Yesaya 27 - BAIBLO ALOO NGMAMI KLƆUKLƆU Ɔ

¹ Jamɛ a ligbi ɔ, Yawɛ kɛ e klaate kpetekpleenyɛ ɔ maa gbe wo mi sinɔ agbo langalanga a.

² Bɔ nɛ Yawɛ ma de ngɛ e wai ngmɔ saminyayoo ɔ he jamɛ a ligbi ɔ ji nɛ ɔ nɛ:

³ “Imi Yawɛ nitsɛ nɛ i hyɛɛ e nɔ; i pueɔ nɔ nyu be tsuaa be. I buu e he nyɔ kɛ pia, bɔ nɛ pee nɛ nɔ ko nɛ ko ba kpata e hɛ mi.

⁴ Ye wai ngmɔ ɔ he mi mi la ko be ye mi hu. Ke kaa miohi, kɛ mio pu kɛkɛ nɛ i kɛ gba ta a, jinɛ ma ya mɛ a he la, nɛ ma sã mɛ tsuo.

⁵ Se ke ye ma a a he nyɛli ngɛ hlae kaa ma bu a he ɔ, lɛɛ a kɛ mi nɛ ba kpata lolo. Niinɛ, e hia kaa a kɛ mi nɛ ba kpata.”

⁶ Hwɔɔ se ko ɔ, Israel ma nɛ ji Yakob nina a maa ma si kpɛii kaa tso nɛ sipoku sɛ zu mi; a ma gba mɔmɔ, nɛ a ma plɔke. A yiblii ma hyi je ɔ tɔ.

⁷ Yawɛ gbla we Israel tue wawɛɛ kaa bɔ nɛ e gbla a he nyɛli ɔmɛ a tue ɔ; nɛ Israel bi nɛ nɔ ngɛ ta mi ɔ hu, a he híɛ kulaa kaa he nyɛli ɔmɛ.

⁸ Tue gblami nɛ Yawɛ ha e ma a ji, e ha a nuu mɛ kɛ ho ma se ya. E ha beleku kɔɔhiɔ nɛ nya wa ko ba muɔ mɛ kɛ ho.

⁹ Se bɔ nɛ Israel maa pee kɛ je a he yayami ɔmɛ konɛ a kɛ pa mɛ ji, a maa wɛɛ je ma amɛ a bɔ sami la tɛ ɔmɛ bukɔbukɔ kaa ayilɔ, nɛ yo mawu Ashera a tsopa kɛ e he via bɔ sami la tɛ ɔmɛ, loo e we amaga amɛ ekoeko be si hie hu.

¹⁰ Ma nɛ a fia gbogbo ngɔ wo he ɔ ku kɛ pueɔ si. E plɛ pee ma doku kaa nga kplanaa nɛ nɔ ko nɔ ko be nɔ. Lejɛ ɔ plɛ pee lohwe lɛmi he, he nɛ nahi maa ye ní, nɛ a maa jɔɔ a he ngɛ.

¹¹ Tso kɔni ɔmɛ gbli, nɛ a ku kɛ pueɔ si; yi ɔmɛ ya buaa nya kaa lɛ́ nɛ a ma slɛ, ejakaa ma a nui nɔ́ ko nɔ́ ko sisi. Mawu, a bɔlɔ ɔ mi mi be lɛ sãe ngɛ a he, nɛ e be mɛ mɔbɔ nae hulɔ.

¹² Israel bi, nyɛ na nɛ nyɛɛ le kaa jamɛ a ligbi ɔ, kɛ je Yufrate pa a nya kɛ yaa si Egipt huzu ɔ nya a, Yawɛ ma bua e ma a nya kɛ je je ma amɛ a mi kakaaka kaa nɔ ko nɛ ngɛ ngma mi sae, nɛ e ngɛ ngma nitsɛ ɔ hlae kɛ je tsakati ɔ mi.

¹³ Ke jamɛ a ligbi ɔ su ɔ, a ma kpa titimati nguaa ko kɛ tsɛ Israel bi ɔmɛ tsuo nɛ a nuu kɛ ho ma se ya a kɛ je Asiria kɛ Egipt. A maa ba, nɛ a ma ba ja Yawɛ ngɛ Yerusalem, ngɛ yo klɔuklɔu ɔ nɔ.