Yesaya 21 - BAIBLO ALOO NGMAMI KLƆUKLƆU Ɔ

Babilon hɛ mi kpatami he nina

¹ Sɛ gbi nɛ kɔɔ Babilonia he ji nɛ ɔ nɛ. Kaa bɔ nɛ lasiogblee bee huu ngɛ leneyi je nga kplanaa a nɔ kɛ puɛɔ ní ɔ, jã kɛ̃ hɛ mi kpatami maa je zugba ko nɛ nɔ ngɛ gbeye nɔ kɛ ba.

² I na nina ko nɛ kɔɔ yi wu tso níhi nɛ maa ba a a he; a maa ngɔ nihi kɛ wo amanehlu mi, nɛ a hɛ mi ma kpata. Elam tabo, tee si nɛ o tua mɛ! Media tabo, wo ma amɛ a he ka! Amanehlu nɛ Babilon kɛ ba a, Mawu ma ha e se maa po.

³ Nɔ́ nɛ i na, kɛ nɔ́ nɛ i nu nɛ ɔ wo ye he gbeye wawɛɛ nitsɛ, nɛ ye he mi hia mi kaa yo nɛ nu kɔɔmi.

⁴ E pee mi kaa ye hɛ mi ngɛ mi tsitsɛɛe, nɛ ye he ngɛ doe blibliibli kɛ sawale. Jinɛ i ngɛ blɔ hyɛe kaa du nɛ bu mla, se gbeye níhi mohu nɛ je mi kɛ ba.

⁵ I na ngɛ nina a mi kaa a tsɛ ní yemi ko; nihi hii si ngɛ kuutuhi a nɔ kɛ ngɛ ní yee, nɛ a ngɛ ní nue. Tlukaa a, a nu nɛ a fa ke, “Ganɔhi! Nyɛɛ te si, nɛ nyɛɛ pɔ nyɛ tsɛ̃i ɔmɛ a he nu!”

⁶ Kɛkɛ nɛ Nyɔmtsɛ ɔ de mi ke, “Ha nɛ nɔ ko nɛ ya da si nɛ e hi huɔe, nɛ nɔ́ tsuaa nɔ́ nɛ e maa na a, e de.

⁷ Ke e na okpɔngɔhi, kɛ okpɔngɔ ta buli nɛ a to enyɔɔnyɔ, loo nihi nɛ a hi tejihi, kɛ afukpɔngɔhi a nɔ kɛ ma a, e pee klaalo.”

⁸ Bulɔ ɔ kpa ngmlaa ke, “Nyɔmtsɛ, i daa si ngɛ ye blɔ he ɔ kɛ ngɛ bue nyɔ kɛ pia tsuo.”

⁹ Tlukaa a, ta zugba lɛ kɛ e mi nimli, kɛ okpɔngɔ ta buli nɛ to enyɔɔnyɔ ji nɛ ɔ nɛ ba hia kpo. Kɛkɛ nɛ bulɔ ɔ kpa ngmlaa ekohu ke, “Babilon hɛ mi kpata oo, e hɛ mi kpata! Amaga amɛ nɛ a ngɛ jae ɔ tsuo ku pueɔ si!”

¹⁰ Ye ma Israel, mo nɛ́ be ko ɔ, a hao mo, nɛ a wa mo yi mi wawɛɛ nitsɛ kaa ngma nɛ a gbee, nɛ a sa mi ɔ, jehanɛ lɛɛ bu manye munyu tue. Manye munyu nɛ i ngɛ mo dee nɛ ɔ, i nu kɛ je Yawɛ Tabohiatsɛ, Israel Mawu ɔ ngɔ.

Sɛ gbi nɛ kɔɔ Edom he

¹¹ Sɛ gbi nɛ kɔɔ Edom he ji nɛ ɔ nɛ. Nɔ ko ngɛ ngmlaa kpae kɛ je Edom kɛ ngɛ bie ke, “Bulɔ, nyɔ mi mɛni be ji nɛ ɔ? Bulɔ, ngmlɛ nyɛmɛ a fia?”

¹² I he nɔ ke, “Je na ta, se nyɔ maa kpale ba ekohu. Ke o suɔ kaa o ma ba bi si ekohu ɔ, kpale kɛ ba nɛ o ba bi.”

Sɛ gbi nɛ kɔɔ Arabia he

¹³ Sɛ gbi nɛ kɔɔ Arabia he ji nɛ ɔ nɛ. Nyɛ Dedan blɔ hiali a kuu nɛ nyɛ ba pueɔ si ngɛ Arabia nga kplanaa a nɔ,

¹⁴ nibwɔhi nɛ kuma gbe mɛ nɛ a ba nyɛ ngɔ ɔ, nyɛ ha mɛ nyu nɛ a nu. Nyɛ nɛ nyɛ ngɛ Tema zugba a nɔ, nyɛ hu nyɛ ha mɛ nɔ ko nɛ a ye.

¹⁵ Ta kɛ e mi amanehlu babauu nya ni ɔmɛ tu fo kɛ je ɔ nɛ; a hia klaate kɛ wo a he, nɛ a dɔ kɛ̃ɛ̃ mi kɛ nyɛɛ a se kɛ fo.

¹⁶ Kɛkɛ nɛ Yawɛ de mi ke, “Hiɛmɛ nɛ ɔ jeha kake pɛpɛɛpɛ ɔ, Kedar weku ɔmɛ a he wami ɔ se maa po.

¹⁷ Kedar kɛ̃ɛ̃ tsɛ̃li ji kã peeli pe kulaa nɛ a le, se a ti nihi bɔɔ pɛ nɛ maa piɛ. Imi Yawɛ, Israel Mawu ɔ lɛ i de.”