Yesaya 26 - BAIBLO ALOO NGMAMI KLƆUKLƆU Ɔ

Mawu ma ha e ma a maa ye kunimi

¹ Be ma nɛ ma a ma la la nɛ ɔ ngɛ Yuda zugba a nɔ: Wa ngɛ ma nɛ he wa! Mawu nitsɛ lɛ buu ma a gbogbo ɔmɛ a he!

² Nyɛ bli agbo ɔmɛ, konɛ je ma amɛ nɛ peeɔ nɔ nɛ da, nɛ a yeɔ anɔkuale ɔ, a sɛ mi.

³ Nɔ nɛ ngɔɔ e hɛ kɛ fɔɔ o nɔ, nɛ e heɔ mo yeɔ ɔ, o haa lɛ tue mi jɔmi.

⁴ Nyɛɛ ngɔ nyɛ hɛ ngɔ fɔ Yawɛ nɔ daa; ejakaa Yawɛ Mawu ɔ ngɛ kaa tɛ sa ko nɛ ngɛ daa.

⁵ Nihi nɛ wo a he nɔ gojoo ɔ, e ba mɛ si; ma nɛ he wa, nɛ he nɔ woli hi mi ɔ, e kpata e hɛ mi; e ku gbogbo ɔmɛ ngɔ pue bunyuku mi.

⁶ Nihi nɛ a wa mɛ yi mi be ko ɔ, jehanɛ lɛɛ mɛ nɛ a ngɛ nyɛɛe, nɛ a ngɛ si sie ngɛ lejɛ ɔ nɛ.

⁷ Nihi nɛ peeɔ nɔ́ kpakpa a, a blɔ da tlɔmɔɔ; mo lɛ o ha a blɔ da ja a nɛ.

⁸ Yawɛ, wa maa pee o suɔmi nya ní, nɛ wa maa ngɔ wa hɛ ngɔ fɔ o nɔ; mo pɛ wa suɔ kɛ wa tsui tsuo.

⁹ Nyɔ mi ɔ, i hla o se blɔ kɛ ye tsui tsuo; ke o kojo je ɔ kɛ e mi bi ɔmɛ ɔ, loko a maa le nɔ́ nɛ ji dami sane yemi.

¹⁰ E ngɛ mi kaa o naa yiwutsotsɛmɛ mɔbɔ lɛɛ, se a kase we nɛ a pee nɔ́ nɛ da. E ngɛ mi kaa a ngɛ nihi nɛ peeɔ nɔ́ nɛ da a zugba nɔ lɛɛ, se yayami mohu a ngɛ pee kpamisa; a yɔse we kaa Mawu kpetekpleenyɛ ji mo.

¹¹ Yawɛ, o to kaa o maa gbla he nyɛli ɔmɛ a tue, se a li tete. Ha nɛ zo nɛ gbe mɛ, nɛ a na nɔ́. Gbla a tue kaa bɔ nɛ o to ha mɛ ɔ. Ha nɛ a na kaa o suɔ o ma a sane saminya.

¹² Yawɛ, mo lɛ o haa wɔ tue mi jɔmi; nɔ́ tsuaa nɔ́ nɛ wa ngɛ pee ɔ, mo lɛ o peeɔ ha wɔ.

¹³ Yawɛ, o se ɔ, nyɔmtsɛmɛ kpahi ba ye wa nɔ lɛɛ, se mo pɛ nɛ wa le.

¹⁴ O ha a gbo pɛsɛɛ, a be je mi hu; a kpadehi tete be si tee, ejakaa o gbla a tue; o kpata a hɛ mi pɛsɛɛ, nɔ ko nɔ ko kaii we mɛ hu.

¹⁵ Yawɛ, mo lɛ o ha wa ma a he hiɛ babauu; o bli wa huzu ɔmɛ a mi kɛ kpe, nɛ enɛ ɔ ha o hɛ mi ba nyami.

¹⁶ Yawɛ, o gbla o ma a tue; nɛ benɛ e fi mɛ ɔ, a fa kue kɛ tsɛ mo.

¹⁷ Yawɛ, o ha nɛ waa kɛ he hiami kpa ngmlaa kaa bɔ nɛ yo nɛ hɛɛ mi nɛ e miɔ nɛ ma fɔ peeɔ ɔ.

¹⁸ Wɔ hu wa sɛ he hiami, kɛ gbenɔ mi ja, se nɔ́ ko ji mi kɛ bɛ. Wa nyɛ we nɛ wa he wa zugba a yi wami; wa nyɛ we nɔ́ ko kulaa nɛ waa pee.

¹⁹ Wa ma mi nihi nɛ gbo ɔ ma na wami ekohu! A gbogboe ɔmɛ maa te si. Nihi nɛ hwɔɔ si ngɛ zu mi ɔ, mɛ tsuo a maa te si, nɛ a ma la kɛ bua jɔmi. Kaa bɔ nɛ bɔ́ nyu ngleinglei haa zugba a peeɔ ehe ekohu ɔ, ja Yawɛ maa ngɔ wami he ngɔ wo nihi nɛ gbo momo ɔ a mi.

Tue gblami kɛ yi wami hemi

²⁰ Ye ma, nyɛ ya sɛ nyɛ we ɔmɛ a mi, nɛ nyɛɛ ngmɛ sinya amɛ a mi ngɔ wo nyɛ yi. Nyɛɛ laa nyɛ he be kpiti ko kɛ yaa si Mawu mi mi fumi ɔ nya maa be.

²¹ Ejakaa Yawɛ je e hi he ɔ kɛ ma je ɔ mi nɛ e ba gbla nimli adesahi a tue ngɛ a he yayami ɔmɛ a he. Nihi nɛ a gbe ngɛ laami mi ngɛ je ɔ mi ɔ, a ma je mɛ tsuo kpo nɛ a na mɛ; zugba a be jamɛ a ni ɔmɛ a nɔ laae hu.