Yesaya 23 - BAIBLO ALOO NGMAMI KLƆUKLƆU Ɔ

Sɛ gbi nɛ kɔɔ Fonisia he

¹ Sɛ gbi nɛ kɔɔ Tiro he ji nɛ ɔ nɛ. Nyɛ akua hluili ngɛ wo nɔ, nyɛ nya awe nɛ nyɛɛ ye kɔmɔ. Ejakaa nyɛ lɛsimuɔ he ngɛ Tiro ɔ, a kpata e hɛ mi pɛsɛpɛsɛ; we ɔmɛ, kɛ lɛ dami he ɔ tsuo hɛ mi kpata. Benɛ nyɛ lɛ ɔmɛ kpale kɛ je Kipro kɛ ma a nɛ nyɛ nu sane nɛ ɔ.

² Sidon jua yeli, nyɛ ma nyɛ nya! Nyɛ nɛ nyɛ tsɔɔ nihi

³ kɛ poo wo kɛ ya heɔ blɛfo ngɛ Egipt, nɛ nyɛɛ kɛ je ma amɛ tsuo yeɔ jua a ji nɛ ɔ!

⁴ Sidon ma, zo gbe mo! Bɔ nɛ wo kpetekpleenyɛ ɔ ngɛ mo dee ji nɛ ɔ nɛ: “I fɔ we hyɛ, nɛ i lɛ́ binyumuwi kɛ biyiwi hyɛ.”

⁵ E maa pee Egipt bi po nyakpɛ, nɛ a maa hao, ke a nu kaa a kpata Tiro hɛ mi ɔ.

⁶ Nyɛ Fonisia bi, nyɛɛ tu fo kɛ ya Spania!

⁷ Tiro, ma nɛ a po blema lokoo, nɛ bua jɔmi hyi lɛ tɔ ɔ, lɛ tete ji nɛ ɔ? Ma nɛ mi bi po wo kɛ ya to mahi a sisi ngɛ wo se tɔɔ ɔ, lɛ kɛ̃ ji nɛ ɔ?

⁸ Mɛnɔ nɛ to ga kaa ní nɛ ɔmɛ tsuo nɛ ba Tiro nɔ ɔ? Tiro, matsɛ ma nguaa kɛ e mi jua yeli kpanakpanaa nɛ ji ganɔhi nɛ a hɛ mi ngɛ nyami saminya ngɛ je ɔ mi tsuo ɔ, mɛnɔ ha nɛ nɔ́ nɛ ɔ ba e nɔ ɔ?

⁹ Yawɛ Tabohiatsɛ ɔ nitsɛ lɛ pee. E pee enɛ ɔ, konɛ a he nɔ womi ɔ se nɛ po, nɛ nimli nguangua amɛ hu a he guɛ nɛ gbo.

¹⁰ Nyɛ Spania bi, nyɛɛ ho nɛ nyɛ ya hu. Ejakaa lɛsimuɔ he ko be hiɛmɛ nɛ ɔ hu.

¹¹ Yawɛ kɛ e he wami kpata nɔ yemi ɔmɛ a hɛ mi ngɛ wo se tsitsaa lokoo. Yawɛ nɛ ku Sidon mɔ ɔmɛ.

¹² Sidon ma, o bua jɔmi ɔ se po, nɛ a ngɛ o ma mi bi ɔmɛ yi mi wae. Ke a tu fo kɛ ho Kipro ya tete po, lejɛ ɔ hu, a be he jɔmi nae.

¹³ Tsa pi Asiria bi nɛ pee ní nɛ ɔmɛ; Babilonia bi mohu nɛ ha lohwe dikali ba tua Tiro ma a; mɛ nɛ a fia kpoku kɛ wo Tiro ma a he, nɛ a ku mɔ nguangua amɛ kɛ pee lɛ ma doku.

¹⁴ Nyɛ Spania akua hluili ngɛ wo nɔ, nyɛɛ wo yana nɛ nyɛɛ ye kɔmɔ! Ma nɛ nyɛ ngɔ nyɛ hɛ ngɔ fɔ nɔ ɔ, a kpata e hɛ mi pɛsɛpɛsɛ.

¹⁵ Be ma nɛ nihi a hɛ maa je Tiro nɔ jeha nyingmi kpaago sɔuu, nɛ ji matsɛ kake wami be tsuo. Jeha nyingmi kpaago ɔ se ɔ, Tiro maa pee kaa yo ajuama nɛ a wo lɛ la.

¹⁶ Mo, yaholɔ nɛ nihi a hɛ je o nɔ, ngɔɔ o kpa saku ɔ kɛ ya kpa ma a mi! Fiaa saku ɔ, nɛ o la kɛ to he kaa sa be ko ɔ, konɛ nyumuhi nɛ a ba o ngɔ ekohu!

¹⁷ Jeha nyingmi kpaago ɔ se ɔ, Yawɛ maa na Tiro mɔbɔ, nɛ e ma ha nɛ Tiro, kɛ je ma amɛ ma ya tsu ní ekohu kaa sa a; e kɛ ma amɛ tsuo ma ya ye jua.

¹⁸ Sika nɛ e ma na kɛ je e jua yemi ɔ mi ɔ, e maa gbaa nɔ kɛ ha Yawɛ. E be nya buae kɛ to, se mohu nihi nɛ ma ba ja Yawɛ ɔ, a maa ngɔ sika nɛ ɔ kɛ he niye ní, kɛ heha ní nɛ hia mɛ.