Yesaya 3 - BAIBLO ALOO NGMAMI KLƆUKLƆU Ɔ

Haomi maa ba Yerusalem

¹ Bu tue! Nyɔmtsɛ Yawɛ Tabohiatsɛ ɔ be blɔ ngmɛe nɛ nihi nɛ a ba ye bua Yuda ma a, kɛ Yerusalem hu. E ma ha a niye ní, kɛ nyu maa ta.

² Nimli nɛ ɔmɛ tsuo a hɛ mi ma kpata: katsɛmɛ, ta buli, kojoli, gbali, klaali, ma nimeli,

³ asafoatsɛmɛ, nihi nɛ a hɛ mi ngɛ nyami, ma ní tsuli, kɛ kunya yeli kpanakuhi.

⁴ Ma wo jokuɛwi nyumuwi ganɔhi ha mɛ, nɛ bimwɔwi maa ye a nɔ.

⁵ A maa wa a sibi yi mi. Nihewi maa hyɛ nikɔtɔma hɛ mi, nɛ nihi nɛ bu be a he maa wo a he ha nihi nɛ a hɛ mi ngɛ nyami.

⁶ Be ma, nɛ we puɔ nya ko bi maa hla a ti nɔ ko, nɛ a ma de lɛ ke, “Wa nɔ́ tsuaa nɔ́ hɛ mi kpata, se moo lɛɛ o ngɛ he ha nɔ́ ko, lɔ ɔ he ɔ, ba pee wa tsɛ, nɛ o ye wa nɔ.”

⁷ E ma he nɔ ke, “Kpaoo! I be nyɛe ma pee ja ha nyɛ. Imi hu, i be niye ní, nɛ i be heha ní hulɔ. Nyɛ ko wo mi nyɛ nyatsɛ!”

⁸ Niinɛ, musu tloo Yerusalem! Yuda hɛ mi kpata! Ejakaa a deɔ nɔ́ tsuaa nɔ́, nɛ a peeɔ nɔ́ tsuaa nɔ́ kɛ siɔ Yawɛ; a jee blɔ pueɔ Mawu nitsɛ hɛ mi si.

⁹ A ní peepee yeɔ odase kɛ siɔ mɛ; ejakaa a jeɔ a hɛ mi paa kɛ peeɔ yayami kaa Sodom bi; a kɛ laa we. Musu tloo mɛ! Mɛ nitsɛmɛ nɛ a ye a he awi ɔ nɛ.

¹⁰ Nihi nɛ peeɔ nɔ́ nɛ da a, a bua maa jɔ, nɛ a nɔ́ tsuaa nɔ́ maa ya nɔ saminya. A maa ye a dengme gbomi mi ngɔɔmi.

¹¹ Se yayami peeli lɛɛ musu tloo mɛ; yayami nɛ a pee ní kpahi ɔ, jehanɛ, a ma ngɔ pee mɛ nitsɛmɛ.

¹² Jokuɛwi lɛ ngɛ ye ma a haoe, nɛ yihi lɛ ngɛ a nɔ yee. Ye ma, o nɔ hyɛli ɔmɛ haa o tlaa blɔ, nɛ a tɔ̃tɔ̃ɔ̃ o nane.

Yawɛ ngɛ e ma a kojoe

¹³ Yawɛ pee klaalo kaa e maa jaje e sane ɔ; e pee klaalo kaa e maa kojo e ma a.

¹⁴ Yawɛ kɛ ma nimeli, kɛ ganɔ ɔmɛ lɛ na sane ɔ nɛ. Munyu nɛ e kɛ ba po a nya ji nɛ ɔ nɛ: “Nyɛ kpata wai ngmɔ ɔmɛ a hɛ mi, nɛ níhi nɛ nyɛ kpɔ ngɛ ohiatsɛmɛ a dɛ ɔ, nyɛ ngɔ kɛ to nyɛ wehi a mi.

¹⁵ Nyɛ be he blɔ kulaa kaa nyɛ waa ye ma a yi mi, loo nyɛ yeɔ ohiatsɛmɛ amimi. Imi Nyɔmtsɛ Tabohiatsɛ Mawu ɔ, lɛ i de.”

A bɔ Yerusalem yi ɔmɛ kɔkɔ

¹⁶ Yawɛ ke, “Hyɛ bɔ nɛ Yerusalem yi ɔmɛ ngɛ a he tsɔɔe ha! Ke a ngɛ nyɛɛe ɔ, a woɔ a hɛ mi nɔ kɛ hii kɔɔhiɔ mi fue. Basabasa peemi pɛ a suɔ be tsuaa be. A hiaa a nane bitibiti kɛ kɔsɔɔ, nɛ a nane si ga amɛ hii pɛe ngmleingmlei.

¹⁷ Lɔ ɔ he ɔ, ma gbla a tue. Ma ha sakpa ma pue a yi mi, nɛ a maa sɛ a yi ɔ kpalokpalo.”

¹⁸ Jamɛ a ligbi ɔ, afɛu níhi tsuo nɛ Yerusalem yi ɔmɛ kɛ dlaa a he: nane si ga amɛ, níhi nɛ a kɛ hɔɔ a yi mi, a kuɛ ga amɛ,

¹⁹ a nine si ga amɛ, hɛ mi hami ní ɔmɛ,

²⁰ a pɛɛ ɔmɛ, sɛbɛhi nɛ a woɔ ngɛ a kɔni si kɛ a mlɛ mi ɔ,

²¹ nine nguɛ ga amɛ, gugwɔ mi ga amɛ,

²² he dlami tade ɔmɛ, tade klɔii ɔmɛ, tade gagaa amɛ, nɔha tade ɔmɛ, sika kpɛɛ ɔmɛ,

²³ kploba heha ní ɔmɛ, mele duku ɔmɛ, yi duku ɔmɛ, kɛ hɛ mi hami nɔ́ gagaa amɛ tsuo ɔ, Nyɔmtsɛ ɔ ma je ngɛ a he.

²⁴ Nu je via be hae nɛ a he maa je via hu, a he maa je fu mohu; tangme kpa titlii a kɛ maa fi a mlɛ mi, pi mlɛ mi fimi nɔ́ saminyawiiwi ɔmɛ hu; yi nɛ a hɔɔ saminyayoo ɔ maa pee kpalokpalo; a heha ní kpakpa amɛ ma plɛ pee tako piɛ; a he fɛu ɔ ma plɛ pee zo ha mɛ!

²⁵ A kɛ klaate maa gbe ma a mi nyumu ɔmɛ; a ti nihi nɛ ji katsɛmɛ tete po maa nɔ ngɛ ta mi.

²⁶ Ma a agbo ɔmɛ a nya maa pee mɔbɔmɔbɔ kɛ ya; nɛ ma a nitsɛ lɛɛ e maa pee kaa yo nɛ hɛɛ e he gu kɛ hii si ngɛ zugba.