Yesaya 24 - BAIBLO ALOO NGMAMI KLƆUKLƆU Ɔ

Yawɛ maa gbla je ɔ tue

¹ Yawɛ ma kpata zugba a hɛ mi, nɛ zugba a maa fɔ si gu. E ma plɛ zugba a hɛ mi bu si, nɛ nihi nɛ ngɛ nɔ ɔ, e maa gbɛ mɛ ngɔ fĩa.

² Tue gblami kake lɛ ngɛ ha nɔ tsuaa nɔ, osɔfo jio, ma a jio, nyɔguɛ jio, nyɔmtsɛ jio, ní helɔ jio, ní jualɔ jio, nɔ nɛ ngɛ nɔ pae ha nɔ jio, nɔ nɛ ya ngɛ nɔ pae jio, niatsɛ jio, dɛgulɔ jio.

³ Zugba a kɛ e nɔ níhi tsuo a hɛ mi ma kpata pɛsɛpɛsɛ. Yawɛ lɛ de.

⁴ Zugba a gbli, nɛ e pee mɔbɔmɔbɔ kaa nɔmlɔ nɛ ngɛ kɔmɔ yee; je ɔ tsuo pee kaa nɔ ko nɛ pɔ tɔ lɛ; nimli ɔmɛ tsuo gbɔjɔ.

⁵ Ni ɔmɛ ble zugba a; nɛ a kɛ nɔ́ nɛ ɔ peemi tɔ Mawu mlaa amɛ a nɔ. A tsake blɔ nya tomi ɔmɛ, nɛ somi nɛ ngɛ daa a hu a yi nɔ.

⁶ Lɔ ɔ he ɔ, Mawu gbiɛ zugba a. Ni ɔmɛ ngɛ nɔ́ nae ngɛ yayami nɛ a pee ɔ he. Nihi babauu a hɛ mi kpata; nihi bɔɔ pɛ lɛ piɛ.

⁷ Wai he be hu; ejakaa wai tso ɔmɛ gbli. Nihi tsuo nɛ a bua jɔ be ko ɔ, jehanɛ lɛɛ a ngɛ kɔmɔ yee.

⁸ Saku kɛ miɛ, la kɛ do nɛ a kɛ nyaa a tsuo se po.

⁹ Nihi pa nui wai nɛ a la kɛ to he hu; dã nɛ nya wa dooɔ ngɛ a nya mi.

¹⁰ Nɔ́ tsuaa nɔ́ pee basaa ngɛ ma a mi; nɛ a nga agbo ɔmɛ tsuo, konɛ nɔ ko nɔ ko nɛ ko sɛ we ɔmɛ a mi.

¹¹ Nihi ngɛ ngmlaa kpae ngɛ gbɛjegbɛ ɔmɛ a nɔ; ejakaa wai ta. Bua jɔmi ta kulaa; bua jɔmi laa kaa nɔ ko nɛ a je lɛ we.

¹² A ku gbogbo ɔmɛ dukuduku ngɔ pue si, nɛ ma a tsuo plɛ pee ma doku.

¹³ Nɔ́ nɛ maa ba je ma amɛ tsuo a nɔ ji nɛ ɔ nɛ. Nɔ́ tsuaa nɔ́ maa ta kaa bɔ nɛ ke a kpa ngmɔ nɔ ní ta, nɛ a kplɔɔ wai yiblii tsuo pɛpɛɛpɛ taa tso ɔmɛ a nɔ nɛ wai yiblii kake po piɛ ɔ.

¹⁴ Nihi nɛ a yi na wami ɔ ma la kɛ bua jɔmi. Nihi nɛ ngɛ bonyoku je ɔ ma de ke Yawɛ kle,

¹⁵ nɛ nihi nɛ ngɛ beleku je ma je e yi. Nihi nɛ ngɛ wo nya je ɔ hu ma je Yawɛ, Israel Mawu ɔ yi.

¹⁶ Wa nu yi jemi lahi nɛ a ngɛ lae kɛ je je mi nyagbe he ɔmɛ kɛ ngɛ dalɔ ɔ hɛ mi nyami woe. Se imi lɛɛ, hɛ kɛ nɔ fɔmi ko kulaa be ha mi! He lo kɛkɛ i ngɛ tae. Ye yi ta pɛ! Yi mi sɔuu nɛ nihi ngɛ a sibi wae kpamisa.

¹⁷ Nyɛ nihi tsuo ngɛ je ɔ mi, gbeye níhi ngɛ blɔ nɔ ha nyɛ; a tsua muɔ voovoohi ha nyɛ, nɛ a tsɔ nyɛ klamahi.

¹⁸ Nɔ tsuaa nɔ nɛ maa ma fo kɛ je gbeye ní ɔmɛ a he ɔ maa nɔ muɔ voo mi, nɛ nɔ nɛ be muɔ voo ɔ mi nɔe ɔ maa du klama. Hiɔmi maa nɛ piapiaapia, nɛ je ɔ sisi tomi ɔmɛ ma mimiɛ.

¹⁹ Je ɔ mi ma gba; e maa ku, nɛ e maa gbɛ fĩa.

²⁰ E maa hi kpae kɛ hi yae kɛ hi bae kaa dã tɔlɔ, aloo ngmɔ si tsu nɛ kɔɔhiɔ sɛ mi. Yayamihi nɛ je ɔ tloo ɔ ngɛ lɛ gbee; ke e hule pue si ɔ, e be si tee gblegbleegble hu.

²¹ Be ma nɛ Yawɛ maa gbla hiɔwe ta a, kɛ zugba a nɔ matsɛmɛ ɔmɛ tsuo a tue.

²² Mawu ma bua mɛ tsuo a nya kɛ wo muɔ voo mi kaa pamitsɛmɛ. E maa wo mɛ tsu ngɛ lejɛ ɔ hluu kɛ yaa su be nɛ a maa gbla a tue.

²³ Nyɔhiɔ maa wo diblii, nɛ pu be tsoe hu, ejakaa Yawɛ Tabohiatsɛ ɔ maa ye matsɛ. E maa ye matsɛ ngɛ Yerusalem ngɛ Zion yo ɔ nɔ, nɛ ma nimeli ɔmɛ maa na e hɛ mi nyami ɔ.