Yesaya 28 - BAIBLO ALOO NGMAMI KLƆUKLƆU Ɔ

A bɔ omleyi je nɔ yemi ɔ kɔkɔ

¹ Musu tloo Efraim nina, Israel nɔ yemi ɔ. E hɛ mi nyami ɔ ngɛ tae kaa mɔmɔ jlasi nɛ ma nimeli dã tɔli ngɔ fi a yi. A wo a yi mi nu je via saminya lɛɛ, se hyɛ mɛ nɛ a tɔ dã kpɔtɔɔ kɛ pueɔ si.

² Nyɔmtsɛ ɔ ngɛ he walɔ katsɛ ko nɛ ma ba tua mɛ. E maa ba kaa gbiɛ ngo ngu; e maa fo dɔ kaa hiɔmi nyu nɛ bee lalaala, nɛ haa pa hyiɔ kɛ ywiaa nga kɛ haa zugba a nɔ.

³ Jamɛ a ma nimeli dã tɔli he nɔ woli ɔmɛ ɔ, a maa ba mɛ si kulaa.

⁴ Bɔ nɛ ke nɔ ko na ngmɔkɔ nɛ fu loko e fumi be su, nɛ e tsɔɔ nɛ e yeɔ tsuatsuaatsua a, ja ma nimeli nɛ ɔmɛ a hɛ mi nyami ɔ maa laa si kake too.

⁵ Be ma nɛ Yawɛ Tabohiatsɛ ɔ maa pee kaa mɔmɔ jlasi saminyayoo kɛ ha e ma mi ni nɛmɛ nɛ a yi ma na wami ɔ.

⁶ E ma ha kojoli maa ye dami sane, nɛ ma a agbo nya buli ɔmɛ ma na he wami, nɛ a kɛ he nyɛli nɛ ma ba tua mɛ ɔ maa kpe.

Yesaya bɔ Yuda gbali dã tɔli ɔmɛ kɔkɔ

⁷ Gbali ɔmɛ, kɛ osɔfo ɔmɛ pohu tɔɔ dã, nɛ a tataa si. Wai kɛ dã nɛ nya wa fuu tsɔ nɛ a nuu ɔ, haa a hii si tɛe basabasa. Gbali ɔmɛ tɔɔ dã kpɔtɔɔ; lɔ ɔ he ɔ, ninahi nɛ Mawu haa mɛ ɔ, a nui sisi. Osɔfo ɔmɛ hu tɔɔ dã kpɔtɔɔ ja nɔuu; mɛ hu sanehi nɛ a kɛ ba haa mɛ ɔ, a nyɛ we nɛ a hyɛɛ mi.

⁸ Okplɔɔhi nɛ a hii a he ɔ tsuo peeɔ kpɔtɔɔ kɛ vie sɔuu; he ko he ko be nɛ tsɔ.

⁹ A ngɛ munyu tue kɛ ngɛ mi sie ke, “Mɛnɔ ní jamɛatsɛ ɔ susu kaa e ngɛ tsɔɔe ɔ? E sɛ gbi ɔ, mɛnɔ ngɛ hlae? E sɛ gbi ɔ hi ha bimwɔwi nɛ kpaako a je nyɔ nya!

¹⁰ E ngɛ mɔde bɔe kaa e maa tsɔɔ wɔ ní nyaa, ngmami okadi kakaaka, zã kakaaka, kɛ munyu tso ɔ hu kakaaka.”

¹¹ Ke nyɛ be mi tue bue ɔ, lɛɛ Mawu maa gu nibwɔhi nɛ tuɔ ma se gbi nɛ nyɛ nui kulaa nɔ kɛ tsɔɔ nyɛ ní.

¹² Mawu de nyɛ ke e ma ha nyɛ he jɔmi, kɛ tue mi jɔmi, se nyɛ bui lɛ tue fɛɛ.

¹³ Lɔ ɔ he je nɛ Yawɛ nitsɛ maa tsɔɔ nyɛ ní nyaa kikɛ nɛ ɔ nɛ: ngmami okadi kakaaka, zã kakaaka, kɛ munyu tso ɔ hu kakaaka; kɛkɛ ɔ, nane tsuaa nane nɛ nyɛ maa hia a, nyɛ ma tɛ nɔ́ nɛ nyɛ maa nɔ si. A maa plaa nyɛ; nyɛ maa du klama, nɛ a maa nuu nyɛ kɛ ho.

Zion kɔ nya tɛ ko

¹⁴ Jehanɛ, nyɛ he nɔ woli nɛ nyɛ ngɛ ma nɛ ɔ nɔ yee ngɛ Yerusalem hiɛmɛ nɛ ɔ, nyɛɛ bu nɔ́ nɛ Yawɛ ngɛ dee ɔ tue.

¹⁵ Nyɛ ngɛ fĩae ke nyɛɛ kɛ gbenɔ so, nɛ nyɛɛ kɛ gbeje pee kake. Nyɛ hɛ ngɛ nɔ kaa ke haomi ba a, e be nyɛ he sae kulaa; ejakaa nyɛ ngɔ nyɛ hɛ ngɔ fɔ lakpa, kɛ sisimi nɔ kaa nyɛ maa ye nyɛ he.

¹⁶ Lɔ ɔ he ɔ, nɔ́ nɛ Nyɔmtsɛ Yawɛ ngɛ dee ji nɛ ɔ nɛ: “I ngɛ sisi tomi ko nɛ he wa nɛ maa si kpɛii fiae ngɛ Zion; nɛ i ngɔ kɔ nya tɛ agbo ko kɛ ma mi. Nɔ́ nɛ a ngma ngɛ nɔ ji nɛ ɔ nɛ: ‘Nɔ nɛ heɔ yeɔ ɔ, e toɔ e tsui si.’

¹⁷ Ma ngɔ dami sane yemi kɛ pee susumi kpa.” Ahumi kɛ gbiɛ ngo ngu maa bɛɛ lakpa amɛ tsuo kɛ ho, nɛ pahi maa je a hi he ɔmɛ.

¹⁸ Ke e ba mi ja a, somi ɔ nɛ nyɛɛ kɛ gbenɔ so ɔ, a maa po mi; nɛ a maa gbɛ kake peemi nɛ ngɛ nyɛɛ kɛ gbeje nyɛ kpɛti ɔ. Haomi nɛ maa ba a, nyɛ be nya nyɛe maa da.

¹⁹ E maa ba nyɛ nɔ nɔtonɔto daa mɔtu. Nyɛ maa na amanehlu nyɔ kɛ pia. Sɛ gbi he tsuaa sɛ gbi he nɛ maa je Mawu ngɔ kɛ ba a maa wo nyɛ he gbeye wawɛɛ.

²⁰ Kaa bɔ nɛ a buu abɛ ɔ, nyɛ maa pee kaa nyumu ko nɛ ngɛ hlae nɛ e hwɔ si ngɛ sa tso kpiti ko nɔ. Sa tso ɔ ka we bɔ nɛ e ma nyɛ kpã e mi ngɛ nɔ, nɛ e nɔ hami bo ɔ hu bli we bɔ nɛ e ma nyɛ kɛ ha e he tsuo.

²¹ Yawɛ ma je e he wami ɔ kpo kaa bɔ nɛ e pee ngɛ Perazim yo ɔ nɔ, kɛ Gibeon kɔ̃ ɔ mi ɔ, konɛ e kɛ tsu nɔ́ nɛ e to kaa e ma tsu ɔ; níhi nɛ e ma tsu ɔ maa pee nyakpɛ níhi nɛ eko bɛ hyɛ.

²² Lɔ ɔ he ɔ, nɔ́ nɛ i ngɛ nyɛ dee ɔ, e ko pee nyɛ muɔ hu! Ke nyɛ kɛ pee fiɛmi ɔ, nyɛ be nɔ́ nɛ ma a nya fo nyɛe maa tu. I nu kaa Nyɔmtsɛ Yawɛ Tabohiatsɛ ɔ ke e ma kpata zugba a tsuo hɛ mi.

Mawu nile

²³ Nyɛɛ bu mi tue; nyɛ ta tue ha nɔ́ nɛ i ngɛ nyɛ dee ɔ.

²⁴ Ngmɔ hulɔ ɔ, anɛ humi kɛkɛ e hii hue daa nɛ, nɛ e du we ní lo? Pe e hii zugba a tsuae kpamisa, nɛ e hii hɛ mi dlae kɛkɛ lo?

²⁵ Ke e dla zugba a hɛ mi gbe nya a, anɛ e fĩa we pui wu, kɛ kowɛ lo? Anɛ e du we ngma zã nɔ zã nɔ, kɛ akoko hu ngɛ e blɔ he lo? Anɛ e du we ní kpahi kɛ wui huzu lo?

²⁶ E Mawu ɔ lɛ tsɔɔ lɛ ke e pee ja pɛpɛɛpɛ ɔ nɛ.

²⁷ Pui wu, kɛ kowɛ ɔ, pi tso kpoti nɛ a kɛ gbeeɔ, se tso zaayo kɛkɛ.

²⁸ Ngma nɛ a kɛ sãã abolo ɔ, a fɛ we mi. Nɔ́ nɛ ngma mi salɔ ɔ peeɔ ji e kɛ ngma mi sami nɔ́ hii ngma a mi sae hluu kɛ ya siɔ e naa ngma a bɔ nɛ sa pɛpɛɛpɛ.

²⁹ Nɔ́ nɛ ɔ hu Yawɛ Tabohiatsɛ ɔ dɛ mi nɛ e je; e woɔ ga nɛ ngɛ nyakpɛ, nɛ e nile hiɛ babauu.