yawɛ nitsɛ lɛ de mi ke ma ba tua ma a, nɛ ma kpata e hɛ mi.”

¹¹ Kɛkɛ nɛ Eliakim, Shebna, kɛ Yoa de asafoatsɛ ɔ ke, “Wa kpa mo pɛɛ, kɛ wɔ nɛ tu Aram gbi. Wa nuɔ Aram gbi ɔ. Koo tu Hebri gbi; nihi tsuo nɛ ngɛ gbogbo ɔ nɔ ɔ ngɛ wɔ tue bue.”

¹² Se asafoatsɛ ɔ he nɔ ke, “Anɛ nyɛ susuu kaa nyɛɛ kɛ nyɛ matsɛ ɔ ngɔ kɛkɛ matsɛ nguaa tsɔ mi ke ma ba de nyɛ ní nɛ ɔmɛ lo? Nihi nɛ pueɔ si ngɛ gbogbo ɔ nɔ ɔ, mɛ hu munyu nɛ ɔ kɔɔ a he; a maa ye mɛ nitsɛmɛ a fĩ, nɛ a maa nu mɛ nitsɛmɛ a zami kaa nyɛ nɔuu.”

¹³ Kɛkɛ nɛ asafoatsɛ ɔ te da si nɛ e kpa ngmlaa ngɛ Hebri gbi ɔ mi ke, “Nyɛɛ bu nɔ́ nɛ Asiria matsɛ nguaa ngɛ nyɛ dee ɔ tue.

¹⁴ E ke, ‘Nyɛ ko ha nɛ Hezekia nɛ sisi nyɛ; ejakaa Hezekia be nyɛe ma kpɔ nyɛ kɛ je e dɛ mi.’

¹⁵ Nyɛ ko ha nɛ Hezekia munyu nɛ e tu ke nyɛɛ ngɔ nyɛ hɛ ngɔ fɔ Yawɛ nɔ ɔ nɛ ngɔ nyɛ nya. Nyɛ ko susu kaa Yawɛ ma he nyɛ yi wami, nɛ e be hae nɛ Asiria matsɛ ɔ nɛ ngɔ nyɛ ma a.

¹⁶ Nyɛ ko bu Hezekia tue tete! Ejakaa Asiria matsɛ ɔ ngɛ nyɛ fae ke nyɛɛ ba nɛ nyɛɛ kɛ lɛ ba kpata. Kɛkɛ ɔ, nyɛ maa ye nyɛ he, nɛ nɔ tsuaa nɔ maa ye lɛ nitsɛ e wai, kɛ ngmɔkɔ yiblii, nɛ nɔ tsuaa nɔ maa nu lɛ nitsɛ e vu mi nyu,

¹⁷ hluu kɛ yaa si be nɛ matsɛ nguaa a ma kpaka nyɛ kɛ ya zugba ko nɛ ngɛ kaa nyɛ nitsɛmɛ nyɛ zugba a nɔ. Wai ngmɔhi ngɛ lejɛ ɔ nɛ nyɛɛ kɛ maa pee wai; blɛfo ngɛ lejɛ ɔ nɛ nyɛɛ kɛ maa pee abolo.

¹⁸ Nyɛ ko ha nɛ Hezekia nɛ mlɔɔ nyɛ ke Yawɛ ma he nyɛ yi wami. Anɛ je ma amɛ a mawu ɔmɛ eko nyɛ kpɔ e zugba kɛ je Asiria matsɛ ɔ dɛ mi hyɛ lo?

¹⁹ Jije Hamat, kɛ Arpad mawu ɔmɛ ngɛ? Nɛ jije Sefarvaim mawu ɔmɛ ngɛ. Anɛ a nyɛ kpɔ Samaria kɛ je ye dɛ mi lo?

²⁰ Je ma amɛ tsuo a mawu ɔmɛ a ti eko nyɛ kpɔ e ma kɛ je Asiria matsɛ ɔ dɛ mi hyɛ lo? Lɛɛ mɛni haa nɛ nyɛ susuɔ kaa Yawɛ ma nyɛ kpɔ Yerusalem ngɛ ye dɛ mɔ?”

²¹ Se ma a pee dii, nɛ a de we nɔ́ ko kaa bɔ nɛ Matsɛ Hezekia fa mɛ ke a pee ɔ.

²² Kɛkɛ nɛ Eliakim, Hilkia binyumu ɔ nɛ hyɛɛ matsɛ we ɔ nɔ ɔ, Shebna, matsɛ pɛdiyo ɔ, kɛ Yoa, Asaf binyumu ɔ nɛ ji sanehi ngmalɔ ɔ kɛ aywilɛho hía tade ɔmɛ ngɛ a he; nɛ a ho ya bɔ Matsɛ Hezekia níhi tsuo nɛ Asiria matsɛ ɔ we asafoatsɛ ɔ de ɔ.