Yesaya 20 - BAIBLO ALOO NGMAMI KLƆUKLƆU Ɔ

Gbalɔ he gu hɛɛlɔ ɔ we okadi

¹ Asiria matsɛ, Sargon fa Asiria asafoatsɛngua a ke e ya tua Filisti bi a ma nɛ a tsɛɛ Ashdod ɔ.

² Jeha etɛ loko sane nɛ ɔ maa ba a, Yawɛ de Amoz bi Yesaya ke, “Je kpekpe ɔ ngɛ o mlɛ mi, kɛ tokota nɛ ngɛ o nane ɔ.” E bu tue, nɛ e pee ja; e hɛɛ e he gu, kɛ e nane gu.

³ Benɛ a ngɔ Ashdod ma a, Yawɛ de ke, “Ye tsɔlɔ Yesaya hɛɛ e he gu, nɛ e nyɛɛ e nane gu jeha etɛ. Nɔ́ nɛ maa ba Egipt kɛ Sudan a nɔ ɔ he okadi ji nɛ ɔ nɛ.

⁴ Asiria matsɛ maa nuu nihi ngɛ ma enyɔ nɛ ɔmɛ a mi, nɛ e ma kpaka mɛ kɛ ho kɛ a he gu. Jokuɛwi kɛ nikɔtɔmahi tsuo maa nyɛɛ a nane gu, nɛ a maa hɛɛ a he gu; a supa nya tsuo maa fɔ si gu, nɛ zo maa gbe Egipt.

⁵ Nihi nɛ ngɔ a hɛ ngɔ fɔ Sudan nɔ, nɛ a fĩa fɔ Egipt nɔ ɔ, a hɛ mi maa pee mɛ yaa, nɛ a hɛ kɛ nɔ fɔmi tsuo maa ta.

⁶ Ke jamɛ a be ɔ su ɔ, nihi nɛ ngɛ Filistia wo ɔ nya a ma de ke, ‘Nihi nɛ wa ngɔ wa hɛ kɛ fɔ a nɔ kaa a ma je wɔ kɛ je Asiria matsɛ ɔ dɛ mi ɔ, hyɛ nɔ́ nɛ ba! Wɔɔ lɛɛ kɛ wa maa pee kɛɛ nɛ wa yi ma na wami?’ ”