Yesaya 25 - BAIBLO ALOO NGMAMI KLƆUKLƆU Ɔ

Yi jemi la

¹ Yawɛ, mo ji ye Mawu; ma wo o hɛ mi nyami, nɛ ma je o biɛ ɔ yi; ejakaa o tsu nyakpɛ níhi. O yi mi tomi ɔmɛ nɛ o to blema lokoo ɔ, o ye a nɔ pɛpɛɛpɛ.

² O ha mahi plɛ pee ma dokuhi, gbogbohi nɛ a fia wo a he ɔ, lɛ tsuo ku kɛ pueɔ si. Matsɛmɛ a mɔhi nɛ ma je li ɔmɛ ma a, a kpata a hɛ mi pɛsɛpɛsɛ, a be ekoeko nae hu gblegbleegble.

³ Mahi nɛ a he wa saminya a ma je o yi; Yiwutsotsɛmɛ ngɛ a ma amɛ a mi tsuo maa ye mo gbeye.

⁴ O ngɛ kaa mɔ kɛ ha ohiatsɛmɛ. O ngɛ kaa mɔ kɛ ha nɔ́ nali. Mo ji a wesa he ngɛ kɔɔhiɔ nɛ nya wa mi, kɛ hɔ̃ ngɛ pu ngmangmaangma nya. Yiwutsotsɛmɛ nɛ a yi mi wa kaa ahumi ngɛ fĩɛ be mi po, o jeɔ mɛ kɛ jeɔ a dɛ mi.

⁵ Ose nɛ nibwɔ ɔmɛ ngɛ hee ɔ, o ku nya la kaa bɔ nɛ ke je mi dɔ la nɛ bɔku haa zugba jɔɔ ɔ. Nɛ yiwutsotsɛmɛ kpa a lami ɔ si kake too.

Yawɛ maa ngmɛ okplɔɔ ngua

⁶ Yawɛ maa ngmɛ okplɔɔ ngɛ yo nɛ ɔ nɔ ha je ma amɛ tsuo. A maa ye ní kpakpa: lo nɛ tu zɔ saminya, kɛ zɔ nɛ a je kɛ je wu mi tɔɔ; nɛ a maa nu wai kpakpa.

⁷ Haomi nɛ ba je ma amɛ a nɔ kaa nɔ́ nɛ bo lɛ a kɛ ha a nɔ ɔ, Mawu ma ha nɛ lɛ tsuo se maa po ngɛ yo nɛ ɔ nɔ.

⁸ Nyɔmtsɛ Mawu maa ye gbenɔ nɔ kunimi; e ma tsu nɔ tsuaa nɔ hɛ mi vo nyu, nɛ e ma je zo nɛ gbe e ma a ngɛ je ɔ mi tsuo ɔ kɛ je. Yawɛ lɛ de.

⁹ Ke e ba mi ja a, nɔ tsuaa nɔ ma de ke, “Wa Mawu ji nɛ ɔ nɛ! Wa ngɔ wa hɛ ngɔ fɔ e nɔ, nɛ e kpɔ wɔ. Lɛ ji Yawɛ. Akɛnɛ wa ngɔ wa hɛ ngɔ fɔ e nɔ nɛ́ e he wa yi wami he je ɔ, wa bua jɔ wa he, nɛ wa ngɛ nyae.”

Mawu maa gbla Moab tue

¹⁰ Yawɛ maa bu Zion yo ɔ he, se Moab bi ɔmɛ lɛɛ, a maa naa a nɔ kaa a naa nga nɔ kɛ woɔ dwɔmi mi kɛ ya pueɔ kuku nɔ.

¹¹ A ma wo a kɔnihi a nɔ kaa nihi nɛ ngɛ mɔde bɔe kaa a maa sile ngɛ nyu mi; se Mawu maa ba a he nɔ womi ɔ si, nɛ a kɔni ɔmɛ a mi ma gbɔjɔ kulaa.

¹² Moab mɔ ɔmɛ nɛ a fia gbogbo gojogojoohi ngɔ wo a he ɔ, e maa ku mɛ tsuo ngɔ pue si.