Yesaya 32 - BAIBLO ALOO NGMAMI KLƆUKLƆU Ɔ

Matsɛ nɛ yeɔ dami sane

¹ Be ma nɛ matsɛ ko ma ba ye tsɛ. E maa ye ma a nɔ saminya, nɛ e ganɔ ɔmɛ tsuo maa ye dami sane.

² Nɔ tsuaa nɔ maa pee kaa wesa he ngɛ kɔɔhiɔ kɛ ahumi nya, kaa pa nɛ ywia nga ngɛ zugba kpataa nɔ, aloo kaa zugba kplanaa nɔ tɛ sa sisi hɔ̃.

³ Jamɛ a be ɔ mi ɔ, nɔ tsuaa nɔ hɛngmɛ maa hyɛ nɔ́ paa, nɛ e tue hu maa nu nɔ́ saminya.

⁴ Tsui hahaahatsɛmɛ maa to a tsui si, nɛ a kɛ juɛmi kpakpa ma tsu ní, nɛ mumu hali a nya mi ma tsɔ.

⁵ A be kuasia hɛ mi nyami woe hu, nɛ nɔ sisilɔ ɔ, a be lɛ tsɛe ke anɔkualetsɛ hu.

⁶ Ejakaa kuasia tuɔ munyu basabasa, nɛ e toɔ ga kaa e maa pee yayami. E tuɔ munyu, nɛ e peeɔ nɔ́ basabasa kɛ siɔ Yawɛ. Nɔ nɛ hwɔ ngɛ lɛ yee ɔ, e ha we lɛ nɔ́ ko nɛ e yeɔ kɔkɔɔkɔ, nɛ nɔ nɛ kuma ngɛ lɛ yee hu e ha we lɛ nyu tete po nɛ e nuɔ.

⁷ Nɔ sisilɔ ɔ, ní yayahi a he ga pɛ e toɔ. E yeɔ lakpa konɛ e kɛ kpata dɛgutsɛmɛ a hɛ mi. Ke a sane da po, bɔ nɛ e peeɔ mɛ ji nɛ ɔ nɛ.

⁸ Se nɔ nɛ hɛ mi ngɛ nyami ɔ lɛɛ ní kpakpahi a he e susuɔ, nɛ e yeɔ dami sane.

Tue gblami kɛ tue mi jɔmi maa ba

⁹ Nyɛ yihi nɛ nyɛ ngɛ mle yee, nɛ haomi ko be nyɛ nɔ, nyɛɛ bu nɔ́ nɛ i ngɛ nyɛ dee ɔ tue.

¹⁰ Amlɔ nɛ ɔ, nyɛ ngɛ kpɔtɔɔ mi; se nyɛ na nyɛɛ le kaa jeha kake kɛ ligbi bɔɔ komɛ a se ɔ, nyɛ maa hao; ejakaa nyɛ be wai yiblii nae ma kpa hu.

¹¹ Nyɛ yihi nɛ nyɛ he mi jɔ nyɛ, nɛ haomi ko be nyɛ nɔ, jehanɛ lɛɛ nyɛɛ ye gbeye, nɛ nyɛ he nɛ do blibliibli! Nyɛ kpa bo ngɛ nyɛ he, nɛ nyɛɛ hɛɛ nyɛ he gu. Nyɛɛ ngɔ kpekpe ya bo kɛ fi nyɛ mlɛ mi.

¹² Nyɛ gba nyɛ gugue ma, nɛ nyɛɛ ye kɔmɔ ngɛ ngmɔ kpakpa amɛ, kɛ wai nɛ baa saminya a he.

¹³ Nyɛɛ ye kɔmɔ ha ye ma mi bi ɔmɛ a zugba nɛ pú, kɛ mio tso hyi nɔ tɔ ɔ. Nyɛɛ wo yana ha ma a, kɛ we ɔmɛ nɛ bua jɔmi hi a mi sa be ko ɔ.

¹⁴ Mɔ ɔ po, nɔ ko nɔ ko be mi hie hu; nɛ ma nɛ hyi tɔ kɛ nimli babauu ɔ maa pee ma doku. Wehi, kɛ mɔhi nɛ bɔle mɛ kɛ kpe ɔ, a hɛ mi ma kpata kɛ maa ya neneene. Nga mi tejihi ma na bua jɔmi ngɛ lejɛ ɔ, nɛ tohi hu, lejɛ ɔ a maa ye ní ngɛ.

¹⁵ Se wɔ lɛɛ, Mawu ma ha wɔ e mumi ɔ kɛ je hiɔwe ekohu, nɛ wa ma na niye ní babauu kɛ je ngmɔ ɔmɛ a mi.

¹⁶ A maa ye dami sane ngɛ zugba a nɔ tsuo.

¹⁷ Dami sane nɛ ɔ kɛ tue mi jɔmi maa ba, nɛ a ma na he jɔmi kɛ maa ya neneene.

¹⁸ Haomi ko haomi ko be ye ma a nya gbae, nɛ tue mi jɔmi kɛ he jɔmi maa hi a we ɔmɛ a mi.

¹⁹ (Se gbiɛ ngo ngu maa nɛ pue a ngmɔ ɔmɛ a mi, nɛ a ma a hɛ mi ma kpata.)

²⁰ Jamɛ a be ɔ, nihi nɛ duɔ ní ngɛ pa nɛ nyu mi tɛ gblee tue ɔ, a bua maa jɔ a he. Jã kɛ̃ nihi nɛ tsí a nahi, kɛ a teji okpɔngɔhi a nya, se a ngmɛɔ a he nɛ a ya yeɔ ní faa a, a bua maa jɔ a he.