Yesaya 34 - BAIBLO ALOO NGMAMI KLƆUKLƆU Ɔ

Mawu maa gbla e he nyɛli ɔmɛ a tue

¹ Nyɛ, je ma amɛ tsuo nyɛɛ ba! Nyɛ bua nyɛ he nya kɛ ba nɛ nyɛ ba bu tue. Zugba a tsuo, kɛ nɔ tsuaa nɔ nɛ ngɛ je ɔ mi, nyɛɛ ba nɛ nyɛ ba bu tue.

² Yawɛ mi mi fu je ma amɛ tsuo, nɛ e hɛ dɔ kɛ wo ta buli ɔmɛ tsuo. E gbiɛ mɛ, nɛ e ngɔ mɛ ngɔ ha ke a gbe mɛ.

³ A be ni nɛmɛ nɛ nɔ ɔ pue; a ma sake a gbogboe ɔmɛ kɛ pue he kɛ a he fu gbɛ̃ɛ̃; nɛ yo ɔmɛ a nɔ maa pee tsutsuutsu kɛ a muɔ ɔ sɔuu.

⁴ Pu, nyɔhiɔ, kɛ dodoe ma puplee maa pee kaa bunyuku. Hiɔwe ma koklo kaa womi kpo; nɛ dodoehi maa hɔle kɛ pue si kaa bɔ nɛ wai, loo ngmɔkɔ tso hɔleɔ ba kɛ pueɔ si ɔ.

⁵ Yawɛ pee e klaate ɔ klaalo ngɛ hiɔwe, konɛ jehanɛ e kɛ gbe Edom bi ɔmɛ nɛ e de ke a ma kpata a hɛ mi ɔ.

⁶ E klaate ɔ he maa pee kɛ muɔ kɛ zɔ kaa jijɔhi, kɛ akpakpohi a muɔ kɛ zɔ nɛ a kɛ ngɛ bɔ sãe. Yawɛ maa sã bɔ nɛ ɔ ngɛ Bozra ma a mi; e ma pue a muɔ si nyamaa ngɛ Edom zugba a nɔ.

⁷ Nimli ɔmɛ ma gbo kaa pu mi nahi, kɛ na ku katsɛmɛ. Zugba zu ɔ maa pee tsutsuutsu kɛ muɔ, nɛ zɔ ɔ ma futu zu ɔ tsɔfii.

⁸ Yawɛ to be ko nɛ e ma he Zion yi wami, nɛ e maa gbla a he nyɛli ɔmɛ a tue.

⁹ Edom pa amɛ ma plɛ pee ama, nɛ zugba a maa pee ama kala. Zugba a tsuo ma mle kɛ la kaa ama nɛ ngɛ tsoe.

¹⁰ E maa tso nyɔ kɛ pia, nɛ e be gboe. Zugba a nɔ maa je gu yi nɔhi babauu, nɛ nɔ ko nɔ ko be nɔ nyɛɛe hu.

¹¹ Se kayo, kɛ kɔtɔkɔ maa ngɔ lejɛ ɔ ngɔ pee a nɔ́; nɛ klomi kɛ kuakualabite maa hi lejɛ ɔ. Yawɛ ma ha zugba a nɔ maa je gu kulaa kaa bɔ nɛ e ngɛ be nɛ a bɔ je ɔ.

¹² Matsɛ ko be si hie nɛ maa ye ma a nɔ, nɛ ganɔ ɔmɛ tsuo maa ta.

¹³ Mɔhi tsuo nɛ a fia gbogbo ngɔ wo a he ɔ, pú kɛ mio tso maa puɛ ngɛ a mi, nɛ nga mi gbehi, kɛ dugumahi maa hi lejɛ ɔ.

¹⁴ Nga mi lohwehi, kɛ ogbeteehi ma ba kpe, nɛ nibɔ níhi kɛ a he gbeyegbeye (a yi je kaa nɔmlɔ, a nane kaa lohwe) ma ba fiɛ ngɛ lejɛ ɔ. Nyɔ mi kpadehi hu lejɛ ɔ nɔuu a ma ba jɔɔ a he ngɛ.

¹⁵ Klomi ma ba pee tsu ngɛ lejɛ ɔ. Lejɛ ɔ e maa ngmɛ hlui ngɛ, nɛ e ma pɛ bimɛ; nɛ e maa lɛ mɛ. Niinɛ, kayohi hu ma ba bua a he nya ngɛ lejɛ ɔ eku kɛ eyo, eku kɛ eyo.

¹⁶ Nyɛ hla ngɛ Yawɛ womi ɔ mi nɛ nyɛɛ kane. Nyɛ maa na kaa nibɔ ní nɛ ɔmɛ a ti ekoeko be laae, nɛ e he piɛlɔ be lɛ bɔe. Yawɛ lɛ fa, nɛ e mumi ɔ ha e ba mi ja.

¹⁷ Yawɛ nitsɛ lɛ fɔ sɔ nɛ e dla zugba a pɛpɛɛpɛ ha mɛ, nɛ nɔ tsuaa nɔ ná eko. Zugba a maa pee a nɔ́ kɛ maa ya neneene, nɛ lejɛ ɔ a maa hi daa.