Yesaya 2 - BAIBLO ALOO NGMAMI KLƆUKLƆU Ɔ

Tue mi jɔmi nɛ maa hi si daa

¹ Sɛ gbi nɛ Mawu ngɔ ha Yesaya, Amoz bi ɔ, nɛ kɔɔ Yuda kɛ Yerusalem a he ji nɛ ɔ nɛ:

² Hwɔɔ se ko ɔ, Yawɛ we ɔ maa ma yo gagaa ko yi mi; yo nɛ ya hiɔwe gojoo pe yo ɔmɛ tsuo yi mi e maa ma. Je ma amɛ tsuo ma bu yuu kɛ ba e he,

³ nɛ a ma de ke, “Nyɛ ha wa ya kuɔ Yawɛ yo ɔ kɛ ya Israel Mawu ɔ sɔlemi we ɔ. E maa tsɔɔ wɔ nɔ́ nɛ e suɔ kaa waa pee; nɛ wa maa pee bɔ nɛ e maa tsɔɔ wɔ ɔ pɛpɛɛpɛ. Ejakaa Yawɛ ní tsɔɔmi ɔ, Yerusalem e jee; e kɛ e ma a tuɔ munyu kɛ jeɔ Zion yo ɔ nɔ.”

⁴ Yawɛ maa hyɛ je ma amɛ a kpɛti sanehi a mi ha mɛ. E ma dla nihi babauu a kpɛti. A kɛ a ta hwumi klaate ɔmɛ maa sɔ kpakplaahi, nɛ a kɛ a we akplɔ ɔmɛ maa pee tso he suami hahi. Je ma ko je ma ko be ta hwue kɔkɔɔkɔ; a be a he dlae kɛ ha ta gblegbleegble hu.

⁵ Jehanɛ, nyɛ Yakob nina, nyɛ ha waa nyɛɛ ngɛ la nɛ Yawɛ ha wɔ ɔ mi!

A ma kpata he nɔ woli a hɛ mi

⁶ Mawu lee, o kua o ma, Yakob nina a, ejakaa klaali babauu nɛ je beleku je kɛ Filistia ba futu mɛ. Ma se bi a kusumi níhi o ma a ngɛ pee.

⁷ A zugba a nɔ hyi kɛ sika hiɔ kɛ sika tsu; a li a juetli ɔ nya. A we okpɔngɔ ɔmɛ hu hiɛ babauu, nɛ a ta zugba lɛ ɔmɛ hu a li nya.

⁸ Amagahi hyi a zugba a nɔ; nɛ níhi nɛ mɛ nitsɛmɛ a ngɔ a nine kɛ pee ɔ, lɔ ɔmɛ a jaa.

⁹ Lɔ ɔ he ɔ, moo ba a ti nɔ tsuaa nɔ si, nɛ zo nɛ gbe mɛ. Yawɛ koo ngɔ kɛ pa mɛ!

¹⁰ A ma ya laa a he ngɛ tɛ puɔhi a mi, aloo a maa tsua muɔhi, konɛ a laa a he kɛ je Yawɛ we abofu nɛ he wa a, kɛ e hɛ mi nyami ɔ nya!

¹¹ Be ma nɛ nɔmlɔ adesa he tsɔɔmi, kɛ e he nɔ womi tsuo a se maa po. Kɛkɛ ɔ, a ma wo Yawɛ pɛ nɔ gojoo.

¹² Jamɛ a be ɔ, Yawɛ Tabohiatsɛ ɔ maa ba he walɔ tsuaa he walɔ si; e maa ba he wolɔ kɛ he nɔ wolɔ, tsuo si.

¹³ E ma kpata Lebanon seda tso gagaa amɛ, kɛ Bashan tso ngua amɛ tsuo a hɛ mi.

¹⁴ E maa ba yo gagaa amɛ, kɛ yoku tsɔwi ɔmɛ tsuo si;

¹⁵ jã kɛ̃ mɔ tsuaa mɔ, kɛ gbogbo tsuaa gbogbo nɛ ngɛ mɔ ɔmɛ a he ɔ, e maa ba mɛ si.

¹⁶ Spania lɛ nguaa amɛ kɛ a he fɛu ɔ tsuo e ma ha a ma mu.

^17-18 Nɔmlɔ adesa he tsɔɔmi, kɛ e he nɔ womi tsuo se maa po. Amagahi a se maa po kulaa; nɛ jamɛ a be ɔ, Yawɛ pɛ nɔ a ma wo gojoo.

¹⁹ Nihi ma ya laa a he ngɛ tɛ puɔhi a mi ngɛ yo ɔmɛ a nɔ, aloo a maa tsua muɔhi, konɛ a laa a he ngɛ mi kɛ je Yawɛ we abofu nɛ he wa a, kɛ e hɛ mi nyami ɔ nya, ke e ba nɛ e ba mimiɛ zugba a.

²⁰ Jamɛ a be ɔ, ni ɔmɛ ma sake amaga amɛ nɛ a kɛ sika tsu kɛ sika hiɔ pee nɛ a ma ja a ngɔ hɛ fɔ he ha jesihi kɛ apanihi.

²¹ Ke Yawɛ ba nɛ e ba mimiɛ je ɔ, nimli maa laa a he ngɛ tɛ puɔhi kɛ muɔhi a mi ngɛ yo ɔmɛ a nɔ kɛ je e abofu nɛ he wa a, kɛ e hɛ mi nyami ɔ nya.

²² Nyɛ ko ngɔ nyɛ hɛ ngɔ fɔ nɔmlɔ adesa nɔ. Tlukaa kɛkɛ e mumi je e mi, nɛ e he be se nami hu.