Yesaya 30 - BAIBLO ALOO NGMAMI KLƆUKLƆU Ɔ

Yuda ma nimeli kɛ Egipt so somi nɛ he be se nami

¹ Yawɛ ke, “Musu tloo Yuda ma nimeli ɔmɛ, ejakaa a kua mi. A toɔ gahi, nɛ a peeɔ níhi ngɛ mɛ nitsɛmɛ a dɛ he. A kɛ nihi soɔ nɛ pi ye suɔmi nya. Bɔ nɛ a peeɔ kɛ tĩaa yayami ngɔ haa a he ji nɛ ɔ nɛ.

² A yaa Egipt nɛ a ya biɔ yemi kɛ buami kɛ jeɔ Egipt matsɛ ɔ dɛ mi, be nɛ imi lɛɛ a bi we mi ga womi.

³ Se yemi kɛ buami nɛ nyɛ ya biɔ ngɛ Egipt matsɛ ɔ dɛ mi ɔ ma plɛ pee zo, kɛ hɛ mi si puemi mohu ha nyɛ.

⁴ E ngɛ mi kaa nyɛ tsɔli ɔmɛ ya su Egipt mahi nɛ a tsɛɛ Zoan kɛ Hanes momo mohu, se

⁵ Yuda bi ɔmɛ ma pia a he; benɛ a ngɛ blɔ hyɛe kaa Egipt ma ba piɛ a he ɔ, zo kɛ hɛ mi si puemi mohu ji nɔ́ nɛ maa je mi kɛ ba.”

⁶ Mawu sɛ gbi nɛ ɔ kɔɔ lohwe nane eywiɛɛywiɛtsɛmɛ nɛ ngɛ leneyi je nga kplanaa a nɔ ɔ a he. “Ma tsɔli ɔmɛ nyɛɛ kɛ ya gu zugba nɛ nɔ ngɛ gbeyegbeye ɔ nɔ. Jatahi, sinɔ duɔtsɛmɛ, kɛ nyakahi nɛ tee ngɛ lejɛ ɔ. A ngɔ nike níhi nɛ a he jua wa ngɔ pue tejihi, kɛ yomahi a nɔ ya ke ma ko nɛ be nyɛe maa piɛ a he.

⁷ Egipt be nɔ́ kpakpa ko nyɛe maa pee. Lɔ ɔ he ɔ, i wo lɛ se mi biɛ ke, ‘Nyaka nɛ tee, se e he be gbeye.’ ”

Ma tue gboli

⁸ Jehanɛ Mawu de mi ke ma ya ngma nɔ́ nɛ ɔ ngɛ tɛ tɛtlɛɛ nɔ ngɛ ma a hɛ mi. Ee, ma ngma kɛ wo womi mi, konɛ e pee odase nɛ maa hi si daa kɛ maa ya neneene.

⁹ Ejakaa ma atuã tsɔli ji mɛ; lakpatsɛmɛ, kɛ nihi nɛ bui Yawɛ mlaa a ji mɛ.

¹⁰ A deɔ gbali ɔmɛ ke, “Nyɛ ko na ní; nyɛɛ gba ní kpakpahi mohu ha wɔ. Nyɛɛ kɛ wɔ nɛ tu munyu nɛ maa ngɔ ngɛ wa tue mi; ke sisimi munyuhi pohu wa suɔ.

¹¹ Nyɛ ko nyɛɛ Yawɛ se; nyɛɛ gu he kpa! Wa hla we nɛ waa nu nyɛ, Israel Mawu klɔuklɔu ɔ he sane ko!”

¹² Se bɔ nɛ Israel Mawu klɔuklɔu ɔ ngɛ dee ji nɛ ɔ nɛ: “Nyɛ bui nɔ́ nɛ i ngɛ nyɛ dee ɔ, nɛ nyɛ ngɔ nyɛ hɛ ngɔ fɔ basabasa peemi, kɛ sisimi nɔ.

¹³ Lɔ ɔ he ɔ, nyɛ yeɔ fɔ. Nyɛ ngɛ kaa gbogbo gojoo ko nɛ e mi gba kɛ je e yi mi kɛ ba ma si, nɛ kpa kasa, nɛ miɔ nɛ e ku kɛ pue si; tlukaa ngɛ hɛngmɛfia mi ɔ, e maa ku kɛ pue si bum!

¹⁴ E maa gbɛ tsɔkɔtsɔkɔ kaa zu buɛ; e maa ywia yayaa, bɔ nɛ a be ngɛyu bɔbɔyoo po nae ngɛ mi nɛ a kɛ je la, loo nɛ a kɛ yɛ nyu ngɛ nɔ́ mi.”

¹⁵ Nyɔmtsɛ Yawɛ, Israel Mawu klɔuklɔu ɔ ngɛ ma a dee ke, “Nyɛɛ kpale kɛ ba, nɛ nyɛɛ ngɔ nyɛ hɛ ngɔ fɔ ye nɔ kpoo. Ja jã loko nyɛ he maa wa, nɛ nyɛ ma na wami.” Se nyɛ kplɛɛ we kaa nyɛ maa pee ja!

¹⁶ Mohu, nyɛ to nyɛ yi mi kaa nyɛ maa hi okpɔngɔhi nɛ a he sɔɔ a nɔ kɛ tu fo kɛ je nyɛ he nyɛli ɔmɛ a he. Nɛ nyɛ nɔ́ da niinɛ; e sa kaa nyɛɛ tu fo kɛ je nyɛ he nyɛli a dɛ mi! Nyɛ susu kaa nyɛ we okpɔngɔ ɔmɛ a he sɔɔ saminya, se nihi nɛ nyɛɛ nyɛ se ɔ, a he sɔɔ kulaa pe nyɛ!

¹⁷ Nyɛ he nyɛli ɔmɛ a ta bulɔ kake too maa wo nyɛ ta buli akpe fo; nɛ a nihi enuɔ pɛ maa wo nyɛ tsuo fo. Nyɛ tabo ɔ tsuo ma wo fo, nɛ nɔ́ nɛ maa piɛ ngɛ se ji aflangaa tso nɛ maa si ngɛ yoku yi mi!

¹⁸ Se kɛ̃ ɔ, Yawɛ ngɛ mlɛe kaa e maa na nyɛ mɔbɔ; ejakaa nɔ́ nɛ da pɛ e peeɔ daa. Nihi nɛ ngɔɔ a hɛ ngɔ fɔɔ Yawɛ nɔ ɔ, a naa bua jɔmi.

Mawu maa gbaa e ma a

¹⁹ Nyɛ Yerusalem bi, nyɛ be ya foe hu! Yawɛ ɔ, mɔbɔ nalɔ ji lɛ; ke nyɛ fa kue ha lɛ ɔ, e ma he nɔ.

²⁰ Nyɔmtsɛ ɔ ma ha níhi a mi maa wa ha nyɛ lɛɛ, se lɛ nitsɛ e kɛ nyɛ maa hi si, nɛ e maa tsɔɔ nyɛ ní. E be hiae kaa nyɛ ma de ke nyɛ ma hla lɛ, nɛ nyɛ maa na lɛ hu.

²¹ Ke nyɛ ngɛ nyɛɛe, nɛ nyɛ gba kɛ je blɔ ɔ nɔ kɛ ya hiɔ nɔ, loo muɔ nɔ ɔ, nyɛ maa nu e gbi ngɛ nyɛ se nɛ ngɛ dee ke, “Blɔ ɔ ji nɛ oo! Nyɛɛ nyɛɛ blɔ ɔ nɔ.”

²² Nyɛ ma ble nyɛ we amaga amɛ; amagahi nɛ a ngɔ sika hiɔ kɛ ha a he, kɛ ní nɛmɛ nɛ a ngɔ sika tsu kɛ ha a he ɔ tsuo. Nyɛ maa hɛ mɛ kɛ fɔ he kaa ní komɛ nɛ a he tsɔ we; nyɛ ma de mɛ ke, “Nyɛɛ ho!”

²³ Ke nyɛ du ní ɔ, Yawɛ ma ha hiɔmi maa nɛ kɛ pue zugba a nɔ, nɛ niye ní babauu maa ba; jamɛ a be ɔ mi ɔ, nyɛ na amɛ ma na zugba agbo nɛ a maa ye ní ngɛ nɔ.

²⁴ Nahi kɛ tejihi nɛ tsuɔ ní ngɛ nyɛ ngmɔ ɔmɛ a nɔ ɔ, a ma na niye ní kpakpa; nga nɛ a je blɔ poo nɛ a kɛ ngo futu lɛ nɛ a maa ye.

²⁵ Ligbi ɔ nɛ a ma kpata nyɛ he nyɛli ɔmɛ a hɛ mi, nɛ a maa ku a mɔ ɔmɛ kɛ pue si ɔ, nyu maa je yo gaga amɛ, kɛ yoku ɔmɛ tsuo a nɔ kɛ be babaaba.

²⁶ Nyɔhiɔ ma kpɛ kaa pu, nɛ pu la a nya maa wa wawɛɛ kaa bɔ nɛ e nya waa daa a totoe si kpaago; e maa pee kaa ligbi kpaago pu tsotsoe tsuo nɛ a bua nya ngɔ ha ligbi kake. Plaami nɛ Yawɛ plaa e ma a, e maa fi pa amɛ a nɔ ha mɛ, nɛ pa amɛ ma gbo. Ní nɛ ɔmɛ tsuo maa ba mi jamɛ a be ɔ mi.

Mawu maa gbla Asiria tue

²⁷ Yawɛ biɛ ngɛ pɛe ngɛ tsitsaa kɛ ma. E mi mi fu wawɛɛ nitsɛ kaa la su ku kpii nɛ ngɛ si tee. Munyuhi nɛ ngɛ e nya mi jee ɔ, abofu sɔuu kaa la nɛ puɛɔ ní.

²⁸ Ke e wo mumi ɔ, e ngɛ kaa pa nɛ hia lalaala kɛ bee nɛ hyiɔ kɛ ya taa nɔ kuɛ si tɔɔ, konɛ e sa je ma amɛ a mi nɛ e gbla a tue. Kɛkɛ ɔ, yi mi yaya nɛ a to ɔ tsuo maa pee yaka.

²⁹ Se nyɛ, Mawu ma a lɛɛ nyɛ bua maa jɔ, nɛ nyɛ ma la kaa bɔ nɛ nyɛ laa kɛ ngɔɔmi ke nyɛ ngɛ nyami be klɔuklɔu yee ɔ. Nyɛ bua maa jɔ kaa nihi nɛ a ngɛ nyɛɛe kɛ yaa Yawɛ yo ɔ nɛ ji Israel tɛ sa a nɔ kɛ a dɛ mi bɛhi nɛ a ngɛ kpae kɛ ngɛ he toe.

³⁰ Nɔ tsuaa nɔ maa na e he wami kpetekpleenyɛ ɔ nɛ ngɛ ní tsue, kɛ bɔ nɛ e mi mi fu wawɛɛ ɔ; la nɛ puɛɔ ní maa tso plamplam, nɛ ahumi maa fia; hiɔmi maa nɛ, nɛ gbiɛ ngo ngu ma pue si.

³¹ Ke Yawɛ wo gbi ɔ, e maa gbla Asiria bi ɔmɛ a tue, nɛ sawale maa nu mɛ.

³² Ke Yawɛ nitsɛ ngɛ mɛ ní fiae ɔ, tue gblami tsuaa tue gblami nɛ e ma ha mɛ ɔ, e ma a maa hi miɛ, nɛ a maa fia saku kɛ to he.

³³ Blema lokoo ɔ, a tsua muɔ ko nɛ a maa sã Asiria matsɛ ɔ ngɛ mi. Muɔ ɔ mi kuɔ, nɛ e bli, nɛ a to lɛ́ babauu kɛ wo mi. Yawɛ mumi ɔ nɛ ngɛ kaa la nɛ ngɛ tsoe plamplam ɔ maa sã lɛ.