Yesaya 22 - BAIBLO ALOO NGMAMI KLƆUKLƆU Ɔ

Sɛ gbi nɛ kɔɔ Yerusalem he

¹ Sɛ gbi nɛ kɔɔ nina kɔ̃ ɔ he ji nɛ ɔ nɛ. Mɛni ba? Mɛni o ma a mi bi ɔmɛ tsuo kuɔ kɛ ho a tsuhi a yi mi ya ya ngɛ pee?

² Ma a mi tsuo pee hoo kɛ ngmlaa kɛ gidigidi sɔuu. O nihi nɛ gbo nɛ ɔ, pi ta nya nɛ a nɔ ngɛ.

³ O we asafoatsɛmɛ ɔmɛ tsuo tu fo kɛ je; a nyɛ we nɛ a tsɛ̃ kɛ̃ɛ̃ kake po, nɛ he nyɛli ɔmɛ nuu mɛ nine nya. Nihi nɛ nine su a nɔ ɔ tsuo ngɛ fo tue kɛ yaa tsitsaa loko a nuu mɛ.

⁴ Nyɛɛ ngmɛɛ ye he nɛ ma nyɛ ya wawɛɛ ha nihi nɛ gbo ɔ. Nyɛ ko gba nyɛ he nya kaa nyɛ maa jɔɔ ye bua.

⁵ Mwɔnɛ ligbi nɛ ɔ, níhi nɛ Nyɔmtsɛ Yawɛ Tabohiatsɛ ɔ kɛ ba wa nɔ ngɛ nina kɔ̃ ɔ mi ji haomi, basabasa peemi, kɛ gidigidi peemi sɔuu. A ku ma a gbogbo ɔmɛ ngɔ pue si. Ngmlaa ngɛ pɛe ngɛ yo ɔmɛ a nɔ tsuo kɛ ngɛ balɔ tsɛe.

⁶ Ta buli hi okpɔngɔhi a nɔ kɛ je Elam kɛ ba kɛ a dɛ mi kɛ̃ɛ̃. Ta buli nɛ je Kir hu mia kɛ tsɛ̃i ja nɔuu.

⁷ Yuda kɔ̃ zugbahi nɛ baa ní saminya a, a mi hyi tɔ kɛ ta zugba lɛhi; ta buli nɛ hi okpɔngɔhi a nɔ daa si ngɛ Yerusalem agbo ɔmɛ a nya.

⁸ Yuda nyɛ we he nyɛli ɔmɛ a nya nɛ e da ngɛ he ko he ko. Benɛ e ba lɛ kikɛ nɛ ɔ, nyɛ ya sɛ nyɛ ta nito he, nɛ nyɛ je ta hwumi níhi kpo.

^9-10 Nyɛ hyɛ Yerusalem gbogbo ɔ hehi nɛ hia kaa a dla. Nyɛ hyɛ wehi tsuo nɛ ngɛ Yerusalem ɔ, nɛ nyɛ ku ekomɛ kɛ pue si, konɛ nyɛɛ kɛ tɛ ɔmɛ nɛ dla fia gbogbo ɔmɛ. Jehanɛ, nyɛ susu nyu he,

¹¹ nɛ nyɛ pee nyu nɔ́ agbo ko ngɛ ma a mi, konɛ nyu nɛ jee taku momo ɔ mi ɔ nɛ sɛ mi. Nyɛ pee ní nɛ ɔmɛ, se Mawu ɔ nɛ to ní nɛ ɔmɛ tsuo a blɔ nya blema lokoo ɔ lɛɛ nyɛ hla we e se blɔ.

¹² Jamɛ a ligbi ɔ, Nyɔmtsɛ Yawɛ Tabohiatsɛ ɔ tsɛ ke nyɛ fo ya nɛ nyɛɛ ye kɔmɔ; nyɛɛ sɛ nyɛ yi kpalokpalo, nɛ nyɛɛ ha kpekpe ya bo,

¹³ se nyɛ pee we ja; nyɛ muɔ nɛ nyɛ nya mohu. Nyɛ gbe to kɛ na nɛ nyɛ ye ní, nɛ nyɛ nu ní. Bɔ nɛ nyɛ de ji, “Nyɛ ha nɛ waa ye ní nɛ waa nu ní, ejakaa hwɔɔ pɛ wa ma gbo!”

¹⁴ Kɛkɛ nɛ Yawɛ Tabohiatsɛ ɔ nitsɛ de mi ke, “A kɛ yayami nɛ a pee nɛ ɔ be mɛ pae a wami be ɔ tsuo. Imi, Nyɔmtsɛ Yawɛ Tabohiatsɛ ɔ lɛ i de.”

A bɔ Shebna kɔkɔ

¹⁵ Nyɔmtsɛ Yawɛ Tabohiatsɛ ɔ tsɔ mi Shebna, tsɔlɔ nɔkɔtɔma nɛ hyɛɛ matsɛ we ɔ nɔ ɔ ngɔ ke ma ya de lɛ ke,

¹⁶ “Kɛ o susuu ngɛ o he kɛɛ? Mɛnɔ ji mo? Mɛnɔ ha mo he blɔ kaa o kpɛ yɔkɔ ha o he ngɛ tɛ sa mi ngɛ yoku nɛ ɔ he?

¹⁷ O susuu kaa nɔ ko nɛ he hia tsɔ ji mo, se bu tue, Yawɛ maa hɛ mo kɛ fɔ he.

¹⁸ E ma koklo mo lokotoo kaa bɔɔlu, nɛ e maa hɛ mo ngɔ fɔ zugba agbo gbajaa ko nɔ. Lejɛ ɔ o ma gbo ngɛ ngɛ ta zugba lɛ ɔmɛ nɛ o ngɔ o hɛ ngɔ fɔ a nɔ ɔ a kasa nya. O pue o nyɔmtsɛ we ɔ hɛ mi si, mo zotsɛ!

¹⁹ Yawɛ maa ba mo si; a kpɔ o blɔ nya ngɛ o dɛ.”

²⁰ Yawɛ de Shebna ke, “Ke e ba mi ja a, ma tsɛ ye tsɔlɔ Eliakim, Hilkia bi ɔ kɛ ba.

²¹ Ma ngɔ o ní tsumi tade wuyaa a ngɔ wo lɛ, nɛ ma mia lɛ kɛ o mlɛ mi fimi nɔ́ ɔ. Nɛ blɔ nya tsuo nɛ o hɛɛ ɔ, ma ngɔ wo e dɛ, nɛ e maa pee kaa tsɛ kɛ ha Yerusalem ma a, kɛ Yuda zugba a tsuo.

²² He wami blɔ nya nɛ Matsɛ David sɛ ɔ hɛɛ ɔ, ma ngɔ kɛ ha lɛ. He wami blɔ nya nɛ ɔ ngɛ kaa safe ko. Ke e bli ɔ, nɔ ko nɔ ko be nɛ ma nga, nɛ ke e nga a, nɔ ko nɔ ko be nɛ ma bli.

²³ Ma to lɛ si saminya, nɛ e he maa wa wawɛɛ nitsɛ kaa tso plɛɛko nɛ e ma ba pee kaa jlasi ko kɛ wo e tsɛ we ɔ tsuo hɛ mi nyami.

²⁴ “Se e tsɛ we ɔ, e bimɛ, e nyɛmimɛ, kɛ e nina tsuo ma ba pee tlomi ngɛ e nɔ kaa kutuhi kɛ kãhi nɛ kplaa si ngɛ tso plɛɛko he!

²⁵ Ke e ba mi ja a, tso plɛɛko ɔ ma gbɔjɔ, nɛ e maa hia kɛ nɔ si. Kɛkɛ ɔ, ní ɔmɛ tsuo nɛ kplaa si ngɛ he ɔ, a hɛ mi ma kpata.” Yawɛ lɛ de.